Zhang Van-ven ka disa vjet që ka dalë në pension dhe ka mbushur të 67-tat, por në vend që të kalonte i lumtur pleqërinë e tij, ai mbetet entuziast i mësimdhënies falas në shtëpi të nxënësve të familjeve me vështirësi financiare.

Zhang Van-ven punoi si mësues për një kohë të gjatë. Fill pas diplomimit në vitin 1960 nga Universiteti Fudan i Shangait, ai punoi si një mësues i matematikës në qarkun autonom Gan-nan të kombësisë tibetiane të provincës Gansu. Më vonë ai u transferua në qytetin Lanzhou, kryeqendër e kësaj province, ku vazhdoi mësimdhënien e matematikës. Pasi doli në pension, ai nuk deshi të harxhojë kohën vetëm për pushim dhe argëtim, sepse ai gëzon ende shëndet të mirë dhe mund të shfrytëzojë njohuritë e veta për të ndihmuar të tjerët, sidomos për të ndihmuar nxënësit e familjeve me vështirësi ekonomike. Kështu ai filloi mësimdhënien falas në shtëpi.

Çdo javë, Zhang Van-ven shfrytëzon 4 mbrëmje për mësimdhënie. Për të lehtësuar punën e mësimdhënies, ai ka marrë me qira një dhomë si klasë dhe kjo dhomë është bërë si shkollë e përkohshme për mbi 10 nxënës. Një pjesë e madhe e këtyre nxënësve janë fëmijë të familjeve të varfra, prandaj ai nuk merr aspak shpërblim nga ata.

Zhang Van-ven filloi këtë punë para 4 vjetëve. Në atë kohë, ai shfrytëzonte shtëpinë e vet si klasë dhe i jepte nxënësit Vang Zhe mësim plotësues. Ai nxënës bënte një jetë të vështirë dhe mësonte në shkollë duke u mbështetur në rrogën e ulët të nënës së tij që punonte si shërbëtore në një apartament komunal, sepse i ati nuk jeton më. Më vonë Zhang Van-ven mori vesh se kishte edhe nxënës të tjerë si ky djalë. Gjendja e tyre e preku shumë Zhang Van-ven dhe atij i lindi dëshira për t'u dhënë nxënësve të tillë mësim plotësues pa shpërblim.

"Unë i kuptoj mirë këta nxënës, sepse edhe unë jetova në një familje me vështirësi, kur isha i vogël. Njeriu duhet të ketë ndjenja keqardhjeje për vështirësitë e të tjerëve. Nga ana tjetër, kur kam energji për të ndihmuar një nxënës, mund të ndihmoj edhe nxënësit e tjerë. Le të vijnë më shumë. Ardhja e disa të tjerëve nuk prish punë."

Puna e Zhang Van-venit dha fryt të shkëlqyer. Në saje të përvojës së tij shumë-vjeçare dhe të mëtodës së tij elastike, nxënësit që mësojnë tek ai kanë bërë përparim të dukshëm në mësim, madje disa prej tyre janë bërë nga nxënësit më të mirë të klasës së tyre. Mësuesi Zhang thotë se puna e mësuesve është për të edukuar njeriun dhe vlera e jetës së një mësuesi mishërohet në përparimin e nxënësve të tij.

"Unë jam i mendimit se niveli i punës së një mësuesi pasqyrohet tek nxënësit e tij. Kur nxënësit e ndokujt mësojnë shumë keq, ai nuk mund të vlerësohet si mësues i mirë."

Nxënësi Yu Gja është një djalë çapkën. Më parë, ai merrte shumë shpesh notë pakaluese në provime, kurse pas dy vjet mësimi tek mësuesi Zhang, ai bëri përparim të madh.

"Duke mësuar tek mësuesi Zhang, kuptova shumë gjëra që nuk i kisha kuptuar më parë. Prandaj kam bërë përparim të madh në mësim. Mësuesi Zhang është një njeri shumë i mirë. Shpesh herë ai blen pije freskuese për nxënësit që nuk kanë para. Nganjëherë ai ha bashkë me nxënësit."

Nxënësja Siao Siao, një vajzë simpatike, më parë nuk kishte interes për mësimin e matematikës. Kurse pas 3 vjet mësimi tek mësuesi Zhang, ajo jo vetëm ka bërë përparim në mësim, por është bërë një vajzë edhe me botë më të hapur.

"Mësuesi Zhang është njeri shumë i dashur. Kur mësoj tek ai, unë nuk ndiej ndonjë presion, sepse ai na jep një hapësirë të lirë. Ai duket si një mik i afrueshëm."

Shumë njerëz nuk e kuptonin mësuesin Zhang dhe pyesnin "Pse të lodhesh aq shumë tani në këtë moshë?" Edhe e shoqja dhe babai i tij mbi 90-vjeçar ankoheshin shpesh herë. Por ai vetë mendonte ndryshe dhe thoshte se është një gjë e vlefshme që t'u mësojë nxënësve njohuritë që i ka grumbulluar gjatë kaq shumë vjetëve të punës si mësues.

Kohët e fundit, Zhang Van-ven hartoi një plan të ri, sipas të cilit ai do të pranojë një numër nxënësish që janë të dobët në mësim dhe do t'u japë atyre mësim gjatë kohës së pushimeve verore, pa kërkuar asnjë shpërblim. Ai deshi që t'u mësojë atyre si të përvetësojnë njohuritë dhe si të rrisin interesin për të mësuar matematikën. Në këtë mënyrë, ky mësues pensionist punon me zell në rrugën e tij të mësimdhënies falas në shtëpi. Dëshira e tij e vetme është që t'u japë ndihmë sa më shumë nxënësve. (Zheng)