Kënga që ndoqët?është kënga popullore e Singjiangut me titull "Melodi e valles së rinisë", kënduar nga Tan Jing. Kjo këngë përshkruan kalimin e kohës, duke na treguar se duhet ta çmojmë atë dhe të kuptojmë se rinia kalon fluturimthi. Në këngë thuhet: "Dielli që perëndon, do të ngrihet përsëri nesër në mëngjes, lulet që thahen, do të çelin përsëri vitin e ardhshëm. Zogjtë e bukur fluturojnë pa lënë gjurmë, zogu im i rinisë ikën pa u kthyer kurrë."

Këngëtarja e re Tan Jing ka lindur në një familje muzikantësh të qytetit Houma të provincës Shanxi të Kinës veriqendrore. Në moshën 8 vjeçare ajo filloi të mësonte t'i binte pianos dhe kur ishte 9 vjeçe interpretoi për herë të parë në skenë së bashku me prindërit. Në moshën 11 vjeçe ajo filloi të mësojë të këndojë nga e ëma. Në vitin 1994, ajo u pranua në fakultetin e muzikës vokale të Konservatorit të Kinës. Pas 4 vjet studimesh ajo u diplomua me rezultate të shkëlqyeshme dhe hyri në Ansamblin e Këngëve dhe Valleve të Drejtorisë së Përgjithshme Politike të Ushtrisë Popullore Çlirimtare Kineze si soliste.

Kënga që dëgjuat është një këngë popullore e provincës Yunnan. Kjo është një këngë dashurie shumë e përhapur në Kinë. Ajo me ritme të shtruara dhe të lira dhe me melodi të freskët e të bukur përshkruan një tablo poetike. Në këngë thuhet: "Doli hëna e ndritur, më merr malli për të dashurin tim që është në malësi. Duke parë hënën, më merr malli për ty. Po fryn një fllad i lehtë, oh, i dashur im, a dëgjon thirrjen time." Këtë këngë Tan Jingu e këndon me zë të ëmbël e të pastër dhe në mënyrë poetike.

Tan Jingu guxon të bëjë kërkime në interpretimin e këngëve dhe ka formuar stilin e saj të veçantë. Ajo këndon me zë të bukur, të pastër e kumbues dhe me ndjenja të përzemërta e të pasura, prandaj interpretimi i saj ka forcë të madhe shprehëse e prekëse. Më poshtë do të shijojmë së bashku këngën popullore të provincës Qinghai me titull "Lulet e djemtë", kënduar nga Tan Jing. Kjo është një këngë tradicionale dashurie që është e përhapur gjerësisht në provincën Qinghai të Kinës veriperëndimore, e cila përshkruan dashurinë e pastër midis vajzave e djemve. Në atë krahinë "lulet" përfaqësojnë vajzat. Kjo këngë e këndshme ka melodi të bukur dhe ritme të qarta.

Ju flet Radio e Jashtme e Kinës! Ndoqët disa këngë popullore kineze të kënduara nga këngëtarja e re Tan Jing. Mirudëgjofshim të shtunën tjetër. Në mikrofon për ju, Pina.