dëgjoni

Ju flet Radio e Jashtme e Kinës! Të dashur dëgjues, jam Shy Guan! Ju përshëndes përsëri nga Pekini! Në minirubrikën "Sporti i Kinës", do të dëgjoni korrespondencën me titull "Elemente kineze në veshjen ceremoniale olimpike". Veshjet e bukura dhe të përshtatshme mund të na bëjnë më të larmishëm. Lojërat Olimpike të Pekinit do të organizohen vitin tjetër, në vitin 2008. Tani, sektorët e veshjeve dhe qarqet sportive po i kushtojnë vëmendje të përbashkët një teme, si mund të vishen sportistët kinezë me sa më elegancë në ceremonitë e hapjes dhe të mbylljes të Lojërave Olimpike? Ditët e fundit, po zhvillohet në Pekin një simpozium mbi modelimin e veshjeve ceremoniale të delegacionit kinez në Lojërat Olimpike të vitit 2008.

Duke folur për veshjen e sportistëve kinezë në Lojërat Olimpike të vitit 2008, drejtori i qendrës së pajisjeve të Drejtorisë së Përgjithshme Shtetërore të Fizkulturës dhe të Sportit të Kinës, zoti Ma Jilong, u shpreh se thelbi i veshjes ceremoniale olimpike nuk është vetëm ngjyra dhe modeli, por edhe kultura që përmbahet në të.

"Veshja ceremoniale e delegacionit sportiv kinez në Lojërat Olimpike të Pekinit të vitit 2008 është bërë fokusi i vëmendjes sonë. Ne jo vetëm do të përcaktojmë që delegacioni kinez të vishet me veshje ceremoniale, por edhe shpresojmë më tej që çdo njeri të kuptojë shpirtin olimpik dhe kulturën sportive kineze. Duhet të nxisim përhapjen e koncepteve të lojërave olimpike të gjelbra, të lojërave olimpike shkencore dhe humanitare. Në të njëjtën kohë, do të pasqyrohen plotësisht kultura e ndritur dhe qytetërimi i lashtë i Kinës."

Ma Jilong është i mendimit se për modelin e veshjes së delegacionit kinez, "elementet kineze" duhet të lidhen me prirjen bashkëkohore ndërkombëtare. Na duhen elemente moderne, por edhe duhet të pasqyrohet tradita e veshjes kineze. Ai shpreson se në "Konkursin e modelimit të veshjeve ceremoniale të delegacionit kinez të Lojërave Olimpike të Pekinit të vitit 2008", që po zhvillohet, do të tërhiqen vëmendja dhe pjesëmarrja e modeluesve nga vendet e ndryshme të botës.

Specialisti i strategjisë kulturore, zoti Cao Shichao nga Pekini, theksoi që për të dy elementet, modernizmi dhe tradita kombëtare, më e rëndësishme është që të pasqyrohen karakteristikat kineze. Karakteristikat kineze përfshijnë jo vetëm karakteristikat e kulturës tradicionale kineze, por edhe ato të kulturës moderne. Modelimi i veshjeve ceremoniale të delegacionit kinez në Lojërat Olimpike të Pekinit të vitit 2008 duhet të mbështetet te e kaluara për të krijuar diçka të re.

"Nga pamja e veshjes, jo nga marka e saj, mund të dihet që ajo është nga Kina. Vetëm kështu mund të pasqyrohen fryma dhe shpirti i kinezëve modernë."

Ndërmarrja e njohur kineze e veshjeve, grupi Heng Yuanxiang, është sponsor i Lojërave Olimpike të Pekinit. Ky grup përgjigjet edhe për punën e modelimit të veshjeve ceremoniale të delegacionit olimpik kinez. Presidenti i këtij grupi, zoti Liu Ruiqi, është i mendimit se Kina po ndodhet në periudhën e zhvillimit, prandaj duhet të futen më shumë elemente të reja në konceptin e modelimit të veshjeve ceremoniale olimpike. Ai ndjek një koncept të modelimit që përfshin elemente historike kineze, urtësinë moderne kineze dhe imagjinatën e së ardhmes.

"Dëshirojmë që nëpërmjet një modelimi të tillë, të pasqyrohet fryma e vërtet e kinezëve. Ky është koncepti më i rëndësishëm."

Shumë modelues profesionistë kishin mendimet e veta për veshjet ceremoniale olimpike. Por ata kanë arritur mendime unanime që modelimi i veshjeve olimpike duhet të bazohet në "elementet kineze" për të krijuar diçka të re, sepse kultura karakteristike tradicionale kombëtare është thelbi i veshjes. (Shy Guan)