dëgjoni

Me ftesën e zyrës së grupit drejtues shtetëror të Kinës për përhapjen e gjuhës kineze, kohët e fundit erdhën për vizitë në Kinë l000 drejtues të shkollave fillore dhe të mesme dhe funksionarë të arsimit të SHBA-së dhe të Koresë së Jugut për të krijuar një platformë të shkëmbimeve shkollore dhe për të zhvilluar bashkëpunimin në mësimdhënien e gjuhës kineze. Këto aktivitete quhen "Ura e gjuhës kineze" dhe janë programi i shkëmbimeve arsimore me përpjesëtimet më të mëdha midis Kinës dhe vendeve të huaja.

Zyra e grupit drejtues shtetëror të Kinës për përhapjen e gjuhës kineze organizoi në Pallatin e Madh të Popullit në Pekin një ceremoni solemne përshëndetjeje me rastin e ardhjes për vizitë në Kinë të drejtorëve të shkollave fillore dhe të mesme amerikane dhe jugkoreane. Në ceremoni ishin të pranishëm funksionarë të Ministrisë së Arsimit e të Ministrisë së Punëve të Jashtme të Kinës dhe përfaqësues të titullarëve diplomatikë të SHBA-së dhe të Koresë së Jugut në Kinë.

Duke mbajtur fjalën e rastit, ministri i Arsimit i Kinës z. Zhou Ji tha se "Vitet e fundit, në SHBA dhe në Korenë e Jugut ka shpërthyer një vrull për të mësuar gjuhën kineze dhe për t'u njohur me Kinën. Zhvillimi me shpejtësi i mësimdhënies së gjuhës kineze është jo vetëm kërkesë e hapjes së mëtejshme të Kinës dhe e thellimit të lidhjeve dhe kontakteve të Kinës me botën e jashtme, por është gjithashtu edhe kërkesë për njohjen e botës me Kinën dhe forcimin e shkëmbimeve të botës me Kinën në fushat ekonomike, kulturore e arsimore".

Siç mësohet, kjo vizitë e drejtorëve në Kinë është organizuar bashkërisht nga zyra e grupit drejtues shtetëror të Kinës për përhapjen e gjuhës kineze, Këshilli i Shkollave të Larta i SHBA-së dhe Ministria e Arsimit dhe e Burimeve Njerëzore e Koresë së Jugut. Këta l000 drejtorë të shkollave fillore dhe të mesme kanë ardhur përkatësisht nga 45 shtete amerikane dhe l6 qytete e provinca të Koresë së Jugut. Kjo është vizita me përmasat më të mëdha e drejtorëve të shkollave fillore dhe të mesme të vendeve të huaja në Kinë. Gjatë vizitës njëjavore, përveç vizitës në ekspozitën e lëndëve mësimore të gjuhës dhe kulturës kineze, pjesëmarrjes në leksionet e gjuhës dhe kulturës kineze, delegacioni shkoi edhe në l8 provinca të Kinës për të njohur në thellësi gjuhën dhe kulturën kineze, për të zhvilluar shkëmbime me shkollat fillore dhe të mesme krahinore dhe për të diskutuar me ta për krijimin e mekanizmave të bashkëpunimit të mësimdhënies së gjuhës kineze.

Funksionari i lartë i çështjeve publike i ambasadës së SHBA-së në Kinë, z. Patrick Corcoran, tha: "Tani shumë të rinj amerikanë kanë filluar të mësojnë gjuhën kinezë, për t'u njohur me kulturën e pasur tradicionale kineze. Njohja reciproke midis Kinës dhe SHBA-së është shumë e rëndësishme. Në shumë vende ka filluar të përhapet studimi i gjuhës kineze. Jam shumë i kënaqur që pashë kaq shumë drejtorë të shkollave amerikane të marrin pjesë në këtë aktivitet. Kjo është një punë shumë e rëndësishme".

Z. Patrick Corcoran tha se Ministria amerikane e Arsimit po bashkëpunon me zyrën e grupit drejtues shtetëror të Kinës për përhapjen e gjuhës kineze, duke krijuar një soft të mësimdhënies "Programi elektronik i gjuhës", për të nxitur të rinjtë kinezë dhe amerikanë të mësojnë gjuhën e njëri-tjetrit.

Sipas statistikave, në më se 800 shkolla të larta të SHBA-së janë krijuar degë të gjuhës kineze dhe në shumë shkolla të mesme është vendosur lënda mësimore e gjuhës kineze. Në qershor të vitit të kaluar, 400 drejtorë të shkollave fillore dhe të mesme amerikane erdhën për vizitë në Kinë. Pas vizitës, më se 50% e shkollave të këtyre drejtorëve vendosën lëndën mësimore të gjuhës kineze.

Nënkryetari i Këshillit të Shkollave të Larta të SHBA-së, z. Peter Negroni, tha: "Vetë jam pedagog gjuhe dhe e kuptoj mirë se gjuha është një mjet për të njohur botën. Mësimi i kulturës dhe i gjuhës së një vendi është e vetmja rrugë për krijimin e marrëdhënieve të gjata paqësore. Shkollat duhet të frymëzojnë interesin e nxënësve, që ata të interesohen për kulturën dhe gjuhën e vendeve të tjera".

Z. Peter Negroni tha se këta drejtorë shkollash janë përfaqësues të qarqeve arsimore të SHBA-së, janë informatorë të shkëmbimeve gjuhësore kino-amerikane. Ata do të nxisin më tej nxënësit e shkollave fillore dhe të mesme amerikane në studimin e gjuhës kineze, në mënyrë që populli kinez dhe populli amerikan ta njohin njëri-tjetrin brez pas brezi. ( Zhai)