Guo Shou-gjing, që lindi në vitin 1231 në Singtai të provincës Hëbei të Kinës Veriore, punoi për një kohë të gjatë si funksionar i rëndësishëm në oborrin perandorak të dinastisë Juan dhe kjo gjë i dha atij rastin e volitshëm për të marrë pjesë në punën zyrtare për hartimin e një kalendari të ri.

Në Kinë, hartimi i kalendarit filloi shumë herët. Qysh në shekullin e parë të erës sonë, shkencëtari Liu Xin përpiloi një kalendar me emërtimin "Santong", që konsiderohet sot si një formë embrionale e kalendarit më të hershëm astronomik në botë. Para dinastisë Juan, dinastitë e periudhave të ndryshme respektuan shabllonin e kalendarit të hershëm, megjithëse bënë edhe disa ndryshime të vogla. Pasi mori përsipër detyrën e rihartimit të kalendarit, Guo Shou-gjing shprehu mendimin se vetëm duke bërë rivrojtime të kujdesshme të dukurive astronomike, mund të hartohej një kalendar relativisht i saktë. Ai bëri me duart e veta një kompleks aparatesh astronomike. Aparati me emërtimin "Gjian", që ishte njëri prej 13 aparateve të kompleksit, mund të përdorej për të vrojtuar me qartësi Diellin, Hënën dhe yjet. Ai propozoi që të bëheshin me ato aparate vrojtime astronomike në disa krahina të gjerësive të ndryshme gjeografike të Kinës. Qeveria e dinastisë Juan pranoi propozimin e tij dhe dërgoi disa zyrtarë që ta ndihmonin për ndërtimin e 27 stacioneve të vrojtimeve astronomike në mbarë vendin. Mbi bazë të rezultatit të vrojtimeve e tyre, astronomët kinezë me Guo Shou-gjing në krye bënë llogaritje të sakta për 4 vjet dhe në vitin 1280 të erës sonë hartuan një kalendar të ri, që u quajt "Kalendari Shoushi".

Ndryshe nga kalendarët e mëparshëm, në kalendarin Shoushi dita "Dongzhi", që është e 22-ta prej të 24 termave diellore sipas kalendarit kinez, ditë që bie zakonisht më 23 dhjetor sipas kalendarit ndërkombëtar, filloi për herë të parë të merret si pikënisje e llogaritjes së të dhënave astronomike, gjë që shtoi shumë saktësinë e të dhënave. Nga llogaritja me kalendarin Shoushi rezultoi se një vit ka 365.2425 ditë, shifër që ka një diferencë prej 26 sekondash me kohën e rrotullimit të Tokës rreth Diellit. Kjo shifër përputhet plotësisht me atë të kalendarit Gregorian që përdoret sot në botë. Por vlen të përmendet se kalendari Shoushi lindi 300 vjet më herët se kalendari Gregorian. Me kalendarin Shoushi mund të vrojtohen dhe të lajmërohen paraprakisht me saktësi edhe eklipsi i Diellit dhe elipsi i Hënës. Me hartimin e kalendarit Shoushi, zhvillimi i astronomisë së Kinës së lashtë u ngrit në kulm. Ai qe kalendari më i përparuar në Kinën e lashtë dhe u përdor për mbi 360 vjet. Ai u përhat edhe në Kore dhe Japoni.

Guo Shou-gjing, që jetoi 86 vjet, ishte edhe specialist në fushën matematike dhe hidraulike. Me veprimtarinë e tij shkencore, ai luajti një rol të madh shtytës për zhvillimin e shkencës në Kinën e lashtë. Për kujtimin e meritave të tij, organizata përkatëse ndërkombëtare e emërtoi një mal në formën e unazës në anën e prapme të Hënës si "Mali i Unazës Guo Shou-gjing" dhe e emërtoi planetin e vogël numër 2012 si "Planeti i Vogël Guo Shou-gjing". (Zheng)