Albumi i 3-të i këngëtares së re kineze Li Qiong me titull "Ndjenjat për malet e lumenjt" me stilin muzikor të freskët e të natyrshëm është pritur ngrohtësisht nga muzikëdashësit. Së pari do të dëgjojmë së bashku këngën "E kam shtëpinë në malësi".

Tekstin e këngës "E kam shtëpinë në malësi" e ka shkruar Shi Huangyuan, ndërsa muzikën e ka krijuar Liu Wuhua. Li Qiong me zërin e saj kumbues e të ëmbël përshkruan figurën e një vajze malësore naive dhe të gjallë, duke sjellë dëgjuesit në malësi me retë e bardha dhe me peizazh të bukur.

Li Qiong ka lindur në qytetin Wuhan të provncës Hubei të Kinës qendrore dhe që në vogli i pëlqente të këndonte. I ati, aktori i një teatri që vuri re talentin e saj të këndimit, filloi të ftonte mësues të muzikës vokale për ta mësuar, e shoqëroi atë në pjesëmarrjen e shfaqjeve dhe konkurseve të ndryshme, në mënyrë që vajza e tij të kishte më shumë mundësi të demonstronte talentin e saj. Më vonë Li Qiong u pranua në Ansamblin Artistik të Policisë të provincës Hubei, duke u bërë një këngëtare soliste. Në vitin 1998, ajo mori pjesë në Konkursin e 8-të të këngëtarëve të rinj të Televizionit Qendror dhe fitoi çmimin e posaçëm duke kënduar këngën "Sansia, vendlindja ime". Në vitin 1999, në mbrëmjen artistike të Televizionit Qendror të organizuar me rastin e Festës së Pranverës ajo këndoi këngën me stilin malësor "Rruga malësore ka 18 kthesa". Teknika e saj e këndimit dhe stili i saj i natyrshëm e i thjeshtë u vlerësua lart nga spektatorët, dhe qysh nga ajo kohë të gjithë e mbajnë mend këtë vajzë të vogël që këndon këngët malësore.

Kënga që ndoqët titullohet "Sansia, vendlindja ime", kënduar nga Li Qiong. Sansia ndodhet në qytetin Chonqing dhe në provincën Hubei dhe përbëhet nga grykat Qutangxia, Wuxia dhe Xilingxia. Atje ka panorama shumë të bukura dhe madhështore, dhe jetojnë banorët e kombësive tujia, hane etj. Kjo këngë që këndohet në dialektin e kombësisë Tujia shpreh dashurinë e banorëve të zonës Sansia për vendlindjen. Në këngë thuhet: "Dielli lind në këtë vend, hëna pushon në këtë vend, burrat i merr malli për këtë vend, ndërsa gratë ëndërrojnë këtë vend. Oh, Sansia, vendlindja ime."

Kënga që sapo ndoqët "Sansia, vendlindja ime" është nga albumi i Li Qiongut me titull "Ndjenjat për malet e lumenjt". Në këtë album janë përfshirë 11 këngë popullore të stileve të ndryshme. Li Qiong dhe bashkëpunëtorët e saj shkuan në Mongolinë e Brendshme, Tibet, Singjiang, Hubei, Yunnan dhe në mbi 10 provinca, qytete e rajone autonome për të mbledhur këngë popullore. Pas rikrijimit këto këngë kanë marrë ngjyrë të re. Në këtë album janë futur elemente muzikore të kombësive nasi, taj, mongole, tibetiane, ujgure etj., duke u formuar një shije e veçantë e kombinimit të konceptit modern artistik me formën tradicionale artistike.

Nga ky album le të shijojmë tani këngën tjetër të stilit mongol me titull "Vendlindja e reve të bardha". Kjo këngë me melodi të rrjedhshme dhe të lartë shpreh dashurinë e banorëve të stepës për vendlindjen. Përdorimi i veglës muzikore mongole me tela matouqin i ka shtuar këngës karakteristika të theksuara të kombësisë. Në këngë thuhet: "Qielli është i lartë e toka është e gjerë. Në kupën e kaltër qiellore valëviten retë e bardha. Kullotat e bukura dhe stepa e pafund janë vendlindja e reve të bardha."

Në fund të programit të sotëm do të shijojmë së bashku nga albumi i 3-të i Li Qiongut këngën e stilit ujgur me titull "Nuk mund mos të dua". Timbri lirik e i shtruar i këngëtares Li Qiong shpreh plotësisht krenarinë rinore dhe dashurinë për jetën. Veglat muzkore me karakteristika të kombësisë dongbula, revapu dhe daulle dore që e shoqërojnë këngën na japin mundësi të ndjejmë karakterin entuziast dhe të çiltër të banorëve të pakicave kombëtare të Singjuangut. Le ta dëgjojmë.(Pina)