Dëgjoni

Në Kampionatin botëror të Taekuondos, që përfundoi ditët e fundit në Pekin, ekipi kinez fitoi 2 medalje ari dhe një medalje bronzi, gjë që shënoi rezultatin më të mirë në historinë e tij. Në ditën e fundit të ndeshjeve, sportistja e njohur kineze Chen Zhong, kampione në lojëra olimpike, fitoi titullin e kampiones në grupin e peshën 72 kilogramë për femra, duke realizuar me sukses ëndrrën e saj për të fituar titullin e kampionit të lojërave olimpike, kampionatit botëror dhe të kupës botërore. Në minirubrikën "Sporti i Kinës", do të dëgjoni korrespondencën me titull "Sportistja kineze Chen Chong fitoi medalje ari në Kampionatin botëror të Taekuondosë".

Si një sportiste e njohur botërore e taekuondosë, Chen Zhong 25 vjeçare kishte fituar më parë titullin e kampiones në dy edicione të lojërave olimpike, një medalje ari në kupën botërore dhe një medalje ari në lojërat aziatike. Asaj i mungonte vetëm një medalje ari në kampionat botëror për ta bërë ëndrrën e saj realitet. Gjatë këtij kampionati, Chen Zhong fitoi të 4 raundet e para të ndeshjeve me epërsi të madhe, edhe pse kishte një plagë. Në finale, ajo mundi sportisten jugkoreane Han Jin Sun dhe fitoi titullin e kampiones. Pas ndeshjes, Chen Zhong shkoi e emocionuar rreth e përqark fushës sportive me flamurin kombëtar në krahë, për t'u shprehur falënderime spektatorëve sportdashës. Në intervistë me gazetarët, ajo tha me krenari se ajo u përpoq sa duhej!

"Kësaj here, e fitova titullin e kampionit tek porta e shtëpisë sime, në Pekin, në Kinë! Kjo është një gjë kuptimplot! Kur u ngrit flamuri ynë kombëtar dhe u ekzekutua hymni ynë kombëtar, mu mbushën sytë me lot. E ndieva se u ngrita përsëri më këmbë. Unë veprova mirë."

Sekretari i Shoqatës Kineze të Taekuondos, Zhao Lei tha plot me emocion se Chen Zhong kishte bërë stërvitje sipas standardeve të larta dhe kërkesave të rrepta. Suksesin e sotëm ajo e korri në saje të djersës që ka derdhur. Zhao Lei tha se sporti i taekuondosë kërkon aftësi të madhe trupore, aftësi për t'u rezistuar goditjeve dhe teknikë të lartë. Prandaj, sportistët duhet të bëjnë stërvitje profesionale për një kohë të gjatë. Chen Zhong e filloi stërvitjen në vitin 1995 dhe hyri në ekipin kombëtar në vitin 1997.

"Afati i stërvitjes ka shumë rëndësi për sportistët. Chen Zhong bëri stërvitje për një kohë të gjatë. Prandaj ajo është e pjekur në teknikë, taktikë, psikologji etj."

Duke shikuar paraqitjen e shkëlqyer të Chen Zhong-ut, nëna e saj Zhang Meiying dukej shumë e qetë. Ajo e dinte se Chen Zhong e talentuar dhe e zellshme me siguri do të bënte ëndrrën realitet.

"Për mua, Chen Zhong është një vajzë shumë e butë. Është e rritur, por akoma duket si fëmijë e përkëdhelur."

Zhang Meiying tha se bijës së saj i pëlqen më shumë të hajë makarona me vezë të gatuara nga e ëma. Prandaj, ajo do të gatuajë një tas makarona me vezë për ta kënaqur.

Sportistja e vogël Wu Jingyu, e cila mori medaljen e parë të artë në këtë kampionat, tha se Chen Zhong nuk hiqet si ylli sportiv dhe vepron si motër sportistet e vogla.

"Motra Chen Zhong është gjithmonë shembull nga e cila duhet të mësoj. Ajo kujdeset shumë për sportistet e vogla."

Chen Zhong gjithmonë i thotë Wu Jingyu-t se në ekipin kombëtar çdokush duhet të mësojë për të jetuar në mënyrë të pavarur. Ajo thotë se çdo njeri ka të metate veta dhe kyçi është që të dijë sesi të ndreqë të metat.

Chen Zhong doli figura e parë në taekuondo në saje të karakterit të fortë, të përpjekjeve të pandërprera dhe të besimit të plotë. Në kohën kur po afrohen Lojërat Olimpike të Pekinit të vitit 2008, Chen Zhong ka shprehur dëshirën që të vazhdojë përpjekjet ashtu si në të kaluarën, për të mbrojtur titullin kampion edhe në Lojërat Olimpike të Pekinit. (Shy Guan)