dëgjoni

Korrespondentja e Radios së Jashtme të Kinës njoftoi se siç bëhet e ditur më 4 qershor nga Drejtoria e Relikteve e Pekinit, me rastin e "Ditës së dytë të Trashëgimive Kulturore të Kinës", Pekini do të organizojë mbi 60 aktivitete kulturore për të forcuar vetëdijen e masave popullore për mbrojtjen e trashëgimive kulturore.

Muzetë e institucionet e ndryshme të mbrojtjes së trashëgimive kulturore të Pekinit do të zhvillojnë ekspozita, shfaqje etj. për të shfaqur rezultatet e mbrojtjes së trashëgimive kulturore.

Në vitin 2006, qeveria kineze e përcaktoi të shtunën e dytë të qershorit të çdo viti si "Dita e Trashëgimive Kulturore" për të propaganduar mbrojtjen e trashëgimive kulturore.

Muzetë e galeritë e arteve të qytetit Shenzhen filluan të hapen falas 

Korrespondenti i Radios së Jashtme të Kinës njoftoi se pak kohë më parë, të gjitha muzetë e galeritë e arteve të qytetit Shenzhen të Kinës jugore filluan të hapen falas ndaj vizitorëve. Shenzheni është qyteti i parë në Kinë që realizon hapjen falas të muzeve dhe të galerive të arteve.

Përgjegjësi përkatës i Drejtorisë së Kulturës të Shenzhenit u shpreh se ky qytet do të mësojë edhe nga përvoja e Hong-Kongut dhe e Tajvanit dhe do të pranojë shumë vullnetarë për shërbime në muzetë dhe në galeritë e arteve.

Specialistët vunë në dukje se hapja falas e muzeve dhe e galerive të arteve do të nxitë shumë zhvillimin e kulturës në qytetin Shenzhen.

Më se 42 milionë femra kineze kanë marrë njohuri për parandalimin e Sidës 

Agjencia kineze e lajmeve Hsinhua njoftoi se pas fillimit të veprimtarisë propaganduese e përgatitore të njohurive për parandalimin e Sidës ndër femrat kineze, 42 milionë e 240 mijë femra kineze kanë marrë njohuri në këtë fushë.

Sipas statistikave, përqindja e femrave kineze të infektuara nga virusi i Sidës po shtohet nga viti në vit. Në korrik të vitit 2004, Lidhja Pan-kineze e Grave dhe Ministria e Shëndetësisë e Kinës nisën veprimtarinë propaganduese e përgatitore të njohurive për parandalimin e Sidës ndër femrat.

Janë shtuar studentët e pjesës së brendshme që kërkojnë të studiojnë në shkollat e larta të Hong-Kongut 

Agjencia kineze e lajmeve Hsinhua njoftoi se tani paraqitja e kërkesave nga studentët e pjesës së brendshme për studime në shkollat e larta të Hong-Kongut ka hyrë në etapën përfundimtare. Deri më 1 qershor, shkollat e larta të Hong-Kongut morën mbi 9000 kërkesa. Parashikohet se deri më 15 qershor, data e përfundimit të pranimit të kërkesave, sasia e kërkesave do të shtohet në 11 mijë, shifër kjo pak më e madhe në krahasim me vitin e kaluar.

Vitin e kaluar, shkollat e larta të Hong-Kongut pranuan 250 studentë të pjesës së brendshme. Këtë vit, këto shkolla planifikojnë të pranojnë 250 deri 300 studentë të pjesës së brendshme. (Fani)