Dëgjoni

Paraqitja e vendit organizativ në Lojërat Olimpike ka qenë fokusi i vëmendjes së njerëzve. Në saje të suksesit të sportistëve kinezë në Lojërat Olimpike të Athinës, shumë personalitete të qarqeve sportive ndërkombëtare shprehën mendimin se sportistët kinezë do të arrijnë rezultat më të mirë në Lojërat Olimpike të Pekinit dhe madje ndoshta do të zënë vendin e parë të medaljeve të arta. Por funksionarë kinezë të sporteve nuk janë aq optimistë. Ditët e fundit, zv/drejtori i Drejtorisë së Përgjithshme Kombëtare të Fizkulturës dhe të Sporteve të Kinës z. Cui Dalin tha se objektivi i delegacionit sportiv të Kinës në Lojërat Olimpike është që të përpiqet të radhitet në vendin e parë të grupit të dytë.

Që nga viti 1984, kur delegacioni sportiv i Kinës u kthye përsëri në fushat e Lojërave Olimpike Verore, rezultati i tij ka tërhequr vëmendjen e të gjithë botës. Veçanërisht pas Lojërave Olimpike të Barcelonës në vitin 1992, paraqitjet e sportistëve kinezë në Lojërat Olimpike Verore kanë qenë gjithnjë e më të mira. Në Lojërat Olimpike të Athinës në vitin 2004, delegacioni kinez fitoi gjithsej 32 medalje të arta, duke kaluar Rusinë, vendin e fortë tradicionalisht në sport. Shumë njerëz mendojnë se në Lojërat Olimpike të organizuara nga Kina vetë, epërsia si organizatorë do t'i ndihmojë kinezët të marrin rezultat më të mirë, dhe madje, të kalojnë SHBA-në, duke zënë vendin e parë në listën e medaljeve të arta. Por një pikëpamje e tillë nuk pranohet nga personalitete të qarqeve sportive të Kinës. Zv/drejtori i Drejtorisë së Përgjithshme Kombëtare të Fizkulturës dhe të Sporteve të Kinës Cui Dalin tha ditët e fundit se situata e delegacionit të Kinës në Lojërat Olimpike nuk është aq optimiste sa ç'parashikohet.

"Ne kemi distancë të madhe në potencialin e përgjithshëm të sportit me SHBA-në dhe Rusinë dhe nuk përjashtohen edhe kundërshtarë të tjerë, si Gjermania, Australia, Franca si dhe fqinjet tona Japonia dhe Koreja e Jugut. Në qoftë se i konsiderojmë SHBA-në dhe Rusinë si grupin e parë, mendoj se Kina ndodhet ende në grupin e dytë dhe objektivi ynë është që të përpiqemi të radhitemi në vendin e parë të grupit të dytë."

Ndoshta ndonjëri mendon se funksionari sportiv i Kinës shfaq një qëndrim të tillë modest me paramendim, por kjo nuk është e vërtetë. Vlerësimi i potencialit të përgjithshëm të një vendi në Lojërat Olimpike nuk bazohet vetëm në numrin e medaljeve të arta, por në atë të medaljeve në përgjithësi. Të marrim për shembull Lojërat Olimpike të Athinës, ku numri i medaljeve të delegacionit të Kinës ishte 40 më pak se ai i SHBA-së dhe 29 më pak se ai i Rusisë. Në veprimtaritë e mëdha sportive botërore në vitin 2006, sportistët kinezë morën 79 medalje, ndërsa SHBA-ja 106 dhe Rusia 83. Ky është disnivel i dukshëm.

Edhe disa probleme të tjera, që nuk janë aq të dukshme si numri i medaljeve, do të ndikojnë drejtpërdrejt mbi paraqitjen e delegacionit të Kinës në Lojërat Olimpike, u shpreh z. Cui Dalin.

"Ndodhemi përpara sfidave serioze në disa disiplina sportive ku kemi epërsi, jemi shumë të dobët në disa disiplina të mëdha, si atletika, noti dhe sportet e ujit dhe kemi distancë të madhe me nivelin e përparuar botëror në lojërat ekipore me top. Për sa i përket epërsisë si organizatorë, ndoshta kjo do të shndërrohet në element negativ, sepse në disiplinat sportive ku kemi epërsi duhet paraqitje e qëndrueshme dhe e saktë, ndërsa pjesëmarrja në garat e zhvilluara në vend do të provokojë gjendjen psikologjike të sportistëve. Nëse sportistët kinezë do të ruajnë qëndrueshmërinë shpirtërore, ky është një problem kyç."

Shtimi dhe pakësimi i disiplinave të vogla sportive do të ushtrojë ndikim në rezultatet e delegacionit kinez. Nga njëra anë, në Lojërat Olimpike të Pekinit do të hiqen 5 disiplina të vogla të qitjes dhe të skermës, ndërsa në këto 5 disiplina sportistët kinezë u përfshinë në 3 vendet e para në edicionet e kaluara të Lojërave Olimpike. Nga ana tjetër, në disiplinat e vogla të shtuara në këtë edicion, si noti 10 km në hapësirë të hapur ujore, BMX (gara me biçikletë në terren të vështirë) si dhe vrapimi 3000 metra me pengesë për femra, Kina ose nuk i zhvillon këto disiplina ose është në nivel shumë të ulët.

Z. Cui Dalin tha se në kohën kur përpiqen për rezultate më të mira, qarqet sportive të Kinës nuk e përqendrojnë të gjithë vëmendjen vetëm te medaljet e arta dhe rezultati sportiv. Në vendin e vet, sportistët kinezë kanë shumë gjëra të tjera për t'i paraqitur botës.

"Objektivi ynë i parë i pjesëmarrjes në Lojërat Olimpike është zhvillimi i frymës olimpike dhe shpirtit sportiv të Kinës dhe paraqitja e moralit të mirë të sportistëve, duke përfshirë edhe luftën kundër përdorimit të drogës. Së dyti është përpjekja për rezultat të mirë. Së treti, nëpërmjet përgatitjes dhe organizimit të Lojërave Olimpike, të forcohen shkëmbimet miqësore me vende e rajone të tjera të botës. Së katërti, nëpërmjet Lojërave Olimpike, të nxitet zhvillimi i sporteve në masat popullore."

Cui Dalin është i bindur se banorët e thjeshtë kinezë nuk do të vlerësojnë paraqitjen e sportistëve kinezë vetëm me numrin e medaljeve të arta.

"Numri i medaljeve të arta nuk është i vetmi standard. Mendoj se ajo që do t'i kënaqë kinezët e thjeshtë është se sa do të tregohen këmbëngulës dhe do të përpiqen me të gjitha forcat sportistët tanë në fushat sportive, edhe sikur ata do të humbin në gara." (Wang Lei)