Dëgjoni

Në vitin 2008, edhe 6 pallate sporti të shkollave të larta të Pekinit do të shfrytëzohen për ndeshje të Lojërave Olimpike. 4 prej tyre, ato të Universitetit të Pekinit, Universitetit të Industrisë, Universitetit të Agronomisë dhe Universitetit të Shkencës dhe Teknikës, janë në ndërtim e sipër.

Studentët e Universitetit të Pekinit thonë me gëzim se "me përurimin e pallatit të sportit të universitetit tonë, ne do të kemi pallatin më të mirë të pingpongut në botë". Ashtu është, gjatë Lojërave Olimpike të Pekinit të vitit 2008, ndeshjet e pingpongut, që është një sport me të cilin krenohen kinezët, do të zhvillohen në Universitetin e Pekinit. Ky pallat, që filloi të ndërtohet qysh më 19 korrik të vitit 2005, do të ketë 6000 vende fikse dhe 2000 vende të përkohshme.

Duke bërë një xhiro rreth kantierit të ndërtimit, ne u çuditëm dhe pyetëm pse një copë tokë në qoshen juglindore të këtij pallati me trajtë katrore është lënë pa u prekur dhe 7 drurë të vjetër dhe një oborr i vogël kanë mbetur ashtu siç kanë qenë më parë.

Në projektin fillestar të këtij pallati sporti, projektuesit patën plan që ky oborr i vogël të shpërngulej në tërësi. Por një student pa nga shënimet historike se ky oborr i vogël është e vetmja pjesë e mbetur e një parku të madh perandorak të dinastisë Qing para 200 vjetëve, kurse 7 drurët jashtë oborrit janë drurë të atëhershëm dhe, ndër to, pisha më e vjetër me lekurë të bardhë ka një moshë mbi 200-vjeçare. Pedagogët dhe studentët e Universitetit të Pekinit i raportuan këtë Drejtorisë së Relikteve Kulturore të Pekinit. Kështu, sektori përkatës mori vendim të posaçëm mbi mbrojtjen e relikteve kulturore në këtë zonë.

Kështu, projektuesit duhej të rishikonin projektin. Për të mos dëmtuar rrënjët e 7 drurëve të vjetër, ata lëvizën 3 metra drejt jugut pjesën e bodrumit të pallatit dhe rishikuan projektin e tubacioneve dhe linjave nëntokësore. Për të shmangur humbjen e ujit rreth rrënjëve të drurëve, gjatë punimeve të ndërtimit punëtorët bënë posaçërisht një shtresë izoluese nëntokësore midis drurëve dhe ndërtesës. Ata morën masa edhe për të shmangur rënien nga sipër të lëndëve të ndërtimit që mund të godisnin drurët e vjetër.

Në këtë mënyrë, u shtua shuma e buxhetit për ndërtimin e këtij pallati si pasojë e ndryshimit të projektit, por pas vitit 2008 do të shohim se një pallat i ri sporti i lojërave olimpike në universitetin më të vjetër të Kinës do të gjendet në mënyrë harmonike bashkë me një kuriozitet kulturor me një histori 200-vjeçare, duke e shquar njëri-tjetrin.

Pas vizitës në Universitetin e Pekinit, erdhëm për të parë pallatin e sportit në Universitetin e Industrisë të Pekinit, që është i vetmi pallat i madh i sportit në këndin juglindor të qytetit Pekin. Në vitin 2008, këtu do të zhvillohen ndeshjet e badmintonit dhe garat e gjimnastikës artistike të Lojërave Olimpike të Pekinit. Ky pallat sporti, që filloi të ndërtohet qysh më 30 qershor të vitit 2005, do të ketë 7500 vende.

Me ndërtimin e një pallati sporti, pedagogët dhe studentët e këtij universiteti të vjetër me bazë të shëndoshë të disiplinës inxhinierike patën rastin për të treguar mjeshtrinë e tyre. Prijësit teknikë të lëndës mësimore të konstruksioneve të çelikut morën përsipër detyrën e projektimit të këtij pallati. Edhe aspirantët e kësaj dege punuan së bashku me pedagogët e tyre.

Pas Lojërave Olimpike të Pekinit, ky pallat sporti jo vetëm do të jetë qendër e kalitjes fizike për pedagogët dhe studentët e këtij universiteti, por edhe do të hapet për qytetarët e kësaj lagjeje. Ai do të mbetet në këtë shkollë të bukur dhe në këtë pjesë të qytetit si një trashëgimi e shtrenjtë kulturore. Siç duket, me hyrjen e lojërave olimpike në oborret e shkollave të larta, mund të realizohet bashkekzistenca harmonike e sporteve me kuriozitetet humanitare dhe kulturore. Aq më tepër, me hyrjen e tyre në shkollat e larta, sportet sjellin shkencën dhe teknikën e fjalës së fundit dhe shprehitë moderne në këto vatra të kulturës, ku kundërmon era e këndshme e librave. (Zheng)