Jodi është një substancë minimale e domosdoshme për organizmin e njeriut dhe mungesa e tij në organizëm mund të shkaktojë lloj-lloj sëmundjesh, siç janë fryrja e gjendrës tiroide, zhvillimi i paplotë i fuqisë mendore etj. Kina është një nga vendet që pëson më rëndë rrezikun e mungesës së jodit dhe shumica dërmuese e provincave të saj kanë qenë viktima të mungesës së jodit në shkalla të ndryshme. Duke filluar nga vitet 80 të shekullit të kaluar, Ministria e Shëndetësisë dhe dikasteret e tjera të Kinës kanë marrë një sërë masash dhe kanë korrur suksese të dukshme në parandalimin dhe likuidimin e sëmundjeve të shkaktuara nga mungesa e jodit.

Para disa kohësh, Ministria e Shëndetësisë, Komisioni Shtetëror i Zhvillimit dhe Reformës dhe Korporata Kineze e industrisë së kripës organizuan bashkarisht në qytetin Urumçi të Rajonit Autonom Sinkiang-ujgur një simpozium për punën e parandalimit dhe frenimit të sëmundjeve të shkaktuara nga mungesa e jodit, në të cilin zv-ministri kinez i shëndetësisë Vang Longde tha se nga anketa dhe vrojtimi i bërë për dy vjet del se Kina ka hyrë ndër radhët e vendeve të përparuara të botës për sa i përket likuidimit të sëmundjeve të shkaktuara nga mungesa e jodit,

"Nga anketa e 5-të kombëtare e vitit 2005 dhe vrojtimi i vitit 2006 në distriktet e mbarë vendit rezultoi se niveli i ushqimit me jod të popullit tonë është në një gjendje të përshtatshme. Përqindja e përdorimit të kripës standarde me jod, përqindja e fryrjes së gjendrës tiroide të fëmijëve dhe niveli i jod-uresë së fëmijëve në vendin tonë kanë arritur treguesit ndërkombëtarë për likuidimin e sëmundjeve të shkaktuara nga mungesa e jodit. Kjo tregon se vendi ynë ka hyrë në radhët e vendeve të përparuara të botës për sa i përket punës për likuidimin e këtyre sëmundjeve."

Nënkryetari i Shoqatës Kineze për çështjen e sëmundjeve krahinore, Çen Gjixiang, tha se që nga viti 1995 në mbarë vendin zbatohet "Rregullorja e Këshilli të Shtetit për shtimin e jodit në kripën ushqimore dhe për likuidimin e dëmeve të mungesës së jodit" dhe është arritur sukses në këtë punë.

"Para vitit 1995, kur filloi zbatimi i rregullores për shtimin e jodit në kripën ushqimore për të gjithë popullin, përqindja e popullarizimit të kripës ushqimore me jod ishte vetëm 30 %, kurse tani kjo përqindje ka kaluar 90 %."

Në gusht të vitit të kaluar, një grup specialistësh, i organizuar nga Ministria e Shëndetësisë, anketoi aty për aty gjendjen e mungesës së jodit në disa zona të rajonit autonom Sinkiang-ujgur. Nga kjo anketë del se më shumë se gjysma e fshatarëve dhe blegtorëve në këto zona përdorin kryesisht kripë vendase dhe jetojnë në gjendjen e mungesës së jodit.

Drejtori i shëndetësisë i rajonit autonom Sinkiang-ujgur, Mamatimin Jasen thotë se nga fillimi i këtij viti administrata e rajonit autonom shqyrtoi posaçërisht detyrën dhe progresin e punës për parandalimin e sëmundjeve të shkaktuara nga mungesa e jodit në gjithë rajonin dhe planifikoi detyrat për shpejtimin e popullarizimit të përdorimit të kripës me jod, për forcimin e propagandës mbi parandalimin e këtyre sëmundjeve dhe për shpejtimin e anketës mbi sëmundjet krahinore.

Drejtoria e Shëndetësisë e këtij rajoni autonom ngriti në gjithë rajonin një fushatë propagande për shtimin e jodit në kripën ushqimore. Qytetarja e kombësisë ujgure Havagul tha se nëpërmjet këtyre aktiviteteve propagandistike ajo kuptoi se mungesa e jodit është një gjë shumë e dëmshme për organizmin e njeriut dhe shtimi i jodit nuk është një punë e vështirë.

"Mungesa e jodit mund të sjellë dëm të madh në zhvillimin e fuqisë mendore të njeriut. Kur isha e vogël, unë shpesh herë shihja fëmijë me gushë të fryrë. Kurse sot në qytet nuk shoh më fëmijë të tillë. Në fakt, shtimi i jodit është një gjë e lehtë, mjafton të ndryshojmë zakonin në të ngrënë dhe të përdorim kripën me jod. Shumë njerëz në fshatrat e Sinkiangut jugor ende ruajnë zakonin e vjetër të përdorimit të kripës vendase pa jod. Ata ende nuk kanë kuptuar dëmet që mund të na sjellë mungesa e jodit."

Zv-ministri i shëndetësisë Vang Longde thotë se për të siguruar realizimin e likuidimit të sëmundjeve të shkaktuara nga mungesa e jodit në 95 % të distrikteve deri në vitin 2010, sektorët e shëndetësisë duhet të forcojnë punën e kontrollit dhe të njoftimit për këto sëmundje, të punojnë për stabilizimin e radhëve të kuadrove të kësaj pune dhe për ngritjen e nivelit të tyre. Edhe sektorët e tjerë përkatës gjithashtu duhet të forcojnë edukatën shëndetësore për të ngritur ndërgjegjen e masave për parandalimin e sëmundjeve. (Zheng)