dëgjoni

Ju flet Radio e Jashtme e Kinës. Të dashur dëgjues, në rubrikën e sotme "Shkenca, arsimi dhe shëndetësia" do të japim reportazhin "Përpjekjet për shndërrimin e Baodingut në një qytet të shfrytëzimit të energjisë diellore".

Mjaft krahina dhe qytete të Kinës po bëjnë përpjekje aktive për shfrytëzimin e energjisë së erës, energjisë diellore, energjisë gjeotermike dhe energjive të tjera, me qëllim që të ndryshojnë gjendjen ekzistuese të mbështetjes në energjitë tradicionale, siç janë energjia e qymyrgurit, energjia e naftës dhe energjia e gazit natyror. Një prej këtyre krahinave dhe qyteteve është edhe qyteti Baoding i provincës Hëbei të Kinës Veriore.

Pjesa më e madhe e qyteteve të Kinës përdorin rrymë të alternuar elektrike për llambat e semaforëve sinjalizues. Ndërsa në qytetin Baoding vëmë re se në majën e secilës shtyllë të semaforëve sinjalizues është instaluar një aparat i veçantë me emërtimin "paneli i baterive të energjisë diellore". Me anë të këtij aparati, energjia e rrezeve të diellit kthehet në energji elektrike, që shfrytëzohet për funksionimin normal të semaforëve sinjalizues.

Përgjegjësi i seksionit të sigurimit publik dhe të trafikut urban të këtij qyteti, zoti Liu Tao thotë se, për instalimin e semaforëve sinjalizues me llamba të energjisë diellore, qyteti Baoding ka bërë rindërtimin e 22 udhëkryqeve që përbëjnë 20% të udhëkryqeve të të gjithë qytetit.

"Semaforët sinjalizues me llamba të energjisë diellore kanë shumë të mira. E para, kanë ndryshuar mënyrën e furnizimit me energji elektrike, duke shfrytëzuar një lloj energjie më ekonomike. E dyta, në semaforët me llamba të energjisë diellore kemi instaluar një sistem përcjellës pa kabllo, gjë që gjithashtu është ekonomike, sepse nuk ka nevojë të shtrohet kabllo nën tokë."

Krahas instalimit të semaforëve sinjalizues me llamba të energjisë diellore në udhëkryqet kryesore, qyteti Baoding ka filluar instalimin e llambave ndriçuese me energji dielllore në rrugët e qytetit. Kryeinxhinieri i seksionit të administrimit të llambave të rrugëve, zoti Zhao Vanzeng, thotë se punimet për instalimin e llambave me energji diellore në rrugët e këttij qyteti kanë filluar para një viti dhe deri tani rreth 200 llamba të tilla janë vënë në përdorim.

Zoti Zhao tha se, për të përhapur më tej përdorimin e llambave ndriçuese me energji diellore, sektorët përkatës kanë plan që, brenda këtij viti, të instalojnë edhe 50 llamba të tjera ndriçuese me energji diellore në dy bulevardet kryesore. Ata kanë instaluar llamba të tilla edhe në shumë lagje banimi dhe parqe. Lagjja Mingçang-juan ka qenë e para lagje ku janë ndërruar llambat ndriçimit. Gjyshi Zhang, që banon në këtë lagje, foli për ndryshimet e reja që llambat me energji diellore sollën në jetën e banorëve.

"Në këto llamba nuk përdoret energji elekrike. Ato ndizen automatikisht sapo ngryset. Më parë, llambat tona të rrugëve shpesh herë humbnin elektricitet. Tani nuk kam frikë se mos prek telat elektrikë. Me përdorimin e llambave të rrugëve me energji diellore kursehet energjia."

Qyteti Baodinng ka përfunduar provën e shfrytëzimit të energjisë diellore dhe rezultati ka dalë ashtu siç ishte parashikuar. Tani të gjitha llambat e rrugëve dhe semaforët sinjalizues, e vënë në përdorim, kanë arritur kapacitetin e duhur. Sasia e nergjisë diellore të akumuluar brenda një dite mjafton për një javë. Nënkryetari i Komisionit të Zhvillimit dhe Reformës të qytetit Baoding, zoti Cao Gjidong thotë se, në disa vitet e ardhshme, Baodinng do të përhapë shfrytëzimin kompleks të energjisë diellore në sistemet e ndriçimit, të funizimit me ujë të ngrohtë, të furnizimit me ngrohje në dimër etj, duke e shndërruar Baodingun në një qytet të shfrytëzimit të energjisë diellore.

"Kemi plan që, pas 3 a 5 vjetëve, energjia diellore të përdoret në të gjithë sistemin e ndriçimit në qytetin tonë, si llambat e rrugëve, semaforët sinjalizues, llambat dekorative dhe llambat në oborret e lagjeve. Edhe në sistemin e ngrohjes në dimër dhe të banjave në lagjet e reja, që do të ndërtohen më vonë, do të përdoret energji diellore. Jam i sigurt se, pas 3 a 5 vjet përpjekjesh, do të bëhet realitet ëndrra jonë për shndërrimin e qytetit Baoding në një qytet të shfrytëzimit të energjisë diellore." (Zheng)