Me zhvillimin e shkencës dhe teknikës, aparatet e informacionit, si kompjuteri, celulari etj. përdoren gjerësisht në punë, mësim dhe jetën e përditshme. Mirëpo pjesa më e madhe e teknikës thelbësore të prodhimit të tyre ka qenë në duart e vendeve të pakta të zhvilluara të Evropës Perëndimore dhe të Amerikës Veriore dhe CPU-ja (njësi qendrore e përpunimit të të dhënave në sistemin kompjuterik), që quhet "motori" i mjeteve të informacionit, prodhohej vetëm nga SHBA dhe Japonia.

Në vitin 2001 Kina filloi eksperimentimin për prodhimin e CPU-së dhe pas një viti prodhoi me sukses CPU-në e markës kineze "Loongson-1", gjë që i dha fund historisë kur Kina importonte CPU për prodhimin e kompjutereve. Më pas, Kina filloi eksperimentimin për prodhimin e serisë së CPU-ve "Loongson-2". Tani CPU-ja "Loongson-2E", njëra prej kësaj serie, ka filluar të prodhohet në përpjesëtime të mëdha për qëllim tregtie. Në saje të bashkëpunimit të ndërmarrjeve kineze me Korporatën italiane ST Mikro-elektronike, që gëzon famë në botë, CPU-ja e markës kineze "Loongson-2E" do të hidhet së shpejti në tregun ndërkombëtar.

Detyrën e eksperimentimit për prodhimin e serisë së CPU-ve "Loongson" e ka marrë përsipër Instituti Studimor i teknikës së kompjuterit pranë Akademisë së Shkencave të Kinës me përkrahjen e fuqishme të qeverisë kineze, e cila pagoi të gjitha shpenzimet e eksperimentimit. Bashkëpunëtori shkencor i këtij instituti, Hu Veivu që përgjigjet për këtë punë, thotë se që në vitin 2005 instituti i tij filloi eksperimentimin për prodhimin e CPU-së "Loongson-2E".

"Projektimi i CPU-së Loongson-2E ka arritur nivelin e përparuar botëror. Ajo është CPU e funksioneve të larta, përveç atyre që i prodhuan më parë SHBA dhe Japonia. Shpejtësia e saj e llogaritjes mund të arrijë në 4 miliardë herë në sekondë, kurse konsumi i energjisë është i ulët. Kjo CPU mund të eksportohet në sasi të madhe, sepse është realizuar prodhimi në seri i çipeve të saj."

Mbi bazën e CPU-së "Loongson-2E", kanë filluar të prodhohen një seri produktesh të informacionit, si kompjuteri i dorës që quhet laptopi, kompjuteri i tavolinës, televizori dhe sistemi multimedia në automjet. Disa ndërmarrje të njohura brenda e jashtë vendit, si Korporata Mikrosoft dhe korporata Hsinhua kanë nënshkruar marrëveshje, sipas të cilave do t'i ofrojnë CPU-së "Loongson-2E" software përkatëse të sistemit të punës dhe të mjeteve të zyrës.

Tani Korporata Aksionare tekniko-shkencore "Zhongke Longmeng" e provincës Gjangsu ka filluar provën e shitjes së kompjutereve që prodhon ajo me CPU-në "Loongson-2E" si detal kyç. Ky lloj kompjuteri kushton vetëm 1599 juanë dhe peshon më pak se 1 kilogram, sa një e dhjeta e korpusit të kompjuterit tradicional, ndërsa sasia e konsumit të energjisë është sa një e pesta e kompjuterit tradicional.

Zoti Li Guogje, drejtor i Institutit Studimor të Teknikës së Kompjuterit pranë Akademisë së Shkencave të Kinës, është i mendimit se prodhimi me sukses i CPU-së së markës kineze "Loongson-2E" dhe hedhja e saj në treg tregojnë se Kina ka korrur sukses kapërcyes në lëmin e teknikës më thelbësore të industrisë së informacionit, gjë që ka rëndësi të madhe pozitive për zhvillimin e teknikës së informacionit në Kinë dhe në gjithë botën.

"Me kompjuteret dhe laptopet private, plotësohen kryesisht kërkesat e njerëzve me konsum të lartë, por ne duhet medoemos të prodhojmë dhe të popullarizojmë kompjuteret për konsumatorët me të ardhura të ulëta. Me prodhimin e CPU-së Loongson, mund të ndryshojë struktura e ardhshme e tregut botëror të CPU-së. CPU-ja Loongson do të japë kontribut historik në progresin global të uljes së kostos së prodhimit të mjeteve të informacionit."

Nëpërmjet bashkëpunimit me Korporatën italiane ST Mikro-elektronike, CPU-ja Loongson-2E me patentën kineze do të përhapet në mbarë botën. Zv-drejtori i kësaj korporate italiane, Gian Luka Bertino thotë se CPU-ja Loongson-2E ka epërsi konkurruese të konsumit të ulët të energjisë dhe të konstos së ulët të prodhimit dhe ka marrëdhënie të mira të plotësimit reciprok me produktet ekzistuese të Korporatës italiane ST Mikro-elektronike.

"Korporata ST Mikro-elektronike bashkëpunon me kënaqësi me Institutin e teknkës së kompjuterit pranë Akademisë së Shkencave të Kinës. Jemi të gatshëm të përdorim pajisjet dhe teknikën tonë në prodhimin e CPU-së Loongson-2E. Do të bëhemi partnerë të ngushtë në bashkëpunim." (Zheng)