Në qytetin Uhai të Mongolisë së Brendshme gjendet një ndërmarrje me emrin Shoqëria Aksionare e "Uhait Misterioz" e koksifikimit të qymyrgurit dhe e industrisë kimike. Industria e përpunimit të qymyrgurit ka qenë gjithmonë një degë industrie që ndot më rëndë mjedisin, por sot, kur hyjmë në këtë ndërmarrje, nuk shohim atë tablo plot me tym dhe pluhur që ka qenë më parë përgjithësisht në ndërmarrjet e përpunimit të qymyrgurit. Zoti Li Huai-guo, kryetari i Këshillit të kësaj ndërmarrjeje, tha se ata i kushtojnë shumë rëndësi mbrojtjes së mjedisit, prandaj bëjnë vazhdimisht kërkime shkencore për të krijuar teknologji të reja të trajtimit dhe shfrytëzimit të fundërrinave të qyfyrgurit dhe tashmë kanë gjetur një rrugë të kursimit të energjisë dhe të mbrojtjes së mjedisit.

"Më parë, pas pasurimit të qymyrgurit, gangueja, që është një lloj guri me pak vlerë djegije brenda qymyrgurit, hidhej plotësisht, gjë që solli ndotjen e mjedisit. Tani kemi ndërtuar një central elektrik, ku gangueja shfrytëzohet për prodhimin e energjisë elektrike, ndërsa pluhuri i hirit të qymyrgurit përdoren për prodhimin e tullave dhe çimentos. Si rezultat, të gjitha fundërrinat shfrytëzohen plotësisht. Edhe uji i përdorur trajtohet dhe shfrytëzohet përsëri nëpërmjet një rruge të mbyllur të qarkullimit. Kështu që, kemi realizuar mosshkarkimin e ujit të përdorur për jashtë."

Duke u mbështetur në vendburimet e pasura të energjisë, Mongolia e Brendshme ka ndërtuar një numër ndërmarrjesh industriale me qymyrgurin, çelikun dhe energjinë elektrike si forca kryesore. Duke luajtur rolin e tyre në shpejtimin e zhvillimit të ekonomisë së Mongolisë së Brendshme, këto ndërmarrje ishin bërë dikur edhe forca kryesore në konsumin e energjisë dhe në ndotjen e mjedisit. Vitet e fundit, duke i marrë ndërmarrjet kryesore si pikënisje, rajoni autonom i Mongolisë së Brendshme ka ngritur një fushatë të prodhimit të pastër me kursimin e energjisë, uljen e konsumit, pakësimin e ndotjes dhe rritjen e efektivitetit si objektiv. Në disa parqe industriale dhe baza të mëdha industriale është formuar një zinxhir indstrial për prodhimin e energjisë elektrike me gangue, për nxjerrjen e oksidit të aluminit nga pluhuri i hirit të qymyrgurit, për kthimin dhe trajtimin e ujit të përdorur dhe për prodhimin e energjisë elektrike me plehra të tjera organike. Theksi i punës në këtë zinxhir industrial vihet në trajtimin dhe shfrytëzimin kompleks të gangues, pluhurit të hirit të qymyrgurit, gazeve të padobishme, ujit të përdorur dhe lëndëve të tjera të mbetura. Sot në Mongolinë e Brendshme, ekzistojnë mbi 100 ndërmarrje që ndjekin rrugën e mbrojtjes së mjedisit ashtu si Shoqëria Aksionare "Uhait Misterioz".

Në disa zona të Mongolisë së Brendshme shfrytëzohet sot fuqia e erës për prodhimin e energjisë elektrike. Ndër to është edhe qyteti Ulançabu, që gjendet vetëm 336 kilometra larg Pekinit. Një pjesë e energjisë elektrike të tij, të prodhuara me fuqi të erës, mund të sillet për ta furnizuar Pekinin gjatë Lojërave Olimpike të vitit 2008, duke i ofruar një përkrahje të fuqishme për organizimin e "Lojërave Olimpike të gjelbra". Lidhur me këtë, foli Vu Yong-sin, sekretari i komitetit të partisë për qytetin Ulançabu.

"Kudo në rajonin tonë fryn erë, por era në qytetin Ulançabu është më e pëlqyeshme, sepse energjia elektrike e prodhuar me këtë erë mund të çohet në kryeqytet, meqenëse ai ndodhet afër. Nuk është një ëndërr parulla jonë për të prodhuar aq shumë energji elektrike me fuqi të erës sa hidrocentrali i madh në Sansia dhe për ta shndërruar Uëlançabunë në një qytet të energjisë elektrike të erës."

Mongolia e Brendshme ka marrë edhe masa për eliminimin ose për reformimin e një numër ndërmarrjesh të prapambetura që konsumonin shumë energji dhe ndotnin rëndë mjedisin, siç tha zoti Bai Sianng-qun, kryetari i bashkisë së qytetit Uhai.

"Administrata e qytetit tonë ndihmon ato ndërmarrje për ngritjen e nivelit teknik. Ato kanë nevojë jo vetëm për të ngritur nivelin e pajisjeve të prodhimit, por edhe për të arritur standardet e kursimit të energjisë dhe të pakësimit të ndotjes së mjedisit. (Zheng)