Para disa kohësh, me ftesën e prezantuesit të njohur të CCTV-së dhe producentit të rubrikës "Magjia e filmave artistikë", z. Cui Yongyuan, erdhën për vizitë dhe për të dhënë intervista për këtë rubrikë znj. Eglantina Kume dhe znj. Elida Cangonji, që kanë luajtur përkatësisht rolet kryesore në filmat artistikë shqiptarë "Ngadhënjim mbi vdekjen" dhe "Rrugë të bardha", të mirëpritur shumë në vitet '70 të shekullit të kaluar nga spektatorët kinezë.

Prezantuesi shumë i mirënjohur kinez dhe producenti i kësaj rubrike, z. Cui Yongyuan, pati një takim me to dhe shtroi një darkë karakteristike kineze për nder të tyre, duke u dhuruar edhe dhurata të çmuara për kujtim.

Mikpritja e miqve kinezë u lanë përshtypje shumë të thella këtyre dy aktoreve të njohura shqiptare, që jetojnë tani përkatësisht Elida në Francë dhe Eglantina në Greqi.

Vetëm gjatë 5 ditëve të qëndrimit në Pekin, znj. Eglantina shtoi dy kile për shkak të ushqimeve të shumëllojshme karakteristike kineze.

"Kishte peshore në hotel, u peshova dhe kisha shtuar dy kile, sepse kam ngrëne tri herë në ditë këtu dhe shumë. Kurse në shtëpi në mëngjes pi vetëm një gotë qumësht ose lëng frutash, në drekë ha një gjellë me perime si gatuhet në Shqipëri, si edhe një sallatë me pak bukë të zezë, sepse buka e zezë nuk të shëndosh, kurse në darkë ha vetëm sallatë ose kos. Ky është ushqimi im, në fakt unë ha shumë pak, prandaj nuk shëndoshem."

Kur po e përcillja Eglantina Kumen dhe të birin Helio në aeroportin "Shoudu" të Pekinit, ne biseduam gjerë e gjatë, duke e njohur njëri-tjetrin me gjendjen në Kinë e në Shqipëri, me emigrantët shqiptarë në Greqi dhe në vende të tjera dhe për ndjenjat e miqësisë që ushqejnë ata.

Gjatë bisedës, znj. Eglantina Kume më tha : "Ne në shtëpinë tonë gjithmonë bisedojmë për Kinën, sepse ajo ka qenë shumë e njohur për ne nga Fatmiri, bashkëshorti im, që ka qenë në Kinë, dhe nga unë, që e dija që filmi 'Ngadhënjim mbi vdekjen' kishte sukses të madh në Kinë. Unë gjithmonë kam pasur dëshirë që të vija këtu, sepse Kina ka pasur një lloj lidhjeje me familjen tonë në këto dy gjëra."

Znj. Eglantina Kume na tregoi disa nga kujtimet e paharrueshme të të shoqit gjatë vizitës që ai bëri përpara 40 vjetësh në Kinë.

"Kur erdhi burri im në Kinë, u sëmur dhe donin ta operonin, por ai nuk pranoi, pasi donte të operohej në Shqipëri, për arsye se po të qëndronte të operohej në Kinë do t'i duhej një kohë shumë e gjatë dhe do të ngelej atje vetëm. Por ai qëndroi për trajtim për disa kohë në spital. Aty ngjitur me dhomën e burrit ishte shtruar një aviator, i cili kishte shpëtuar pas rënies së avionit, ai kishte dy muaj që rrinte në spital. Burrin tim nuk e linin të dilte, ai ruhej nga disa ushtarë, sepse Ansambli ishte ushtarak. Në një moment ai i thotë ushtarit: 'Të lutem, të dal pak përjashta, se nuk mund të rri dot më brenda', dhe ushtari e lejoi. Në korridor burri pa këtë aviatorin, i cili po shëtiste aty pranë tij. Pasi mori vesh që burri im ishte shqiptar, e ftoi në dhomën e tij. Sa futet në dhomë, im shoq shikon fotografinë time të ngjitur në mur dhe nuk foli asnjë fjalë, kurse aviatori i tha: 'E di pse të solla këtu? Dua të të pyes, a di hollësira për këtë aktoren, se unë e simpatizoj shumë'. Dhe burri iu përgjigj: 'Po, di hollësira, ajo është gruaja ime'.