Kohët e fundit, Grupi i naftës dhe i gazit natyror i Kinës shpalli se në zonën e plazhit të gjirit të detit Buohai të provincës Hebei të Kinës u zbulua një fushë naftëmbajtëse me një rezervë prej një miliard tonësh. Menjëherë kjo fushë u bë një fokus i vëmendjes në Kinë, e madje edhe në botë.

Gjiri i detit Buohai është një nga ultësirat me burimet më të pasura të naftës dhe gazit natyror në Kinë. Fusha naftëmbajtëse Nanpu është fusha naftëmbajtëse me rezervën më të madhe të zbuluar gjatë mbi 30 vjetëve të fundit në Kinës. Përveç kësaj, edhe cilësia e naftës së kësaj fushe është shumë e mirë. Duke folur për gjendjen e zbulimit të kësaj fushe, zv/kryegjeologia e fushës naftëmbajtëse pranë Grupit të naftës dhe gazit naytror të Kinës, zj. Dong Yuexia, tha: "Kur dëgjuam lajmin e zbulimit të fushës së re naftëmbajtëse, ne ndodheshim në zyrë dhe thërritëm nga gëzimi".

Shoqëria e fushës naftëmbajtëse Jidong pranë fushës naftëmbajtëse Nanpu u krijua në 1988. Ndër 7 fushat naftëmbajtëse rreth gjirit të detit Buohai, fusha naftëmbajtëse Jidong është fusha me sipërfaqen më të vogël dhe me sasinë e prodhimit të naftës dhe gazit më të ulët. Në fillim shfrytëzimi i fushës naftëmbajtëse Jidong bëhej vetëm në zona tokësore, ndërsa sasia vjetore e prodhimit të naftës ishte vetëm 350 mijë tonë. Në vitin 1993 filloi puna e kërkimit të naftës në zonën e plazhit të detit Buohai, duke zhvilluar bashkëpunimin me dy shoqëri të njohura të huaja të naftës. Por ajo nuk arriti sukses të kënaqshëm.

Më vonë, fusha naftëmbajtëse Jidong shfrytëzoi teknologji të reja, duke arritur rezultate të reja. Drejtori i përgjithshëm i fushës naftëmbajtëse Jidong pranë Grupit të naftës dhe gazit natyror të Kinës, z. Zhou Haimin, tha se besimi i vendosur i tyre është një nga faktorët e rëndësishëm për zbulimin e fushës së re naftëmbajtëse.

"Ne kemi ngulur këmbë në kërkimin e fushës naftëmbajtëse në këtë zonë, sepse ne mendonim se këtu kishte naftë. Pas 4 vjet përpjekjesh, më në fund u zbulua fusha e madhe naftëmbajtëse me një rezervë prej një miliard tonësh".

Anëtari i Akademisë së Shkencave të Kinës dhe zv/drejtor i përgjithshëm i Shoqërisë Aksionare të Naftës të Kinës, z. Jia Chengzao, tha se zbulimi i fushës së re naftëmbajtëse ka rëndësi shumë të madhe për të garantuar sigurinë kombëtare të naftës dhe gazit. Krahas thellimit të punës së kërkimit, do të vazhdojë edhe zbulimi.

"Kjo fushë e madhe u zbulua në zonën e zhvillimit ekonomik të Kinës Lindore që ndodhet afër Pekinit. Kështu ajo ka rëndësi shumë të madhe politike dhe ekonomike për garantimin e sigurisë kombëtare të naftës dhe gazit. Vitaliteti i burimeve të ultësirës së gjirit të detit Buohai është shumë i madh dhe ka mundësi dhe vitalitet për zbulimin e fushës së madhe naftëmbajtëse".

"Tani, Kina është vendi i 2-të më i madh konsumues i naftës në botë pas SHBA-së dhe vendi i 3-të më i madh importues i naftës në botë. Shumë njerëz janë të mendimit se zbulimi i fushës naftëmbajtëse Nanpu do të ndryshojë gjendjen e vështirë të mungesës së energjisë në Kinë dhe do të lehtësojë presionin e kursimit të energjisë dhe të uljes së konsumit të Kinës.

Për këtë, anëtari i Akademisë së Shkencave të Kinës Zhang Zhonghua tha: "Unë jam i mendimit se zbulimi i fushës naftëmbajtëse Nanpu nuk mund të ndryshojë plotësisht gjendjen e vështirë të mungesës së energjisë në Kinë, sepse krahas zhvillimit të mëtejshëm të ekonomisë dhe ngritjes së mëtejshme të nivelit të jetesës, në fakt Kina ka hyrë në hovin e konsumit të veturave, prandaj kërkesa për naftë do të jetë gjithnjë e më e madhe".

Drejtori i Institutit të studimit të energjisë pranë Komisionit shtetëror të zhvillimit dhe të reformës të Kinës, z. Zhou Dadi, është i mendimit, gjithashtu, se rezerva e naftës prej një miliard tonësh nuk mund të tregojë se sasia e nxjerrjes së naftës do të jetë një miliard tonë. Zbulimi i fushës së re nuk mund të ndryshojë plotësisht gjendjen e kërkesës së madhe të Kinës për importimin e naftës.

Specialistët janë të mendimit se njerëzit duhet të ruajnë gjakftohtësinë. Për sa i përket Kinës, duhet të vazhdojmë të ngulim këmbë në balancën e shfrytëzimit dhe kursimit, në mënyrë që burimet e shtrenjta të naftës të shfaqin efektivitet më të madh dhe më të mirë. Zoti Zhang Zhonghua tha se kursimi i energjisë do të jetë gjithmonë objektivi i përbashkët në zhvillimin e ekonomisë kineze. (Sihai)