dëgjoni

Zheng Hë lindi në vitin 1371 në një familje të kombësisë Hui të provincës Junan të Kinës Jugperëndimore. Gjyshi dhe babai i tij ishin besimtarë të devotshëm të islamizmit dhe kishin qenë për pelegrinazh në Meka. Ata njihnin mirë vendet e largëta dhe kishin guxim për të bërë ekspeditë.

Zheng Hë e kishte emrin e tij origjinal Ma San-bao. Kur ishte 10 vjeç, ai u bë eunuk dhe filloi t'i shërbente perandorit Zhu Di të dinastisë Ming. Për të kujtuar fitoren e tij në betejën në fshatin Zheng, që ishte fitorja e tij e parë në luftën për marrjen në dorë të fronit perandorak, Zhu Di e ndërroi emrin e eunukut të tij të vogël Ma San-bao me emrin "Zheng Hë".

Në epokën kur jetoi Zheng Hë, kinezët e besonin se Kina ishe qendra e gjithë botës dhe e konsideronin perandorin kinez si udhëheqës edhe për vendet e tjera. Kur Zheng Hë ishte 34 vjeç, perandori Zhu Di vendosi që Zheng Hë të bënte udhëtime oqeanike drejt perëndimit duke prirë një flotë anijesh, me qëllim që të demonstronte potencialin e vendit të tij.

Vendnisja e flotës së Zheng Hë-së ishte qyteti Nankin në bregun e lumit Jance, lumi më i madh në Kinë, ku ndërtimi i anijeve kishte qenë industria tradicionale e asaj zone. Sipas të dhënave historike, asokohe ekzistonin rreth qytetit Nankin 34 kantiere të ndërtimit të anijeve, ku ishin përqendruar mjeshtrit më të mirë të vendit, që përfaqësonin nivelin më të lartë të industrisë së ndërtimit të anijeve asokohe në botë. Anija me emërtimin "Margaritar", që e përdori Zheng Hë në udhëtimin e parë oqeanik, ishte ndërtuar pikërisht në Nankin. Anija më e madhe në flotën e tij ishte një mijë-tonëshe dhe ishte anija më e madhe oqeanike në botë.

Flota e Zheng Hë-së përbëhej me dhjetëra anije dhe numri i marinarëve të anijeve arrinte në 20 mijë veta, të marrë së bashku. Anijet ngarkoheshin me produkte karakteristike kineze, si pëlhura të mëndafshta, enë porcelani dhe mallra të punimeve artistike. Sa herë që flota e tij mbërrinte në një vend, Zheng Hë lexonte para publikut mesazhin e perandorit kinez drejtuar atij vendi mikpritës, i dorëzonte mbretit të tij dhurata të ndryshme dhe u propozonte zyrtarëve vendas që të bënin vizitë në Kinë. Brenda 28 vjetëve, ai bëri 7 herë udhëtime oqeanike drejt perëndimit.

Flota e Zheng Hë-së kishte qenë në mbi 30 vende dhe rajone të Azisë dhe të Afrikës, duke mbërritur në detin e Kuq dhe në bregun lindor të Afrikës. Me udhëtimet e tij oqeanike, kinezët thyen izolimin gjeografik me botën e jashtme, zgjeruan honrizontin e tyre të shikimit dhe pasuruan njohuritë e tyre gjeografike. Zheng Hë bëri këto udhëtime oqeanike gjysmë shekull më herët se Kristofer Kolumbu.

Pas vdekjes së Zheng Hë-së, perandori kinez i brezit të ri nuk pati interes për një gjë të tillë dhe çështja kineze e lundrimit oqeanik ra menjëherë.

Në vitin 2005, në kuadrin e 600-vjetorit të udhëtimeve oqeanike të Zheng Hë-së drejt perëndimit, në mbarë Kinën u organizuan një sërë aktivitetesh të rëndësishme për kujtimin e kontributit të tij në çështjen botërore të lundrimit dhe në shkëmbimet miqësore midis popullit kinez dhe popujve të vendeve të tjera të botës. (Zheng)