Dëgjoni

Vitet e fundit, me shfaqjen e talentit të ri, bilardistit të shkëlqyer kinez Ding Junhui në qarqet botërore të snukerit, dhe paraqitjen e mrekullueshme të bilardistes kineze Pan Xiaoting në ndeshjet e ndryshme botërore, sporti i bilardos po zhvillohet dita-ditës në Kinë. Ditët e fundit, filluan zyrtarisht "ndeshjet e bilardos për vitin 2007 me pjesëmarrjen e mbi 10 mijë vetave nga lagjet e Pekinit", që organizohet nga Shoqata e Bilardos e Pekinit. Këto ndeshje tërhoqën afro 20 mijë adhurues pekinas. Sipas të dhënave statistikore, tani në Kinë ka afro 60 milionë njerëz që luajnë bilardo. Si është gjendja aktuale e sportit të bilardos në Kinë? Si do të jetë perspektiva e tij? Le të dëgjojmë më hollësisht korrespondencën tonë.

Sporti i bilardos hyri në Kinë në vitet 80 të shekullit të kaluar. Por në të kaluarën, imazhi i bilardos ishte me ngjyrë gri: një fushë bilardoje druri, disa steka të thjeshta dhe një grup të rinjsh pa punë e gjysmë të zhveshur. Atë kohë, bilardoja në Kinë nuk përputhej me emrin e saj, sporti i zotërinjve. Por tani, më shumë nëpunës kinezë me rroga të larta kanë filluar të godasin gurët me stekë. Pse kinezët i kanë zënë ethet e bilardos, e cila në kohën e shkuar nuk ishte një sport elegant në Kinë?

Kjo vjen sepse ndikimet e yjeve të sportit janë pa fund. Para disa vjetëve, pjesëmarrja e Yaoming-ut në NBA shkaktoi rritjen e madhe të numrit të basketbolldashësve. Kurse tani, Ding Junhui dhe Pan Xiaoting sollën përsëri "ethet e bilardos". Vitin e kaluar, në kampionatin e snukerit në Angli, Ding Junhui mundi me radhë 9 bilardistët më të shkëlqyer të botës dhe korri titullin e kampionit. Menjëherë, snuker iu bë një fjalë shumë e njohur në bisedat në lagje. Zoti Jin, një përkthyes profesionist që u regjistrua për të marrë pjesë në ndeshjet e bilardos u shpreh se arsyeja e adhurimit të bilardos është shumë e thjeshtë, ai u ndikua pikërisht nga yjet e sportit.

"Në të kaluarën, nuk kam luajtur asnjëherë bilardo. Vetëm këta dy vjet, fillova ta mësoj me shumë interes. U inkurajova shumë nga paraqitja e Ding Junhui-it. Teknika e tij mahniti disa nga miqtë e mi të huaj. Pasi i doli emri Ding Junhui-it, shumë shokë të mi ditë për ditë zënë në gojë bilardon. Në kanalin sportiv të televizionit, gjithmonë ka programe bilardoje. Pjesëmarrja në këto ndeshje nuk është për të fituar çmime, por janë thjesht të ndikuar nga yjet e bilardos."

Mund të shohim se tani në Kinë bilardoja është bërë një sport shumë popullor. Por a ka ardhur pranvera për bilardistët profesionistë? Shefi i fushave të bilardos zoti Cheng na dha një përgjigje mohuese. Ai tha se në fillim, ai humbte para çdo vit në administrimin e fushave të bilardos, sepse në atë kohë bilardo nuk ishte një sport me emër të mirë dhe nuk preferohej nga nëpunësit me rroga të larta. Vitet e fundit, për shkak të ndikimeve nga yjet e bilardos, shumë nëpunës me rroga të larta kanë filluar të luajnë atë. Por megjithatë gjendja ekonomike e bilardistëve profesionistë nuk është përmirësuar.

"Rroga e bilardistëve të zakonshëm profesionistë arrin vetëm 40 mijë juanë çdo vit. Në kohën e zakonshme, ata punojnë në fusha bilardoje të vendit dhe fitojnë rroga nga mësimet e bilardos. Tani, çmimet për fituesit e ndeshjeve të bilardos në Kinë janë shumë të ulëta. Çmimi i kampionit është vetëm pak mbi 10 mijë juanë."

Zoti Cheng na tregoi që për të marrë pjesë në ndeshje, bilardistët profesionistë duhet të përballojnë edhe shpenzimet e transportit, të ushqimit dhe hotelit. Prandaj, edhe sikur të fitojnë çmimin e kampionit, në fund të ndeshjeve atyre nuk do t'u mbeten shumë para. Sukseset e Ding Junhuit dhe të Pan Xiaotingut nuk përfaqësojnë gjendjen e të gjithë bilardistëve profesionistë. Zoti Cheng nuk i inkurajon prindërit që të mësojnë fëmijët e tyre si bilardistë profesionistë.

"Njerëzit shohin vetëm suksesin e yjeve të bilardos. Bilardoja nuk është përfshirë ndër lojërat olimpike. Shteti nuk investon për këtë gjë dhe nuk ka skuadra shtetërore të bilardos tani për tani. Si do të jetë e ardhmja e fëmijëve nëse ata nuk arrijnë suksese nga bilardoja dhe mësimet e tyre ndikohen negativisht nga kjo?"

Tani, megjithëse bilardoja është pranuar gjerësisht në Kinë, zhvillimit të këtij sporti dhe pjekjes së tregut të bilardos i duhet një rrugë e gjatë. (Shy Guan)