dëgjoni

Korrespondenti i Radios së Jashtme të Kinës njoftoi se më 16 gusht do të mbahet në kryeqytetin e Kirgizistanit Bishkek takimi i 7-të i mbledhjes këshillimore të liderëve të vendeve anëtare të Organizatës së Bashkëpunimit të Shangait. Gjatë takimit, liderët e vendeve anëtare do të përgjithësojnë sukseset e arritura në zhvillimin e kësaj organizate pas samitit të vitit të kaluar në Shangai dhe do të bëjnë planifikimin e ri lidhur me bashkëpunimin e vendeve anëtare në fushën e sigurimit, ekonomike, të kulturës njerëzore etj. Sekretari i qendrës së studimit të Organizatës së Bashkëpunimit të Shangait pranë Akademisë së Shkencave Shoqërore të Kinës Sun Zhuangzhi i dha një intervistë gazetares së radios sonë lidhur me tiparet e samitit të kësaj radhe, rezultatet e parashikuara dhe zhvillimin e ardhshëm të Organizatës së Bashkëpunimit të Shangait. Në shënimin e sotëm do të dëgjoni hollësira lidhur me këtë.

Sun Zhuangzhi vuri në dukje se një pikë e rëndësishme e këtij samiti është përmasa e madhe. Siç mësohet, përveç Kinës, Rusisë dhe të gjitha vendeve anëtare, në samitin e kësaj here do të marrin pjesë edhe përfaqësuesit e 4 prej vendeve vëzhguese të Organizatës së Bashkëpunimit të Shangait: presidenti i Mongolisë Nambaryn Enkhbayar, presidenti i Iranit Mahmoud Ahmadinejad dhe ministrat e jashtëm të Pakistanit dhe të Indisë. Përveç këtyre, do të marrin pjesë në samit si të ftuar edhe presidenti i Afganistanit Hamid Karzai, presidenti i Turkmenistanit Gurbanguly Berdymukham dhe nënsekretari i përgjithshëm i OKB-së B. Lyn Pascoe. Sun Zhuangzhi është i mendimit se nga një anë ky samit tregon vitalitetin dhe forcën tërheqëse të Organizatës së Bashkëpunimit të Shangait.

"Ky samit është një takim i mrekullueshëm, kjo tregohet në përmasat dhe numrin e dokumenteve të nënshkruara. Të gjitha këto tregojnë se forca tërheqëse e Organizatës së Bashkëpunimit të Shangait është gjithnjë e më e madhe dhe po tërheq më shumë vëmendjen e vendeve vëzhguese, të vendeve anëtare dhe të vendeve përreth".

Siç mësohet, në këtë samit liderët e 6 vendeve do të nënshkruajnë së bashku "Traktatin e bashkëpunimit të fqinjësisë së mirë dhe afatgjatë të vendeve anëtare të Organizatë së Bashkëpunimit të Shangait", "Manifestin e Bishkekut" dhe "Komunikatën e përbashkët". Ndër to, traktati që do të nënshkruhet është iniciuar nga kryetari Hu Jintao në samitin e vitit të kaluar dhe është dokumenti i parë politik shumëpalësh i rajonit, i cili do të përcaktojë në mënyrë ligjore miqësinë tradicionale dhe ruajtjen e paqes midis popujve të vendeve anëtare. Sun Zhuangzhi është i mendimit se ky traktat ka rëndësi të madhe për të nxitur besimin te njëri-tjetri, bashkëpunimin me leverdi reciproke dhe për të krijuar një rajon harmonik. Ai theksoi:

"Ky dokument ka rëndësi të veçantë. Pas nënshkrimit të tij, vendet anëtare të Organizatës së Bashkëpunimit të Shangait do të zhvillojnë bashkëpunim në fushat ekonomike, të sigurimit dhe të kulturës njerëzore. Mbi të gjitha ky dokument do të hedhë një bazë të mirë ligjore".

Për perspektivën e ardhshme të zhvillimit të Organizatës së Bashkëpunimit të Shangait, Sun Zhuangzhi ka shumë besim. Ai tha:

"Organizata e Bashkëpunimit të Shangait ka vitalitet të madh, sepse përfaqëson një frymë që përputhet me interesat e përbashkëta të Kinës, të Rusisë dhe të vendeve të Azisë Qendrore. Me zhvillimin e marrëdhënieve dypalëshe ndërmjet vendeve anëtare dhe shtimin e njohjes së komunitetit ndërkombëtar për këtë organizatë, Organizata e Bashkëpunimit të Shangait do të ketë një perspektivë të mirë." (Vera)