Dëgjoni

Në Kinë, romani klasik "Tri perandori" është një vepër e njohur për të gjithë, madje edhe nga fëmijët e vegjël. Gjatë rreth 7 shekujve të kaluar, kjo vepër u ka pëlqyer lexuesve dhe ka qenë gjithmonë objekt studimi për shumë dijetarë. Autori i këtij romani është Luo Guan-zhong, shkrimtar kinez i shekullit të 14-të të erës sonë.

Qysh në fëmijëri, Luo Guan-zhong kishte prirje për të lexuar, sidomos ai ishte shumë i dhënë pas leximit të veprave klasike. Kjo e ndihmoi atë për të hedhur një bazë të shëndoshë të krijimtarisë letrare. Ai jetoi në kohën e dinastisë Juan, një kohë plot me kontradikta klasore dhe nacionale, që ishin të acaruara dhe të ndërlikuara për shkak të sundimit barbar me presion të lartë të regjimit të dinastisë Juan, gjë që ngjalli rezistencën e masave popullore. Si pasojë, shpërtheu kryengritje fshatare në shumë krahina. Edhe i riu Luo Guan-zhong u hodh në radhët e kryengritësve dhe u bë një oficer. Ai pati ambicie të madhe politike dhe ëndërronte të bëhej perandor në mes të rrëmujëve. Mirëpo Zhu Juan-zhang, që ishte udhëheqësi i një fraksioni të kryengritësve, fitoi mbi të gjithë kundërshtarët e tij, themeloi dinastinë Ming dhe u shpall perandor. Luo Guan-zhongut, duke parë se ambicia e tij politike për t'u bërë perandor kishte dështuar, u vendos në një zonë të qetë dhe filloi krijimtarinë letrare. Ai vendosi të krijonte një roman me temë historike, për të trajtuar jetën politike të periudhës nga viti 184 deri në vitin 280 të erës sonë, dhe ia vuri emrin romanit të tij "Tri perandori".

Luo Guan-zhong grumbulloi një sasi të madhe materialesh historike, prozash, lengjendash, tregimesh historike jozyrtare dhe gojëdhënash popullore dhe, duke i lidhur ato me ambicien e tij politike dhe me jetën e tij në luftën e kryengritësve, ritregoi në mënyrë të gjallë historinë e luftës politike dhe ushtarake midis tri perandorive Vei, Shu dhe Vu, që ishin tri regjime të krijuara pas përfundimit të dinastisë Han Lindore.

Arritjet artistike të romanit "Tri perandori" janë të shumanshme. Duke përshkruar një sërë ngjarjesh tronditëse të luftës politike dhe ushtarake, autori përdori mjete të ndryshme artistike dhe skaliti me sukses një numër figurash historike. Ai përshkroi me forcë të përqendruar dhjetëra figura me karakter të theksuar ndër më shumë se 400 personazhet e këtij romani.

Romani "Tri perandori" është jo vetëm një vepër me vlerë të madhe letrare, por edhe një vepër enciklopedike e shoqërisë feudale kineze, ku përshkruhen aspekte të shumta të shoqërisë së atëhershme. Gjithnjë e më shumë specialistë dhe dijetarë kinezë studiojnë këtë vepër të madhe, duke kërkuar në thellësi vlerën e tij kulturore dhe rëndësinë e tij reale në prizmat e shumta, si ato historiografike, të teorisë së talentit, studimeve psikologjike, teorisë së marrëdhënieve komunale, teorisë strategjike, teorisë së administrimit, artit ushtarak, teorisë së krijimtarisë artistike, të etikës etj. Romani "Tri perandori" u ka pëlqyer edhe popujve të vendeve të tjera të botës. Ai është përkther në shumë gjuhë të vendeve të tjera, është përhapur në gjithë botën dhe vlerësohet si "një kryevepër që gëzon me të vërtetë popullaritet". (Zheng)