dëgjoni

Ju flet Radio e Jashtme e Kinës. Të dashur dëgjues, në rubrikën "Drejt Olimpiadës 2008", do të japim reportazhin "Edukatë olimpike në shkollat kineze".

Për organizimin me sukses të lojërave olimpike me pjesëmarrjen e mbarë popullit të vendit organizator, është i domosdoshëm popullarizimi i njohurive përkatëse në gjirin e masave të gjera popullore dhe sidomos në gjirin e rinisë. Për këtë qëllim, Komisioni Organizativ i Lojërave Olimpike të Pekinit ka caktuar 556 shkolla të krahinave të brendshme të Kinës si shkolla shembullore të edukatës olimpike. Njëra prej tyre është edhe shkolla fillore eksperimentale Huagjiadi në pjesën lindore të Pekinit, e cila shquhet për aktivitetet e veta karakteristike "Komisioni i të vegjëlve për lojërat olimpike" dhe "Një klasë, një shtet, një lagje".

Ata e formuan "Komisionin e të vegjëlve për lojërat olimpike" në tetor të vitit 2005, duke mësuar nga mënyra e punës së Komitetit Olimpik Ndërkombëtar. Të 74 anëtarët e tij u zgjodhën pas konkursit të gojëtarisë dhe me anë të votimit, ku morën pjesë 900 nxënës të shkollës. Tani "komisioni" ka formuar 8 seksione, si seksioni i planifikimit të aktiviteteve, seksioni i protokollit etj. Fill pas formimit të tij, "komisioni" hapi qendrën e zërit për propagandimin e njohurive rreth lojërave olimpike. Nxënësit hapën edhe "Këndin e propagandës", ku publikohen hartimet e tyre mbi lojërat olimpike. Të gjitha aktivitetet e tyre zhvillohen plot me gaz e hare.

Duke folur për misionin e vet, vajza 10-vjeçare Li Çimei, që është kryetare e "komisionit", tha ballëhapur se "komisioni i të vegjëlve për lojërat olimpike" ka për detyrë të mobilizojë nxënësit që t'u afrohen lojërave olimpike.

"Tungjatjeta! Mua më quajnë Li Çimei. Jam kryetare e komisionit të të vegjëlve për lojërat olimpike. Detyra jonë është që të organizojmë aktivitete për popullarizimin e njohurive mbi lojërat olimpike në shkollën tonë. Gjëja që mund të bëjmë për hir të Lojërave Olimpike të Pekinit është që t'i ndihmojmë nxënësit të njohin më shumë lojërat olimpike dhe ta ndiejnë veten më afër këtyre lojërave."

Aktivitetet "Një klasë, një shtet, një lagje" kanë ardhur nga "Komisioni i t'i vegjëlve për lojërat olimpike". Secila prej 23 grupeve të klasave të kësaj shkolle imitoi ekipin sportiv të një vendi që ka korrur suksese në lojërat olimpike. Duke marrë shembull nga modeli i lojërave, ata organizuan një "olimpiadë të të vegjëlve", ku 23 grupet e klasave vepruan si ekipe të 23 vendeve të botës. Duke marrë pjesë në këto aktivitete, nxënësit njohën jo vetëm mënyrën e organizimit të lojërave olimpike, por edhe traditat kulturore të vendit, ekipiin e të cilit imituan. Për këto aktivitete foli mësuesja Zheng Liangqiong e kësaj shkolle.

"Nëpërmjet kanaleve të formave të ndryshme, nxënësit tanë u përpoqën t'i njohin këto vende nga aspektet gjeografike, historike, arsimore, kulturore, ekonomike e politike dhe pastaj shkolla jonë organizoi një seri aktivitetesh të tjera me temë 'Një klasë, një shtet, një lagje'."

Nxënësit e kësaj shkolle e kanë zgjeruar kuadrin e aktiviteteve të tyre, duke shkuar në lagjet përreth për t'u shpërndarë banorëve kartat e shtypura me materialet popullarizuese të shkollës së tyre për lojërat olimpike. Ata, së bashku me banorët e lagjeve, organizojnë edhe konkurse të njohurive për lojërat olimpike. Mësuesja Zheng është e mendimit se edhe këto aktivitete janë edukatë olimpike dhe i përkasin zgjerimit të kuadrit të edukatës. Veprimet e nxënësve tanë për të propaganduar njohuritë mbi lojërat olimpike jashtë shkollës mishërojnë më së miri parimin e "pjesëmarrjes së gjithë popullit në lojërat olimpike".

"Këto aktivitete të nxënësve tanë janë kuptimplotë, edhe pse zhvillohen në përmasë të vogël. Ata dalin nga shkolla dhe shkojnë tek banorët e lagjeve. Edhe banorët thonë se këto aktivitete janë interesante."

Siç thamë edhe më sipër, në krahinat e brendshme të Kinës janë caktuar 556 shkolla si shkolla shembullore të edukatës olimpike, siç janë shkolla fillore eksperimentale Huagjiadi e Pekinit dhe shkolla të tjera. Duke punuar si farëhedhëse, ato mbjellin idealin e lojërave olimpike në zemrat e gjithnjë e më shumë kinezëve, veçanërisht në zemrat e të rinjve dhe të rejave. (Zheng)