Dëgjoni

Në veprimtarinë e Festivalit të 7-të Artistik "Takimi në Pekin" të sapo përfunduar, drama e regjisorit tajvanez Li Guoxiu "Shamlet" u shfaq për herë të 100-të. Shikuesit e Pekinit ndien magjinë e dramës tajvaneze.

Në vitin 1992, drama "Shamlet" u shfaq për herë të parë në Tajvan. Deri tani, shikuesit që kanë parë këtë dramë e kanë kaluar numrin 100 mijë. Kjo dramë është përpunuar mbi bazën e tragjedisë së dramaturgut anglez Uilliam Shekspir "Hamleti" dhe përshkruan tregimet interesante gjatë shfaqjes së dramës "Hamlet" nga një trupë drame.

Li Guoxiu tha se atij i pëlqen shumë "Hamleti", por nuk dëshiron të kopjojë interpretimin e vendeve të tjera. Ai e përpunoi këtë dramë klasike për t'u dhënë shikuesve hapësirën e imagjinatës. Li Guoxiu tha:

"E përpunova tragjedinë 'Hamlet' duke e shndërruar në një komedi. Jam shumë i kënaqur që shikuesit e përshëndesin shumë eksperimentin tim."

Li Guoxiu lindi në vitin 1955 në Tajvan. Në fillim ai ishte një aktor drame. Kur ishte në universitet, 18-vjeçari Li Guoxiu filloi të interpretojë në skenën e dramës. Në një dramë, ai luajti 22 role, ky rekord nuk është thyer deri më sot në Tajvan.

Në vitin 1986, Li Guoxiu krijoi trupën teatrore "Pingfeng" dhe filloi të shkruajë vetë skenarë drame dhe të bëhet regjisor. Për shkak të përvojës si aktor, Li Guoxiu i njeh mirë kërkesat e shikuesve. Drama e parë e krijuar nga ai pati sukses të madh. Pas kësaj, Li Guoxiu provoi të krijojë drama të shumëllojshme duke përfshirë tragjedinë, komedinë etj.

Në vitin 1990, në bazë të një çështjeje penale të vrasjes së një vajze japoneze gjatë turizmit në Tajvan, Li Guoxiu krijoi dramën "Kompania Jiuguo" për të pasqyruar problemet e policisë gjatë zgjidhjes së çështjes. Qysh nga ajo kohë, veprat e Li Guoxiut u kanë kushtuar më shumë vëmendje problemeve shoqërore.

Drama "Vendlindja" është një vepër e tillë. Në Tajvan ka shumë veteranë të ardhur nga pjesa kontinentale. Ata jetojnë në vështirësi dhe shpresojnë shumë të shkojnë prapë në vendlindje. Drama "Vendlindja" përshkruan një tregim prekës: Në një sallë këngësh në Tajpei, një këngëtare këndon posaçërisht këngë malli për vendlindjen. Shumë veteranë shkojnë atje për të dëgjuar këngët duke shprehur ndjenjat e thella për vendlindjen. Gjatë shfaqjes së dramës në Tajvan, shumë shikues u përlotën.

Shumë shikues u shprehën se drama e Li Guoxiut i ngjan një filmi, koha e hapësira këmbehen lirisht sipas zhvillimit të tregimit. Li Guoxiu u shpreh se veprat e tij vijnë nga përshtypja e përvoja për jetën:

"Materialet e krijimtarisë sime vijnë nga jeta. Në veprat e mia nuk ka një stil të posaçëm, dua të shfaq temën kryesore në forma të ndryshme."

Deri tani, Li Guoxiu ka krijuar mbi 30 vepra. Ai u shpreh se në fillim, veprat e tij nuk ishin shumë të pjekura. Nëpërmjet praktikës shumë vjeçare, tani krijimtaria e tij është pjekur shumë. Ai u ka kushtuar më shumë vëmendje hollësive me qëllim që shikuesit të shohin një shfaqje më të shkëlqyer.

Njëkohësisht, Li Guoxiu nuk është i kënaqur për rezultatet e arritura. Ai sfidon pandërprerë veten dhe shpreson të krijojë vepra më të mira. Li Guoxiu tha:

"Shumë miq më kanë pyetur se cila vepër më pëlqen më shumë. Përgjigjja ime është gjithmonë 'vepra e ardhshme'. Nuk jam kurrë i kënaqur me veprat e kaluara."

Tani dëshira më e madhe e Li Guoxiut është që trupa "Pingfeng" të zhvillohet më tej dhe të shtohen më shumë aktorët e shikuesit e dramës. Ai u shpreh se këtë herë shfaqja e 100-të e dramës "Shamlet" në Festivalin "Takimi në Pekin" është një nisje e re për trupën "Pingfeng" dhe do të nxitë shkëmbimet me qarqet e dramës dhe shikuesit e pjesës kontinentale. (Fani)