dëgjoni

Eglantina Kume kujtoi edhe një ngjarje tjetër të lidhjes me një balerinë kineze kur ishte pioniere.

"Kur isha në aeroplan duke ardhur, m'u kujtua një episod tjetër me Kinën. Kur isha 14 vjeçe, në qytetin tim të lindjes, Durrës, erdhën disa kinezë. Nuk e di se çfarë ishin, se nuk e mbaj mend, por i sollën me autobusë dhe ne që ishim nxënës të dalluar na nxorën aty që t'i shoqëronim. Shkuam të gjithë së bashku që të hanim dhe pinim diçka në një tavolinë.

Ata ishin më të rritur se ne, ishin të rinj, kurse ne ishim pionierë. Dhe unë u miqësova me një kineze. Ato kërcenin balet dhe ishin shumë të reja në moshë, kurse ne ishim më të vegjël. Unë u miqësova shumë me një nga balerinat, ajo ishte shumë e bukur, e gjatë dhe me flokë të mbledhura nga mbrapa.

Më vonë ne i shkruam diçka njëra-tjetrës dhe mbaj mend që unë përdora stilolapsin e saj, pasi në fund ajo ma fali stilolapsin mua. Kjo më bëri shumë përshtypje dhe më vinte turp, sepse ajo më fali diçka, por unë nuk kisha asgjë që t'i jepja si këmbim.

Po jashtë kishte një lulishte dhe unë shkova me vrap këputa një lule, ajo e mori duke qeshur dhe u përqafuam. Kur autobusi u largua, të gjithë u ulën, kurse ajo, që kishte veshur një bluzë të kuqe, vajti tek dritarja në fund të autobusit dhe më përshëndeste me dorë, vetëm ajo. Në ato momente nuk e kisha mendjen, por shokët e shoqet e mia po thërrisnin: 'Ej, Eglantina, Eglantina, kinezja jote po të përshëndet nga autobusi'. Pastaj dhe unë ngrita dorën, kurse ajo po tundte lulen..."

Znj. Eglantina më rrëfeu gjithashtu se: "Vajza ime do të vijë me një koncert që do të japë Orkestra Simfonike e Radio-Televizionit Grek. Vajza quhet Migeni dhe është violiniste në Televizionin Grek. Do të vijë Orkestra e Televizionit Grek, që quhet 'ERT', për të dhënë një koncert në Kinë brenda këtij viti, por nuk e di datën e saktë. Kështu që ka mundësi që ju ta takoni kur ajo të vijë këtu. Ata kanë lidhur një kontratë, por nuk jam e sigurt se me cilin, me Radio-Televizionin Kinez apo me Ministrine kineze të Kulturës, këtë nuk e di. Por, kontratën e kanë nënshkruar dhe pritet që të vijnë...

Ajo shkon shpesh në vende të ndryshme të botës për shfaqje, sepse gjithmonë Orkestra e Radio-Televizionit Grek lidh kontrata. Ajo ka shkuar shpesh në Qipro, Hungari, Amerikë, do të shkojë edhe në Suedi. Kur të kthehem në Greqi, do t'i tregoj vajzës përshtypjet e mia për Kinën dhe ajo do t'i shikojë vetë me sytë e saj".

Pastaj ne biseduam gjerë e gjatë edhe për çdo gjë tjetër që ishte me interes për ne.

"Mësove të reja shumë nga Helio?"

Pastaj, ata vlerësuan lart edhe përkujdesjen e treguar për ta.

Koha kaloi shumë shpejt, ne miqtë do të ndaheshim në aeroportin "Shoudu" të Pekinit.  

"Edhe ti në punën tënde yll je. Je e mirë, diskutonim edhe me Lidën. Je fantastike, je e mrekullueshme.

Gjynah që ikën vitet dhe dole në pension. Je organizatore shumë e mirë dhe je njeri edhe më i mirë mbi të gjitha. Ne e kemi ndier shume mirësinë tënde. Mua këto ditë shpeshherë me ka prekur mirësia jote, d.m.th. deri ato imtësitë e tua, për çdo gjë, për profesionalizmin; më le përshtypjet më të mira.

Do lidhemi me e-mail që të marrësh informacione nga Klubi 'Drita', kështu quhet...", më tha ajo.

Kështu me të vërtetë, unë kam lidhur miqësi me familjen e znj. Eglantina dhe tani shkëmbejmë shpesh mendime me anën e internetit në MSN.

Urojmë që kjo miqësi dhe lidhje të jenë të forta dhe të shkojnë sa më mbarë!