Sihu është një instrument i lashtë i kombësisë mongole që ka dëshmuar historinë e kësaj kombësie.

Për të kërkuar sihu-në, korrespondentja bëri posaçërisht një vizitë te studiuesi i kulturës popullore mongole i Institutit Studimor të Artit të Tongliaos Sanbula Nuoribu.

Nuoribu tha se sihu quhet edhe instrumenti me 4 tela. Ndër instrumentet e lashta popullore mongole, përveç matouqinit, sihu është i përhapur më gjerësisht. Herët para mbi 700 vjetëve, këngëtarët në kullotë filluan të këndonin duke i rënë sihu-së.

Sot në kullotë është ndërtuar qyteti modern Tongliao, shumë qytetarë që janë rritur në këtë qytet nuk kanë parë sihu.

Në mbrëmje, korrespondentja intervistoi disa qytetarë që po pushonin në sheshin më të madh të qytetit.

"Mirëmbrëma! A e njihni sihu-në, një instrument?"

"Sihu? Nuk e njoh."

"Po ju, a e njihni sihu-në?"

"Sihu? E kam dëgjuar, por nuk e kam parë."

Korrespondentja shkoi në një restorant të vogël, atje kishte disa të rritur që po pinin raki. Ata e njihnin sihu-në.

"Sihu është instrument popullor mongol. Kur ishim të vegjël në kullotë, dëgjonim shpesh uligerin e shoqëruar me sihu."

Uligeri është një lloj arti tregimtar dhe i këndimit i kombësisë mongole. Ulger do të thotë "rrëfimi i tregimeve duke i rënë sihu-së".

Për të dëgjuar melodinë e sihu-së, korrespondentja shkoi në veri të kullotës Kerçin, vendlindjen e uligerit dhe hasi trashëgimtarin e brezit të 6-të të uligerit Laosier.

"Jeta ime nuk mund të ndahet nga uligeri. Ky është një art i veçantë i kombësisë mongole, popullit mongol i pëlqen shumë."

Gjatë intervistës, korrespondentja dëgjoi shpesh emrin Hei Xiao. Hei Xiao quhet mbreti i verbër i këndimit në Kerçin. Pas përpjekjeve të mëdha, korrespodentja e gjeti më në fund shtëpinë e Hei Xiaos në një fshat.

"Mirëdita, zoti Hei Xiao!"

"Mirë se erdhët!"

"Vij nga Pekini."

"Shumë mirë!"

Në murin e shtëpisë së Hei Xiaos varet një sihu e lashtë.

"Mësova t'i bie sihu-së në moshën 16-vjeçare. Sihu-ja ime ka një histori mbi 30-vjeçare."

Sivjet Hei Xiao është 67 vjeç. Gjatë gjysmëshekullit të kaluar, ai u dhuroi banorëve në Kerçin këngë dhe melodi të bukura me sihu duke fituar përshëndetjen dhe nderimin e tyre.

Laosier dhe Hei Xiao kanë dëshirën e përbashkët që të trashëgohet sihu-ja brez pas brezi. Dhe është një gjë e gëzueshme që disa të rinj dëshirojnë të mësojnë sihu. Vajza 18-vjeçare Uniriqiqige është një prej tyre.

"Kam interes të madh të këndoj uligerin duke i rënë sihu-së. Kjo është trashëgimia e kombësisë mongole."

Për të trashëguar artin e sihu-së të kombësisë mongole, në vitin 2005, qeveria kineze e përcaktoi këtë art si trashëgimi kombëtare kulturore jomateriale dhe u krijua shoqata e sihu-së në Rajonin Autonom të Mongolisë së Brendshme. (Fani)