Në mëngjesin e 8 gushtit, gjyshi Zhang Ling, 63 vjeçar shkoi herët për stërvitje në parkun "Licun" pranë shtëpisë së tij. Duke parë ujin e kulluar në shtratin e lumit, shelgjet vajtuese të rritura buzë lumit si dhe lulet e çelura e barin e gjelbër në park, gjyshi Zhang u ndje i freskët në zemër. Por vetëm para 3 vjetëve, shtrati i këtij lumi ishte ende një hendek me erë të keqe dhe parku dukej i çrregullt. Duke folur për ndryshimet pranë tij, të sjella nga garat olimpike të lundrimit me vela, gjyshi Zhang tha i emocionuar:

"Jemi shumë të gëzuar që garat olimpike do të zhvillohen pranë shtëpisë sime. Në të kaluarën mjedisi këtu ishte shumë i keq, sepse kishte një fabrikë të prodhimit të anijeve. Në saje të Lojërave Olimpike, fabrika u shpërngul. Tani hapësira ujore e këtushme është shumë e mirë."

Ka edhe shumë shembuj të tillë si ndryshimet pranë shtëpisë së gjyshit Zhang gjatë procesit të punëve përgatitore për garat e lundrimit me vela të Lojërave Olimpike 2008. Nga këto ndryshime banorët e qytetit Qingdao kanë gëzuar favoret e sjella nga Lojërat Olimpike, prandaj më 8 gusht, me rastin e një vjetorit para hapjes së Lojërave Olimpike të Pekinit, shumë banorë u mblodhën me iniciativë në sheshin "4 maji" në qendër të qytetit, për të kremtuar këtë çast të veçantë.

"Le të numërojmë mbrapsht! Pesë, katër, tre, dy, një?."

Koha fluturon si shigjetë. Kanë kaluar 6 vjet që nga vitin 2001 kur Pekini fitoi të drejtën e organizimit të Lojërave Olimpike. Gjatë 6 vjetëve, garat olimpike të lundrimit me vela kanë luajtur një rol katalizatori, duke sjellë qytetit Qingdao ndryshime të mëdha dhe njëkohësisht këto gara olimpike janë bërë edhe simboli i qytetit Qingdao, i ndryshëm nga qytetet e tjera bregdetare kineze. Kështu figura si "kryeqytet i lundrimit me vela" është bërë edhe kartëvizita e këtij qyteti. Kryetari i Bashkisë së Qytetit Qingdao, z. Xia Geng, i tha korrespondentit se procesi i përsosjes së kësaj kartëvizite të qytetit do të vazhdojë më tej.

"Gjatë këtyre 6 vjetëve, banorët e qytetit Qingdao kanë bërë përpjekje të mëdha për zhvillimin e garave olimpike të lundrimit me vela 'me karakteristika dhe nivel të lartë'. Në vitin e fundit para Lojërave Olimpike 2008, do të vazhdojmë të përmirësojmë punët përgatitore."

Sipas të dhënave statistikore të qytetit Qingdao, garat olimpike të lundrimit me vela kanë luajtur rol të fortë nxitës për ekonominë e qytetit. Që nga viti 2003, Qingdao-ja ka pasur një rritje ekonomike vjetore prej 16.4% dhe sasia e investimeve të huaja të shfrytëzuara i kaloi 15 miliardë dollarët amerikanë. Këto janë përfitimet e qytetit Qingdao gjatë procesit të përsosjes së kartëvizitës së tij si "kryeqytet i lundrimit me vela".

Edhe ndërtimi urbanistik është zhvilluar shumë. Vitet e fundit, në këtë qytet filluan me radhë punët e ndërtimit të tunelit përmes detit dhe të urës mbi det. Me transformimin e stacionit hekurudhor të Qingdaos dhe zgjerimin e aeroportit ndërkombëtar, është krijuar në këtë qytet rrjeti i komunikacionit të lehtë dhe të rrjedhshëm. Krahas këtyre, në qytet u krijua edhe një kontingjent pajisjesh publike kulturore, si teatri i madh, qendra e kulturës moderne, pallate e stadiume sportive etj.

Për ndryshimet e qytetit Qingdao, edhe sportistë e trajnerë të huaj dhanë vlerësim të lartë. Trajnerja Kellen Kristof, në krye të ekipit të Meksikës, po merr pjesë në Garën Ndërkombëtare të Sportit të Lundrimit me Vela në Qingdao, që është edhe një pjesë përbërëse e serisë së veprimtarive sportive "Paç fat, Pekin!" 2007. Ajo erdhi në Qingdao dhe vitin e kaluar. Ai tha:

"Ka ndryshuar shumë! Qingdao ka bërë shumë përpjekje. Qyteti është bërë gjithnjë e më modern dhe banorët janë shumë entuziastë. Mrekulli!" (Wang Lei)