dëgjoni

Sot, më 6 qershor, është 38?vjetori i fillimit të emisioneve të Radios së Jashtme të Kinës në gjuhën shqipe.

Jam Huailu. Si anëtare e parë e redaksisë së RJK-së në gjuhën shqipe dhe anëtare veterane që dola në pension e fundit nga themeluesit e kësaj redaksie, në këtë ditë të shënuar, dua të shkruaj disa fjalë për redaksinë tonë të gjuhës shqipe.

Para 38 vjetëve, në vitin 1969, në ditët e fillimit të emisioneve të gjuhës shqipe, në redaksinë e gjuhës shqipe punonin dy specialistë shqiptarë, Kristaq Teneqexhiu dhe Vasilika Teneqexhiu, dhe 6 anëtarë kinezë, që ishin Cai Zhumiao, Zheng Zhongshy, Sun Wanhu, Guo Ming, Zhang Dakui dhe Zhai Huailui.

Specialistët shqiptarë Kristaq dhe Vasilika kanë punuar 7 vjet në redaksinë tonë dhe, pasi u kthyen në Shqipëri pas më se dhjetë vjetësh, z. Kristaq erdhi përsëri në Pekin duke vazhduar edhe për 7 vjet të tjerë punën për redaktimin e artikujve të emisioneve të gjuhës shqipe. Ata u kanë dhënë një ndihmë të madhe anëtarëve të redaksisë dhe kanë një meritë të madhe për përmirësimin nga ana gjuhësore të emisioneve tona. Më pas, na erdhi z. Ruzhdi Stringa. Edhe ai ka punuar për rreth 6 vjet në redaksinë e gjuhës shqipe dhe ka dhënë ndihmesë për ngritjen e cilësisë gjuhësore të emisioneve të gjuhës shqipe. Me zhvillimin dhe shtimin e punës së redaksisë sonë, punë e cila po rëndohet gjithnjë e më shumë, erdhi për të na ndihmuar edhe z. Artan Goga, i cili po punon pa u lodhur për përmirësimin e emisioneve të gjuhës shqipe. Të gjithë anëtarët e redaksisë u janë shumë mirënjohës këtyre specialistëve shqiptarë për ndihmën e dhënë nga ata.

Një nga themeluesit e redaksisë, anëtar i saj që në ditët e para të fillimit të emisioneve të gjuhës shqipe, z. Cai Zhumiao, u nda prej nesh para disa vjetësh nga një sëmundje zemre. Z. Zheng Zhongxu ka dalë në pension disa vjet më parë, por vazhdon të preokupohet për emisionet tona në gjuhën shqipe, duke e ndihmuar redaksinë në përkthimin e artikujve dhe në përgatitjen e anëtarëve të rinj. Z. Guo Ming dhe Sun Wanhu janë transferuar para 20 vjetësh përkatësisht në Gjykatën e Lartë të Popullit Kinez dhe në Ministrinë e Shkencës dhe të Teknikës të Kinës. Z. Guo ka punuar si shef i sektorit të jashtëm të Gjykatës së Lartë të Popullit Kinez, ndërsa z. Sun si zv-kryetar i degës së bashkëpunimit ndërkombëtar të Ministrisë së Shkencës dhe Teknikës të Kinës. Tani edhe ata të dy kanë dalë në pension. Z. Zhang Dakui, pas daljes në pension në vitin 2005, u largua nga redaksia dhe shkoi tek e bija në SHBA. Ndërsa unë, zj. Zhaihuailu, megjithëse dola në pension, po vazhdoj të ndihmoj të rinjtë e redaksisë sonë, duke drejtuar edhe dy nënrubrika "Kultura në fokus" dhe "Shkëmbime kulturore" të rubrikës "Bota kulturore" .

Gjatë 38 vjetëve që prej fillimit të emisioneve të Radios së Jashtme të Kinës në gjuhën shqipe, redaksia jonë ka marrë një zhvillim shumë të madh, janë shtuar vazhdimisht anëtarë të rinj dhe tani ka gjithsej l1 anëtarë. Ndër ta, 6 janë studentë të diplomuar në vitin 2004 nga Universiteti i Gjuhëve të Huaja të Pekinit. Gjatë praktikës afro 3-vjeçare, ata kanë arritur përparim të madh në gjuhën shqipe dhe kanë punuar në mënyrë krijuese për pasurimin e përmbajtjeve, fotografive dhe për rregullimin e faqes së internetit të Radios së Jashtme të Kinës në gjuhën shqipe. ( Zhai)