dëgjoni

Më 14 gusht kryetari i shtetit i Kinës Hu Jintao u nis nga Pekini, duke filluar turneun e tij në Azinë Qendrore. Gjatë udhëtimit 5-ditor, Hu Jintao do të zhvillojë vizitë shtetërore në Kirgizistan, do të marrë pjesë në Samitin e vendeve anëtare të Organizatës së Bashkëpunimit të Shangait, do të shikojë manovrat ushtarake antiterroriste të Organizatës së Bashkëpunimit të Shangait dhe do të zhvillojë vizitë shtetërore në Kazakistan. Funksionari i Ministrisë së Punëve të Jashtme të Kinës tha se turneu i Hu Jintaos në Azinë Qendrore është një veprim i rëndësishëm diplomatik i Kinës brenda këtij viti, dhe ka rëndësi të madhe pozitive për zhvillimin e përbashkët të vendeve të ndryshme të Azisë Qendrore.

Pas arritjes së tij më 14 gusht në kryeqytetin e Kirgizistanit, Bishkek, Hu Jintao do të zhvillojë një sërë takimesh me presidentin Bakijev dhe me liderët e tjerë të palës kirgizistanase. Të dyja palët do të nënshkruajnë dokumentet e bashkëpunimit në fushat politike, ekonomiko-tregtare, bujqësore, arsimore etj. Duke iu përgjigjur ditët e fundit pyetjeve të gazetarëve, ndihmësi i ministrit të Jashtëm të Kinës Li Hui tha se ai shpreh besimin e plotë për vizitën e Hu Jintaos në Kirgizistan.

"Me rastin e 15-vjetorit të vendosjes së marrëdhënieve diplomatike midis Kinës dhe Kirgizistanit dhe me rastin e 5-vjetorit të nënshkrimit të "Marrëveshjes së miqësisë dhe të bashkëpunimit midis Kinës dhe Kirgizistanit", kjo vizitë me siguri ka rëndësi të madhe historike për nxitjen e zhvillimit të plotë të marrëdhënieve kino-kirgizistanase. Ne jemi të bindur se kjo vizitë do të arrijë objektivin për shtimin e besimit reciprok politik, nxitjen e bashkëpunimit konkret, thellimin e bashkëpunimit në fushën e sigurisë dhe zgjerimin e shkëmbimeve humanitare."

Më 16 gusht do të zhvillohet në Bishkek Samiti i vendeve anëtare të Organizatës së Bashkëpunimit të Shangait. Ky samit do të jetë një takim madhështor. Përveç Hu Jintaos dhe presidentëve të vendeve të ndryshme anëtare të kësaj organizate, edhe presidenti i Mongolisë, vend vëzhgues i kësaj organizate, e ai i Iranit, si dhe ministrat e Jashtëm të Pakistanit dhe Indisë do të marrin pjesë në këtë samit. Liderët e vendeve anëtare të saj do të nënshkruajnë një sërë dokumentesh shumë të rëndësishme. Ndër to, "Marrëveshja e marrëdhënieve të fqinjësisë së mirë afatgjatë midis vendeve anëtare të Organizatës së Bashkëpunimit të Shangait" do të tërheqë më shumë vëmendjen e njerëzve në botë.

Pala kineze është e mendimit se Samiti i Bishkekut do të jetë një samit me rëndësi të madhe historike në procesin e zhvillimit të Organizatës së Bashkëpunimit të Shangait. Ndihmësi i ministrit të Jashtëm të Kinës tha: "Gjatë Samitit, presidentët do t'i hedhin një vështrim dhe do të përgjithësojnë sukseset e arritura gjatë zhvillimit të kësaj organizate. Përveç kësaj, ata do të hartojnë planin e ri lidhur me bashkëpunimin e ardhshëm midis vendeve anëtare në fushat e sigurisë, ekonomike, humanitare etj,. dhe do të shkëmbejnë mendime lidhur me problemet e rëndësishme ndërkombëtare e rajonale. Kjo favorizon jo vetëm nxitjen e zhvillimit të vazhdueshëm të kësaj organizate, por edhe zhvillimin e drejtë të gjendjes rajonale." (Sihai)