Kjo është një melodi shumë e njohur dhe e bukur, e interpretuar me erhu, e cila përshkruan tablonë entuziaste të garës së kuajve në ditët e festës në stepën e madhe të Mongolisë së Brendshme në veri të Kinës. Këtë melodi Min Huifeni e interpreton me mjeshtëri të madhe, në mënyrë të shtruar e të natyrshme.

Min Huifeni, instrumentistja e njohur kineze e veglës muzikore erhu, ka lindur në vitin 1945 në provincën Jiangsu të Kinës jugore. Kur ishte 8 vjeçe, ajo filloi të mësonte t'i binte erhu-së nga i ati, ndërsa në moshën 12 vjeçare ajo hyri në shkollën e mesme pranë Konservatorit të Shangait, e pas mbarimit të shkollës së mesme, ajo u pranua në këtë konservator. Pas diplomimit ajo ka punuar si soliste në erhu e Orkestrës së Shangait, e Ansamblit Artistik të Kinës, e Ansamblit Artistik të Shangait etj.

Në vitin 1963, Min Huifeni 18 vjeçare fitoi çmimin e parë në Konkursin e 4-t Kombëtar të Erhu-së "Pranvera e Shangait", duke demonstruar talentin e saj artistik. Qysh nga viti 1979, ajo dha shfaqje në SHBA, Kanada, Francë dhe në mbi 10 vende e rajone të tjera, ku u vlerësua lart nga specialistët e muzikës si "një nga instrumentistët më të njohur të instrumenteve me tela në botë". Dirigjenti i njohur në botë Ozava Seiji, që u prek nga melodia e saj me titull "Uji i lumit", tha se ajo shfaqi hidhërimet njerëzore. Më poshtë do të ndjekim së bashku këtë melodi.

Kjo është një melodi popullore e përhapur gjerësisht në zonën verilindore të Kinës, e cila përshkruan jetën e hidhur të njerëzve në vitet e vështira, mendimin e tyre për shkaqet e vuajtjeve dhe më në fund shpërthimin e zjarrit të tyre në zemër. Kjo melodi është e figurshme dhe ka forcë të madhe prekëse artistike. Nga interpretimi i Min Huifenit sikur ndiejmë psherëtimat e njerëzve nga zemra. Kjo është një nga veprat e saj përfaqësuese.

Gjatë praktikës artistike shumëvjeçare, Min Huifeni ka krijuar stilin e veçantë të interpretimit, ajo ka bazë të shëndoshë, kupton thellësisht përmbajtjen e melodisë dhe interpreton me patos e me forcë prekëse. Ajo ka mësuar edhe nga muzika popullore dhe ajo e operave lokale për të pasuruar forcën shprehëse të erhu-së. Në të njëjtën kohë ajo ka krijuar e përpunuar shumë melodi muzikore. Veprat e saj të përpunuara gjatë shumë vjetëve, si "Dëshira e banorëve të zonës Honghu", "Vjersha muzikore ? melodia e zemrës" etj. janë përhapur gjerësisht dhe janë përfshirë në lëndët mësimore të konservatoreve kineze. Tani le të shijojmë melodinë "Dëshira e banorëve të zonës Honghu".

Kjo është një melodi e interpretuar solo në erhu, dhe e përpunuar në bazë të muzikës së operës popullore kineze "Partizanët e liqenit Honghu". Liqeni Honghu ndodhet në provincën Hubei, kjo operë përshkruan luftën e popullit kundër shtypjes në vite '30 të shekullit të kaluar. Muzika e operës karakterizohet nga stili i theksuar i kombësisë dhe i asaj krahine dhe shpreh dëshirën e popullit për çlirim. (Pina)