Dëgjoni 

Në vitin 2006, telekomedia me seri "Arti luftarak" ngjalli jehonë të madhe në Kinë duke fituar përshëndetjen e shikuesve veçanërisht të shikuesve të rinj. Aktorët e rinj që luajnë në këtë telekomedi fituan famë të madhe. Yu Entai është një prej tyre. Ai interpretoi me sukses rolin e Lv Xiucait. Këtë vit, Yu Entai tërhoqi përsëri vëmendjen e shikuesve për shkak të interpretimit të shkëlqyeshëm në dramën "Dashuria në Taohuayuan".

Telekomedia "Arti luftarak" përshkruan një sërë tregimesh interesante në një hotel. Yu Entai interpreton një studiues me emrin Lv Xiucai. Ai flet me fjalë humoristike madje edhe në gjuhën angleze. Duke folur për këtë dramë dhe rolin e Lv Xiucait, Yu Entai tha:

"Nuk e prisja që një dramë televizive të më sillte famë aq të madhe. Jam shumë i prekur nga përkrahja e dashamirësve të dramës për mua."

30-vjeçari Yu Entai është një aktor me njohuri të pasura profesionale. Në vitin 1999 ai u diplomua në fakultetin e artit televiziv të Institutit të Dramës të Shangait. Në vitin 2002, ai shkoi në Universitetin e Oksfordit të Anglisë për të studiuar interpretimin e dramës. Në vitin 2005, ai mori gradën e aspirantit nga fakulteti i interpretimit i Institutit të Dramës të Shangait. Qysh nga viti 2006, Yu Entai filloi të studiojë për gradën e doktorit në regjisurë në Institutin Qendror të Dramës. Nëpërmjet studimit shumëvjeçar, Yu Entai ka zotëruar plotësisht teorinë e interpretimit duke luajtur shumë role të shkëlqyeshme në drama televizive, filma etj.

Në dramën "Dashuria në Taohuayuan" të shfaqur pak kohë më parë në Pekin, Yu Entai interpreton një peshkatar nervoz. "Dashuria në Taohuayuan" është një dramë klasike tajvaneze dhe është shfaqur për mbi 20 vjet në Tajvan. Shumë aktorë të famshëm kanë interpretuar role në këtë dramë.

Yu Entai i kushtoi shumë rëndësi rastit të interpretimit në dramën "Dashuria në Taohuayuan" në versionin e pjesës kontinentale. Ai bëri përpjekje të palodhshme për të shfaqur nivelin më të lartë të interpretimit. Çdo herë pas shfaqjes, Yu Entai diskutonte me aktorë të tjerë për shfaqjen e atëditshme duke përsosur interpretimin e tyre. Për shkak të punës së ndërgjegjshme të aktorëve, drama "Dashuria në Taohuayuan" në versionin e pjesës kontinentale fitoi përshëndetjen e gjerë të shikuesve. Yu Entai tha:

"Vetëm aktorë të shquar kanë rast të interpretojnë në këtë dramë. Jam fatmirë që fitova këtë rast të çmuar. Kësaj drame i nevojitet niveli i lartë i interpretimit të aktorëve. Jam i kënaqur për interpretimin tim."

Drama "Dashuria në Taohuayuan" përbëhet nga dy pjesë. Pjesa e parë është një tragjedi që përshkruan një tregim fatkeq dashurie. Kurse pjesa e dytë është një komedi që përshkruan tregime interesante në një vend të bukur. Edhe peshkatari i interpretuar nga Yu Entai është një personazh tragjikomik. Pas interpretimit në këtë dramë, Yu Entai thelloi njohjen për komedinë. Ai tha:

"Në fakt një aktor i mirë komedie ka shumë keqardhje e hidhërime në jetë, për shembull mjeshtri i komedisë Çarli Çaplin. Ai duhet të jetë më i ndjeshëm se njerëzit e zakonshëm."

Krahas interpretimit, në kohën e lirë, Yu Entai është i zënë me studimin e teorisë së interpretimit. Ai ka përkthyer disa drama të huaja. Pak kohë më parë, me ftesën e Televizionit Qendror të Kinës, Yu Entai filloi të drejtojë një program që quhet "Kalendar". Në këtë program ka shumë ide e krijime të reja duke fituar përshëndetjen e shikuesve. Shumë shikues u shprehën se Yu Entai ka prirje të madhe në fushën e drejtimit të programeve televizive. (Fani)