dëgjoni

Sivjet është 15-vjetori i vendosjes së marrëdhënieve diplomatike midis Kinës dhe Koresë së Jugut, si edhe "Viti i shkëmbimeve kino-jugkoreane". Vizita e kësaj here e 200 drejtorëve të shkollave fillore dhe të mesme në Kinë është një nga aktivitetet e rëndësishme të shkëmbimeve dhe bashkëpunimit në mësimdhënien gjuhësore të përcaktuara nga qeveria kineze dhe qeveria jugkoreane.

Sipas statistikave, në më se 200 shkolla të larta të Koresë së Jugut është vendosur lënda e mësimit të gjuhës kineze. Edhe numri i studentëve kinezë në Korenë e Jugut dhe i atyre jugkoreanë në Kinë është më i madh. Përfaqësuesi i Ministrisë së Arsimit dhe të Burimeve Njerëzore të Koresë së Jugut, z. Sin In Chul, tha se kontaktet midis personave të të dy vendeve janë të shumta, popujt e të dy vendeve kënaqen së bashku me veprat kulturore, si filmat artistikë dhe televizivë. Aktivitetet e "Urës së gjuhës kineze" do të shtojnë më tej mirëkuptimin ndërmjet të dy popujve dhe do të zgjerojnë më tej fushat e bashkëpunimit. Këshilltari i arsimit i ambasadës së Koresë së Jugut në Kinë Eun Hee-Shin tha :"Më mirë të shohim një herë sesa të dëgjojmë njëqind herë. Informatat që kemi marrë mbi Kinën nga librat apo televizioni janë me disa përmbajtje keqkuptimi. Me këtë rast, të gjithë do të ndreqim keqkuptimet e kaluara për Kinën dhe dua që nëpërmjet këtyre aktiviteteve, t'u transmetojmë nxënësve ato që kemi parë me sytë tanë dhe gjendjen e tanishme të zhvillimit të Kinës".

Me ardhjen e epokës së ekonomisë së inteligjencës dhe të globalizimit ekonomik, kontaktet midis Kinës dhe vendeve të ndryshme të botës po shtohen gjithnjë e më shumë. Në fjalimin e mbajtur në konferencën e kryetarëve me rastin e 60-vjetorit të krijimit të OKB-së, kryetari i shtetit i Kinës Hu Jintao vuri në dukje: "Krijimi i qytetërimeve të ndryshme dhe i një bote të harmonishme është dëshira e përbashkët e popujve të vendeve të ndryshme. Vetëm duke u shtuar shkëmbimet, duke marrë nga njëri-tjetri të mirat, popujt me kultura të ndryshme mund të zhdukin dyshimet dhe dallimet dhe ta bëjnë njerëzimin më të harmonishëm dhe botën më shumëngjyrëshe"

Qeveria kineze i kushton një rëndësi të madhe mësimdhënies së gjuhëve të huaja. Qysh nga viti i 3-të i shkollës fillore deri në shkollat e larta, të gjithë nxënësit dhe studentët mësojnë anglishten. Tani numri i nxënësve dhe studentëve që mësojnë anglishten i ka kaluar 200 milionët. Gjithashtu në Kinë ka më se një mijë shkolla që kanë vendosur lëndën e gjuhës jugkoreane. Kultura jugkoreane mirëpritet shumë në gjirin e të rinjve.

Krahas entuziazmit të botës për t'u njohur me Kinën, edhe historia e lashtë dhe kultura e shkëlqyer e Kinës janë bërë gjithnjë e më tërheqëse. Sipas statistikave, tani, përveç Kinës, në botë numri i studiuesve të gjuhës kineze ka arritur në më se 30 milionë dhe në mbi 2500 shkolla të larta të më se 100 vendeve jepet mësimi i gjuhës kineze. Në vitin 2004 u krijua në Seul shkolla e parë e Konfucit në botë. Shkolla e Konfucit është emërtuar me emrin e mësuesit më të njohur në Kinë, Konfucit. Tani shkolla të tilla janë hapur në më se 50 vende dhe numri i tyre ka arritur në 100.

Në pritjen për nder të mysafirëve të ardhur nga SHBA-ja dhe Koreja e Jugut, ndihmësi i ministrit të Punëve të Jashtme të Kinës, z. Kongquan, tha: "Çështja e përhapjes së gjuhës kineze në arenën ndërkombëtare ka plotësuar jo vetëm kërkesën e popujve të vendeve të ndryshme të botës për t'u njohur me Kinën, por edhe kërkesën e tyre për forcimin e mëtejshëm të kontakteve me popullin kinez. Ne shpresojmë nga zemra që ju të shpini në vendin tuaj njohuritë mbi kulturën dhe historinë kineze dhe ndjenjat e miqësisë të popullit kinez për vendin tuaj, si dhe të ngjallni interesin e të rinjve amerikanë dhe jugkoreanë për të mësuar gjuhën kineze, në mënyrë që ata të njihen me thelbin e kulturës kineze, që është për paqen dhe harmoninë, dhe t'i përgatitni ata si të dërguar të kontakteve miqësore kino-amerikane dhe kino-jugkoreane".(Zhai)