Tani znj. Wan Lei, me emrin shqiptar Shpresa, është shefja e redaksisë sonë. Nën drejtimin e saj, emisionet e Radios së Jashtme të Kinës, që transmetohen në valë të shkurtra e në valë të mesme, janë zgjatur nga 30 minuta në një orë, e njëkohësisht transmetohen edhe në internet.

Emisioni i përditshëm ndahet kryesisht në dy pjesë, pjesa e lajmeve dhe pjesa e rubrikave. Në pjesën e rubrikave përfshihen zakonisht 2 a 3 rubrika në ditë dhe rubrikat e 7 ditëve kanë 7 tema të ndryshme.

Përveç drejtimit të punëve të redaksisë, znj. Wan Lei përgjigjet edhe për "Rubrikën sportive" të së martës së bashku me të riun Xu Guang, që ka emrin shqiptar Skënder.

Për rubrikën e së hënës përgjigjet anëtari më i vjetër tani i redaksisë sonë Sihai. Ndër rubrikat e së hënës ka edhe një program të muzikës pop që drejtohet nga djaloshi U Sen, me emrin shqiptar Agim.

Rubrika e së mërkurës "Bota kulturore" përfshin 4 nënrubrika. Zv-shefi i redaksisë Fani, emri shqiptar i të cilit është Bashkim, përgjigjet për nënrubrikat "Lajme kulturore" dhe "Personazhe", kurse unë, Huailuja, tashmë në pension, përgjigjem për nënrubrikat "Kultura në fokus" dhe "Shkëmbime kulturore". Si redaktore e rubrikës "Bota kulturore", kam dëshirë t'ju njoh me pothuaj gjithçka nga fusha e gjerë e kulturës, si me letërsinë e artin e kohës së lashtë dhe të sotme, kinematografinë dhe koreografinë kineze, pjesët teatrale e operistike, festivalet e shfaqjet e ndryshme vokale, muzikore e teatrore, me filmat artistikë, televizivë e dokumentarë, me prirjet bashkëkohore të modës, me ekspozitat e arteve figurative e fotografike, me pikturat e llojeve të ndryshme, me përgatitjet arsimore e kulturore, me rrymat e ndryshme artistike etj.

Vetëm në fushën e artit do të kemi përmbajtje të pasura, si sprova në art, projektime artistike, art arkitekturor, art folklorik, artin e punimeve artistike etj. Në këtë rubrikë do t'ju njohim edhe me persona të suksesshëm në fushën e kulturës, artit, kinematografisë, muzikës etj.

Përmbajtjet që ju interesojnë më shumë nga rubrika e kulturës kineze, mund të na i bëni të njohura me letra ose e-mail në adresën e Radios së Jashtme të Kinës dhe në faqen e saj në internet. Unë do të përpiqem që në rubrikën "Bota kulturore" të transmetojmë artikuj që e rrokin kulturën nga aspekte të ndryshme.

Znj. Qu Ning, me emrin shqiptar Vera, drejton rubrikën e së enjtes "Ura e shkëmbimeve", rubrikën e së premtes "Jeta shoqërore" e përgatit z. Artan dhe rubrikën e së shtunës "Turizmi në Kinë" e drejton tani anëtari i vjetër z. Du.

Edhe 3 anëtarë të tjerë të redaksisë të dalë në pension, Daming me emrin shqiptar Drita, z. Zheng dhe Pina drejtojnë përkatësisht rubrikat "Jeta shoqërore", "Arsimi, shëndetësia dhe shkenca", "Tregime dhe legjenda popullore", " Pakicat kombëtare të Kinës" dhe "Programin me muzikë popullore kineze". Çdo ditë jepet edhe rubrika "Të mësojmë gjuhën kineze", ku dëgjuesit mund të ndjekin znj. Shpresa dhe z. Ruzhdi Stringa në për të mësuar të flasin gjuhën kineze.

Edhe djaloshi Yuan Xin, me emrin shqiptar Agron, përgjigjet për lidhjet e redaksisë me dëgjuesit tanë dhe ai do të takohet së shpejti në Tiranë me përfaqësuesit e tyre. Nëse dëshironi të keni ndonjë kujtim nga Kina, dërgojini letër Agronit dhe ne do të mundohemi t'ua plotësojmë.

Numri i dëgjuesve të emisioneve dhe të vizitorëve të faqes së internetit është shtuar dita-ditës. Vizitorët e faqes së internetit në gjuhën shqipe na shkruajnë se atyre u pëlqen më shumë faqja kryesore dhe rubrika e muzikës, sidomos muzika shqiptare. Në vitin 2005 vizita falas e dëgjuesit shqiptar Vasil Naçi ngjalli interesim të madh të dëgjuesve të emisioneve dhe vizitorëve të faqes sonë të internetit. Z. Vasil Naçi filloi t'i ndjekë emisionet tona në gjuhën shqipe qysh nga fillimi i tyre, pra ai është një mik i vjetër që ka mbajtur lidhje 38-vjeçare me redaksinë tonë. Ai na ka paraqitur shumë propozime të mira për përmirësimin e emisioneve në gjuhën shqipe. Si ai, edhe shumë dëgjues tanë na kanë dërguar shpesh propozime të vlefshme për emisionet në gjuhën shqipe. Me këtë rast, si një nga themeluesit u shpreh dëgjuesve të dashur të emisioneve dhe vizitorëve të dashur të faqes së internetit në gjuhën shqipe, falënderimet e mia më të përzemërta dhe më të sinqerta.

Ju urojmë dëgjim të këndshëm të rubrikave tona të 7 ditëve me 7 tema të ndryshme dhe jeni të mirëpritur në faqen e redaksisë sonë në internet. Mirëpresim vërejtjet dhe sugjerimet tuaja në faqen tonë kulturore. (zhai)