Në këtë program do t'ju paraqit disa këngë të kënduara nga këngëtari i kombësisë mongole Aribujie. Së pari ju ftoj të ndiqni këngën: "Rrafshnalta e kaltër mongole". Kënga përshkruan me melodi lirike dhe të shtruar peizazhin natyror të rrafshnaltës mongole dhe dashurinë e blegtorëve për vendlindjen.

Në këngë thuhet: "Vargmalet e pafund shtrihen larg, çadrat mongole qëndrojnë si rosa të egra, një karrocë Lele ecën pas diellit në horizont, legjendat e bukura mbrojnë stepën tonë. Oh, rrafshnaltë e kaltër mongole, të fal dashurinë time, të shpreh urimet e mia."

Aribujie është një bariton i njohur për interpretimin e këngëve mongole në mënyrën evropiane të këndimit. Aribujie, mbi 60 vjeçar, ka lindur në një familje blegtore të stepës së Mongolisë së Brendshme të Kinës veriore. Ai ka zë kumbues të natyrshëm dhe e njeh shumë mirë muzikën. Kur ishte 17 vjeç, ai hyri në një ansambël artistik të zonës ushtarake të Mongolisë së Brendshme, dhe pastaj mbaroi Konservatorin e Shanghait, ku mësoi mënyrën evropiane të këndimit. Tani ai punon si solist në Ansamblin Artistik të Trupave të Policisë së Armatosur të Pekinit.

Të dashur dëgjues, kënga që ndoqët titullohet: "Kënga e bariut të stepës", kënduar nga Aribujie. Besoj se zëri kumbues i Aribujie-së dhe ndjenjat e tij të përzemërta ju kanë sjellë në stepën e madhe mongole, ku rritet hijshëm bari i gjelbër, lëshohet aroma e qumështit dhe dëgjohet kënga e bukur e bariut, në mënyrë që ju të shijoni bukurinë e stepës dhe ndjenjat e përzemërta të blegtorëve.

Gjatë karrierës së tij artistike shumëvjeçare, Aribujie ka fituar timbër të gjerë. Në këngët e tij mund të ndiejmë krenarinë e kombësisë mongole dhe karakterin serioz prej ushtaraku. Këngët e kënduara prej tij "Gadameilin", "Shala e gdhendur", "Në stepë ngrihet dielli i paperënduar" etj. Janë pritur ngrohtësisht nga adhuruesit e tij. Më poshtë do të shijojmë së bashku këngën "Shala e gdhendur", e cila përshkruan kujtimet e bukura të mongolëve të larguar nga stepa për jetën e fëmijërisë.

Në këngë thuhet: "Kur isha shumë i vogël, kam pasur një djep misterioz, i cili ishte një shalë e gdhendur që më shoqëronte në fëmijërinë time të artë. Shala e gdhendur është djepi ku jam rritur..."

Aribujie i gëzon të tjerët me këngët e tij të bukura dhe ka arritur frute të bollshme. Ai ka organizuar me sukses koncerte në Pekin, në Mongolinë e Brendshme dhe në Mongoli. Ai ka nxjerrë dy albume, përkatësisht me titull "Malli për vendlindjen" dhe "I këndoj stepës". Tani le të ndjekim këngën popullore mongole "Gadameilin", kënduar nga Aribujie në gjuhën mongole. Gadameilini është heroi i kombësisë mongole. Kjo këngë rrëfen bëmat e Gadamelinit, që e drejtoi popullsinë mongole në kryengritje kundër fesnikëve feudalë dhe militaristëve për mbrojtjen e stepës dhe popullit.

Përveç shfaqjeve, Aribujie merr pjesë aktivisht në aktivitetet shoqërore. Ai është anëtar i Shoqatës së Muzikës Vokale të Kombësive të Kinës, anëtari i Shoqatës Kineze të Korit etj.

Në fund të programit të sotëm, të dashur dëgjues, le të dëgjojmë këngën "Stepa fatmirë". Në këngë thuhet: "Një këngë e lashtë është përhapur brez pas brezi, edhe blegtorët trashëgohen brez pas brezi. Mbarësia nuk mund të ndahet nga kali, stepa fatmirë është mbështetja e kombësisë së rritur mbi shpinën e kalit."  (Pina)