Para disa kohësh, në Kinë filloi të zbatohet një plan i ri shtetëror i rritjes së rolit mbështetës të shkencës dhe teknikës në zhvillimin ekonomik dhe shoqëror. Parashikohet se do të investohen 30 miliardë juanë për zbatimin e këtij plani. Qeveria kineze shpreson që, me zbatimin e këtij plani, brenda disa vjetëve të ardhshëm të zgjidhen në mënyrë fillestare problemet e vështira në fushat e energjisë, të pasurisë natyrore dhe të mjedisit, që pengojnë zhvillimin ekonomik dhe shoqëror dhe që të ngrihet niveli tekniko-shkencor i shërbimit komunal. Për këtë foli anëtarja e Këshillit të Shtetit, zonja Çen Zhili.

"Hartimi dhe vënia në jetë e këtij plani kanë të bëjnë drejtpërdrejt me zhvillimin ekonomik dhe shoqëror. Me anë të zbatimit të këtij plani, vendi ynë do të kapërcejë vështirësitë në një numër teknologjish të rëndësishme të shërbimit komunal dhe teknologjish kyçe të industrisë së përgjithshme, do të fitojë një numër arritjesh të rëndësishme me patentat e veta dhe do të përgatitë një numër ndërmarrjesh me aftësi konkurruese në arenën ndërkombëtare, me qëllim që të zgjidhen problemet e vështira që pengojnë zhvillimin ekonomik dhe shoqëror."

Ky plan i ri u hartua mbi bazën e "planit shtetëror të kapërcimit të vështirësive në shkencë e teknikë". Duke filluar nga vitet 80 të shekullit të kaluar, në Kinë janë zgjidhur mjaft vështirësi në teknologji kyçe industriale dhe teknologji të përgjithshme, si në hibridizimin artificial të orizit, ndërtimin e veprës nyje hidraulike San-sia, ndërtimin e centralit elektrik bërthamor Çinshan dhe në fusha të tjera, gjë që ka sjellë dobi kolosale ekonomike dhe shoqërore.

Në kohën e tanishme, kur Kina ka hyrë në një etapë të re zhvillimi, na shtrohen përpara mjaft sfida serioze në lëmenjtë e energjisë, pasurisë natyrore, mjedisit, parandalimit e mjekimit të sëmundjeve epidemike, aftësisë konkurruese të ndërmarrjeve industriale, sigurimit publik etj. Prandaj, plani i mëparshëm nuk është më i përshtatshëm dhe qeveria kineze hartoi një plan të ri mbi bazën e tij, me qëllim që të përqendrohen burimet epërore tekniko-shkencore të mbarë vendit për mbështetjen e zhvillimit ekonomik dhe shoqëror. Drejtori i degës së planit të Ministrisë së Shkencës dhe Teknikës të Kinës, Vang Xiaofang thotë se ky plan i ri ka të bëjë me 11 fusha, si ato të bujqësisë, pasurisë natyrore, ndërtimit të makinerive etj. 350 objekte do të marrin përkrahje në saje të këtij plani. Ai thotë se tashmë është përcaktuar grupi i parë i këtyre objekteve.

"Në kuadrin e këtij plani përfshihen 147 objekte si objektet e para, për të cilat do të investohen 7 miliardë e 350 milionë juanë. Shpresohet se ky investim i dikasterit financiar qendror do të shtyjë ndërmarrjet industriale dhe sektorët e tjerë të dyfishojnë investimet e tyre."

Njëra prej këtyre objekteve është edhe eksperimentimi i pajisjes së ekzaminimit mjekësor me valë supersonike e tipit B dhe e shifrimit me ngjyra, që po zbaton Kompania Tianhuihua e Teknikës së Shifrimit në Pekin.

Përgjegjësi i kësaj kompanie, zoti Shen Gjanlei thotë se eksperimentimi i kësaj pajisjeje kërkon një investim prej 10 milionë juanësh dhe një eksperimentim i tillë, pa dyshim, ka rrezik të madh për një ndërmarrje të vogël siç është kompania Tianhuihua. Por, meqenëse eksperimentimi i kësaj pajisjeje tashmë është përfshirë në planin shtetëror të rritjes së aftësisë mbështetëse të shkencës dhe teknikës, ky objekt nuk është më çështje e një ndërmarrjeje.

Në planin shtetëror të ritjes së aftësisë mbështetëse të shkencës dhe teknikës, shfrytëzimi i pasurisë natyrore është një nga fushat e rëndësishme që do të përkrahet. Sipas këtij plani, deri në vitin 2010 do të zbulohen 3 a 4 baza të mëdha rezerva të mineraleve, rishfrytëzimi i ujit në prodhimin industrial do të arrijë në 80 % dhe do të kapërcehet vështirësia e teknologjisë kyçe të shfrytëzimit të ujit të detit.

Kërkimet tekniko-shkencore në fushat e shëndetësisë, komunikacionit e transportit dhe të fushave të tjera që kanë lidhje të ngushta me jetën e popullit, gjithashtu, janë pika të rëndësishme të këtij plani. Përgjegjësi i sektorit të trafikut pranë Drejtorisë së Sigurimit Publik të Pekinit, zoti Vu Sianli thotë se në udhëkryqet kryesore të Pekinit janë shtruar bobina të induksionit elektromagnetik që mund të kontrollojnë në çdo kohë sasinë e lëvizjes së automjeteve.

"Me përdorimin e këtij sistemi të ri të administrimit të trafikut, policët mund të arrijnë në vend brenda 3.6 minutave që nga koha e alarmit. Kurse më parë duheshin 20 minuta."

Specialistët kinezë janë të mendimit se me zbatimin e këtij plani, me siguri do të rritet roli mbështetës i shkencës dhe teknikës në zhvillimin ekonomik dhe shoqëror. (Zheng)