dëgjoni

Profesorin Yuan e quajnë "ambasadori i portreteve", sepse gjatë mbi 10 vjetëve, ai ka vizatuar portretet e 152 politikanëve të famshëm të mbarë botës duke përfshirë sekretarin e përgjithshëm të OKB-së Kofi Anan, ish-kryetarin e Komitetit Olimpik Ndërkombëtar Samaranç, ish-presidentin e Afrikës së Jugut Mandela, ish-presidentin e Rusisë Jelcin, ish-sekretarin amerikan të shtetit Kisinger, ish-kryeministrin e Malajzisë Mahatir etj. Njëkohësisht ai ka bërë skulpturat e mbi 50 personaliteteve historike të mbarë botës. Veprat e profesorit Yuan janë përshëndetur gjerësisht nga miqtë e huaj dhe ai ka fituar medaljet më të larta të nderit nga dhjetëra vende. Në korrik të vitit të kaluar, Ministria e Kulturës e Polonisë i dha profesorit Yuan medaljen e kulturës polake ndërsa në shkurt të këtij viti, Rusia i dha atij titullin e akademikut të nderit të Institutit Studimor të Artit të Rusisë.

Profesori Yuan i tha gazetarit se në vitin 1991, ai filloi të vizatojë portretet e politikanëve ndërkombëtarë dhe të bëjë skulpturat e personaliteteve historike. Ai shprehu shpresën se veprat e tij mund të shtojnë njohuritë kulturore të njerëzve. Ai tha:

"Në disa parqe të Pekinit ka skulptura të miat të personaliteteve historike që kanë tërhequr shumë vizitorë. Jam i mendimit se nëpërmjet veprave të mia, ata mund të njohin meritat e personaliteteve historike duke marrë shumë njohuri historike e kulturore."

Në parkun Chaoyang në lindje të Pekinit ka një galeri artesh që quhet Jingtai. Kjo galeri u krijua në vitin 1998 nga profesori Yuan. Tani ajo është muzeumi më i madh privat në Kinë dhe ka organizuar mbi 100 aktivitete kulturore ndërkombëtare.

Yuan Xikun ka lindur në një familje artistësh. I ati Yuan Xiaocen është një piktor i famshëm. Kur ishte i vogël, Yuan Xikun vizatonte shpesh portrete. Pikturat e tij kanë stilin e ashpër kombëtar dhe karakteristikat e pikturave perëndimore në bojë vaji. Specialistët perëndimorë i quajnë pikturat e tij "Piktura kineze në bojë vaji". Në vitin 2000, Yuan Xikun zhvilloi me sukses një ekspozitë pikturash në selinë e përgjithshme të OKB-së në Nju Jork dhe në Muzeumin e Berlinit në Gjermani duke ngjallur jehonë të madhe.

Për të dhënë kontributin e vet për Lojërat Olimpike të Pekinit, Yuan Xikun propozoi të zhvillohet "Konkursi i skulpturave të Lojërave Olimpike të Pekinit të vitit 2008" dhe u bë shefi i Komisionit organizator të këtij konkursi. Profesori Yuan është i mendimit se sporti mund të shpërfaqë plotësisht forcën e vet. Ai tha:

"Lojërat Olimpike të vitit 2008 i përkasin jo vetëm Pekinit dhe popullit kinez, por edhe tërë botës. Shpresoj se konkursi i skulpturave do të përhapë shpirtin olimpik në mbarë vendin me qëllim që njerëzit e krahinave të ndryshme të ndajnë bashkërisht gëzimin e Lojërave Olimpike."

Konkursi i skulpturave të Lojërave Olimpike të vitit 2008 filloi në gusht të vitit të kaluar. Deri tani janë mbledhur mbi 2400 vepra nga 84 vende e rajone të botës. Ndër këto vepra, komisioni organizator ka zgjedhur mbi 300 më të mirat që përfaqësojnë nivelin më të lartë botëror. Sipas planit të profesorit Yuan, me veprat e zgjedhura do të zhvillohen së pari ekspozita në Kinës, pastaj në vende të ndryshme të botës. Deri tani, 23 qytete në mbarë botën kanë paraqitur kërkesën për zhvillimin e ekspozitës. Profesori Yuan shprehu besimin e plotë për këtë ekspozitë ndërkombëtare. Ai tha?

"Këtë veprimtari e vlerësuan lart ish-kryetari i Komitetit Olimpik Ndërkombëtar Samaranç dhe Komiteti Organizator i Lojërave Olimpike të Pekinit. Shumë vende kanë shprehur përkrahjen ndaj ekspozitës. Jam i bindur se ekspozita do të ketë sukses."

Profesori Yuan u shpreh se në të ardhmen, ai do të japë kontributin më të madh në çështjen e mirëqenies publike. (Fani)