Ju flet Radio e Jashtme e Kinës! Të dashur dëgjues, unë jam Pina, po takohemi përsëri në programin e sotëm të muzikës kineze. Në këtë program do t'ju paraqit disa melodi të interpretuara me erhu nga instrumentistja e njohur kineze Min Huifen. Së pari do të dëgjoni melodinë "Ndarja në Yangguan".

Kjo melodi është përpunuar në bazë të një kënge të njohur të Dinastisë Tang mbi 1 mijë vjet më parë. Kjo melodi e thjeshtë, me patos e pak melankolike shpreh dashurinë dhe kujdesin për mikun që po largohet. Këtë melodi Min Huifeni e interpreton me ndjenja të thella dhe në mënyrë prekëse.

Në programin e kaluar ju tregova se Min Huifeni është instrumentiste e njohur në Kinë. Që në moshë të re ajo u bë e famshme në qarqet muzikore dhe dha shfaqje në shumë vende të botës, ku u mirëprit ngrohtësisht nga spektatorët. Por në vitin 1981, ajo u sëmur nga kanceri, e gjatë 5 vjetëve ajo bëri 6 operacione dhe 15 tkimioerapi. Ajo luftoi me këmbëngulje me sëmundjen dhe gjatë terapisë ajo ngulte këmbë të ushtrohej në veglën muzikore erhu, duke u përgatitur për t'u rikthyer në skenë. Në vitin 1987 ajo u rikthye në skenë, duke marrë pjesë në Festivalin e Parë Artistik të Kinës, në bashkëpunim me Orkestrën Qendrore të Kombësive. Interpretimi i saj i mrekullueshëm fitoi duartrokitje të ngrohta dhe të gjata. Që atëherë ajo aktivizohet gjithmonë në skenë, duke prekur çdo spektator me mjeshtërinë e saj artistike.

Melodia që ndoqët titullohet "Burimi dhe hëna". Këtë melodi e ka krijuar artisti i njohur popullor kinez Hua Yanjun. Nëpërmjet titullit "Burimi dhe hëna" kompozitori i çon dëgjuesit në një gjendje të qetë natën pranë burimit të kulluar nën hënën e ftohtë. Kur ndjek interpretimin e Min Huifenit, sikur dëgjon një artist të verbër këmbëngulës që po kallëzon jetën e tij të vështirë.

Vitet e fundit, Min Huifeni, për të përhapur aktivisht muzikën kineze, organizon shpesh koncerte në shkolla të mesme dhe të larta dhe ka gjetur jehonë të mirë në shoqëri. Në fund të programit të sotëm do të shijojmë së bashku melodinë "Dorëzojmë të gëzuar drithërat". Kjo melodi me fjalët e gjalla dhe të thjeshta muzikore përshkruan një tablo, ku fshatarët duke ngarë karrocën e ngarkuar me drithëra, shkojnë për të dorëzuar dhe shitur drithërat. Le ta dëgjojmë:

Ju flet Radio e Jashtme e Kinës! Të dashur dëgjues, dëgjuat disa melodi të interpretuara në veglën muzikore kineze erhu nga instrumentistja e njohur kineze Min Huifen. Mirudëgjofshim të shtunën tjetër. Në mikrofon për ju, Pina.