Farmaceutika tradicionale kineze u zhvillua qysh në lashtësinë e largët. Në historinë mijëra-vjeçare të farmacutikës kineze, lindën mjaft mjeshtër të shquar farmacistë. Një prej tyre ishte edhe Li Shi-zhen, i cili konsiderohet në arenën ndërkombëtare si dijetar i shquar i shkencave natyrore.

Li Shi-zhen lindi në vitin 1518 të erës sonë në provincën Hubei të Kinës Jugore. Vendlindja e tij ka qenë një zonë me peizazh të bukur të maleve plot me gjelbërime dhe me ujë të kulluar. Atje rriteshin bimë të shumëllojshme që mund të përdoren për barna mjekësore. Gjyshi dhe babai i tij ishin mjekë. Kur ai ishte i vogël, babai e merrte shpesh për të vjelë barna në male dhe i mësonte njohuri për barna. Kështu, Li Shi-zhenit i lindi pak nga pak interesi i madh për farmaceutikën tradicionale kineze. Më vonë, duke mësuar nga i ati përvojën klinike, ai lexoi libra klasike të mjekësisë, të trashëguara nga paraardhësit, si "Libri mbi sëmundjet e brendshme", "Teoria mbi tifon", "Libri mbi barnat" etj. Me ndihmën e të atit, Li Shi-zhen përparoi shpejt në mjekësi dhe, kur mbushi të 22-tat, filloi zyrtarisht të mjekojë të sëmurët.

Me ngritjen e pandërprerë të nivelit të tij mjekësor dhe me rritjen e famës së tij, krahas mjekimit të banorëve të thjeshtë, Li Shi-zhen ftohej për mjekim edhe në oborrin perandorak. Meqenëse ai shëroi mjaft të sëmurë që vuanin nga sëmundje të vështira, perandori i dinastisë Ming e emëroi atë "Feng Ci Zheng", që do të thotë zyrtar perandorak i mjekësisë. Krahas punës në oborrin perandorak, ai vazhdoi të mjekonte edhe qytetarët e thjeshtë.

Gjatë gjithë jetës së tij, Li Shi-zhen shkroi shumë vepra teorike, si "Mbi pulsin e njeriut" dhe "Diagramet e 5 organeve të brendshme të njeriut". Është për të ardhur keq se disa prej tyre kanë humbur, por vepra e tij më e njohur "Shpjegimi i hollësishëm i barnave mjekësore" është ruajtur e plotë. Atij iu deshën afro 30 vjet për të shkruar dhe redaktuar këtë vepër të madhe, që është kristalizimi i arritjeve të korrura në bazën e përgjithësimit të përvojës së tij dhe të tezave të paraardhësve. Në këtë libër, që ndahet në 52 kapituj, përfshihen shpjegimet e hollësishme të 1892 lloje barnash mjekësore, nëdr të cilat 1195 lloje janë lëndë bimore, kurse të tjerat janë lëndë shtazore dhe minerale. Bashkëngjitur me to, në këtë libër janë përfshirë edhe 11096 receta dhe 1160 vizatime të bimëve mjekësore. Në të shënohen edhe vendet ku rriten bimë mjekësore, pamjet e këtyre bimëve mjeklsore, metoda e kultivimit dhe vjeljes së tyre dhe funksionet e tyre.

Li Shi-zhen ishte një nga dijetarët më të mëdhenj të shkencave natyrore në historinë kineze. Krahas mjekësisë, ai korri suksese të shkëlqyera edhe në fushat kimike, gjeologjike, astronomike dhe meteorologjike. Ai vdiq në vitin 1593, në moshën 75 vjeçare. Pak kohë pas vdekjes së tij, vepra e tij e pavdekshme "Shpjegimi i hollësishëm i barnave mjekësore" u botua publikisht dhe u përhap shpejt në Japoni. Dijetarët e qarqeve mjekësore japoneze e përkthyen në gjuhën japoneze dhe e botuan në Japoni. Më vonë, ajo u përkthye edhe në gjuhët latine, gjermane, franceze, angleze, ruse e të tjera dhe u përhap në mbarë botën dhe u quajt "Vepra monumentale e mjekësisë së Lindjes". (Zheng)