Meqë Kina dhe Japonia janë dy vende të fuqishme aziatike në sport, rivalizimi midis tyre gjithmonë ka qenë gjithmonë tema kryesore e fjalëve në qarqet sportive aziatike. Megjithatë, të dy vendet fqinje kanë një histori të gjatë shkëmbimesh dhe ndihme midis njëri-tjetrit në fushën sportive. Vitet e fundit, Shoqata Japoneze e Bejsbollit Profesionist u ka ofruar qarqeve kineze të bejsbollit përkrahje të madhe në teknikë, fonde dhe organizimin e ndeshjeve, duke dhënë kontribut për ngritjen e nivelit të bejsbollistëve kinezë dhe për popullarizimin e këtij sporti. Dëgjoni tani më hollësisht korrespondencën tonë.

Qysh nga viti 2002, Kina provon të zhvillojë kampionatin profesionist të bejsbollit. Për arsye se kampionati profesionist ka filluar shumë vonë, numri i bejsbollistëve profesionistë është shumë i kufizuar dhe skuadra kineze e bejsbollit ka një nivel të ulët në krahësim me skuadrat japoneze, jugkoreane dhe skuadrën e Tajvanit kinez.

Por në Japoni, bejsbolli i pëlqen shumë popullit. Kampionati i bejsbollit profesionist ka një histori mbi 70 vjeçare. Në Kampionatin e Bejsbollit Klasik Botëror, me nivel më të lartë, skuadra japoneze fitoi titullin e kampiones.

Vitet e fundit, qarqet kineze të bejsbollit po mësojnë aktivisht nga përvoja e suksesit të Japonisë. Si një vend i fuqishëm i bejbollit në botë, Japonia u ofroi qarqeve kineze të bejsbollit përkrahje dhe ndihmë të madhe në teknikë, fonde etj. Duke filluar nga viti 2002, skuadrat kombëtare dhe profesioniste kineze shkojnë çdo vit për stërvitje në Japoni.

Sivjet, klubi i fortë profesionist kinez "Luani" i Tianjin-it ka ftuar zotin Kosuke Matsuoka si trajner për taktikën e mbrojtjes nga klubi japonez "Yokohama Besutazu". Ngritja e nivelit teknik nuk mund të realizohet brenda një kohe të shkurtër, megjithatë, puna e zotit Kosuke Matsuoka është aprovuar nga kryetrajneri i skuadrës së Tianjin-it, Jiao Yi.

"Më duket se zoti Kosuke Matsuoka ka diçka të re në stërvitje. Suksesi kërkon një kohë të gjatë, megjithatë, sportistët tashmë kanë bërë përparim. Ata tregohen fort në pritjen e topit dhe zënien e pozicionit."

Pothuajse të gjitha skuadrat profesioniste kineze të bejsbollit kanë vendosur marrëdhënie të partneritetit dhe të bashkëpunimit teknik me ato japoneze. Çdo vit, ekipet japoneze ftojnë ekipet kineze për stërvitje dhe ndeshje në Japoni. Nëpërmjet një sërë shkëmbimesh teknike, të gjitha ekipet kineze të bejsbollit kanë ngritur nivelin e tyre. Kryetrajneri Jiao Yi shfaqi shpresën se këto bashkëpunime dhe shkëmbime do të vazhdojnë edhe në të ardhmen.

"Këto marrëdhënie pune duhet të vazhdojnë për një kohë të gjatë, sepse niveli i bejsbollistëve kineze është i ulët. Shpresoj se nëpërmjet këtij bashkëpunimi, bejsbolli i Tian Jin-it do të arrijë në një nivel të lartë."

Duke filluar nga sezoni i parë i kampionatit profesionist në Kinë, ndërmarrjet japoneze kanë dhënë ndihmë me fonde. Në vitin 2007, kompanitë japoneze "Canon" dhe "Mizuno" u bënë sponsorë të kampionatit kinez të bejsbollit profesionist, ndërsa disa kompani të tjera japoneze sponsorizuan klube profesionale të bejsbollit. Për organizimin e kampionatit, kompania japoneze "Soft Bank" përgjigjet për përhapjen e kampionatit, organizimin e ndeshjeve e të aktiviteteve me sportdashës etj.

Mund të thuhet se bashkëpunimi midis qarqeve kineze dhe japoneze të bejbollit është i gjithanshëm. Ky bashkëpunim do të zhvillohet më thellësisht. Një drejtues i Shoqatës Japoneze të Bejsbollit Profesionist, zoti Kazuo Hasegawa, u shpreh

"Tani po vendosim marrëdhënie të bashkëpunimit teknik ndërmjet ekipeve profesioniste kineze dhe japoneze. Vitin e ardhshëm, pas përfundimit të Lojërave Olimpike të Pekinit, do të marrim parasysh bashkëpunimin e gjithanshëm."

Duke folur për planin e vitit të ardhshëm, zoti Kosuke Matsuoka, i cili ka drejtuar ekipin e Tianjin-it për një sezon, u shpreh se atij i pëlqejnë të rinjtë kinezë që pëlqejnë bejsbollin. Ai dëshiron të japë kontributin e vet për çështjen e bejsbollit në Kinë.

"Nëse vitin e ardhshëm, ekipi i Tianjin-it dëshiron që unë të vazhdoj drejtimin e tij, do të pranoj me gjithë qejf. Edhe në të ardhmen, pasi të dal në pension nga ekipi "Yokohma Besutazu", dëshiroj të vij në Kinë për të dhënë kontributin tim, madje si një vullnetar." (Shy Guan)