Babai i Li Angut është inxhinier ndërsa nëna mjeke. Atyre u pëlqen shumë muzika. Li Ang u shpreh se shtëpia e saj është plot qeshje dhe muzikë:

"Në shtëpinë time ka një piano, qysh nga mosha 1-vjeçare, fillova të mësoj t'i bie asaj. Kur isha 4 vjeçe, fillova mësimin profesional të pianos. Prindërit më përkrahin shumë në studimin e muzikës."

Li Ang shfaqi talent të lartë në këtë fushë. Kur ishte në moshën 6-vjeçare, ajo dha shfaqje për herë të parë në skenë dhe interpretoi melodinë e mbylljes të një ceremonie të dhënies së çmimeve. Pas hyrjes në shkollën fillore, Li Ang harxhonte pothuajse tërë kohën e lirë në ushtrimin e pianos duke hedhur bazë të fortë për mjeshtërinë e saj në këtë fushë.

Kur Li Ang ishte në moshën 10-vjeçare, prindërit e saj vendosën ta dërgojnë në SHBA për studime. Aty atë e shoqëroi edhe e ëma. Në fillim të vajtjes në SHBA, Li Ang hasi shumë vështirësi si moskuptimi i gjuhës angleze, dallimet në zakonet e jetesës, mënyra e ndryshme e mësimdhënies etj. Por këto vështirësi nuk e penguan vendosmërinë e Li Angut për të studiuar. Ajo tha:

"Rruga e muzikës nuk është e lehtë për çdo njeri. Megjithëse ka shumë vështirësi, kam interes të madh për muzikën, jeta ime nuk mund të ndahet nga ajo."

Kur ishte në moshën 13-vjeçare, Li Ang bashkëpunoi me një orkestër filarmonike për të dhënë shfaqje në Qendrën Artistike "Linkoln" të Nju-Jorkut duke tërhequr vëmendjen e medias amerikane. Qysh nga viti 2003, shoqëria e transmetimeve CBC e Kanadasë filloi të transmetojë koncertin e Li Angut.

Pas hyrjes në Institutin Muzikor "Kurtis" të Filadelfias, Li Ang pati kontakte me shumë pianistë të famshëm botërorë. Ajo u bë dikur ndihmësja e mjeshtrit të pianos Leon Fleisher duke mësuar shumë nga ai. Në Institutin Muzikor "Xhuiliard" të Nju-Jorkut, Li Ang mësoi nga pianistja Y. Kaplinski dhe mori gradën e aspirantit të pianos. Tani Li Ang po vazhdon studimet për gradën e doktorit të pianos.

Në Kinë, mësuesit e pianos zakonisht u japin nxënësve udhëzime të hollësishme. Por në SHBA, mësuesit i kushtojnë më shumë rëndësi përgatitjes së interesit të nxënësve për artin dhe i inkurajojnë nxënësit të marrin pjesë në shfaqje të ndryshme. Kjo mënyrë e mësimdhënies e ndihmoi Li Angun të sigurojë shumë raste shfaqjesh. Ajo tha:

"Afërsisht nga mosha 15-vjeçare, grumbullova gradualisht përvojën e shfaqjeve për shembull të shfaqjeve në shkollë, në teatër etj. Tani kam përvojë të pasur shfaqjesh duke e ngritur shumë nivelin tim."

Tani më shumë kinezë kanë shkuar në vendet perëndimore për studime muzikore, njëkohësisht shumë prej tyre kanë hyrë në skenën ndërkombëtare. Gjatë studimeve për muzikën perëndimore, shumë muzikantë kinezë kanë filluar të përhapin muzikën kombëtare kineze në Perëndim. Edhe Li Ang po bën kështu. Në një koncert solo të zhvilluar këtë vit në SHBA, Li Ang interpretoi në piano dy këngë popullore kineze "Dashuria në Kangding" dhe "Lumi Liuyang". Li Ang u shpreh se kjo është një provë e guximshme për të:

"Më pëlqejnë shumë këto dy këngë popullore kineze dhe jam e mendimit se këto këngë janë të përshtatshme të interpretohen me piano. Në të ardhmen do të interpretoj më shumë muzikë popullore kineze."

Krahas ushtrimeve në piano, në kohën e lirë, Li Angut i pëlqen të shohë filma dhe të notojë. Në jetën e përditshme, Li Ang është një vajzë e qetë, por në skenë, ajo është plot entuziazëm e fuqi. Tani Li Ang jep shfaqje kryesisht në vendet e Amerikës Veriore. Ajo po pret të fillojë jetën e pianistes profesioniste pas mbarimit të studimeve. (Fani)