Dëgjoni

Është një punë krijuese që të lidhen Lojërat Olimpike me peizazhin e bukur të një parku të Pekinit. Aq më tepër, do të jetë një kënaqësi e madhe që të shikoni disa ndeshje sportive të nivelit të lartë në një mjedis me gjelbërime të dendura, me ajër të pastër dhe me qetësi. Gjatë Lojërave Olimpike të Pekinit, ndeshjet e qitjes me hark, të tenisit dhe të hokejit mbi bar do të zhvillohen pikërisht në një park pyjor të Pekinit që quhet "oazë në mes të qytetit". Po të niseni me makinë nga një pikë e vijës boshtore të rrugës veriore të unazës së dytë të Pekinit, pas gjysmë ore do të gjendeni në mes të kësaj oaze, që ka marrë emrin Parku Pyjor i Olimpiadës.

Ky park pyjor, që filloi të ndërtohet më 30 qershor të vitit 2005, ka një sipërfaqe prej 680 hektarësh. Në zonën jugore të saj gjenden fushat sportive të hokejit mbi bar, qitjes me hark dhe tenisit të Lojërave Olimpike të Pekinit të vitit 2008. Ndër to, fusha e hokejit mbi bar ka një sipërfaqe prej 11.87 hektarësh dhe 17 mijë vende për spektatorë sportdashës. Fusha e qitjes me hark ka një sipërfaqe prej 9.22 hektarësh dhe 5000 vende. Në qendrën e tenisit do të ndërtohen 10 fusha ndeshjesh dhe 6 fusha stërvitjesh. Në gjithë qendrën e tenisit do të ketë gjithsej 17 mijë e 400 vende për spektatorë. Fusha e hokejit mbi bar dhe fusha e qitjes me hark do të jenë fusha sortive të përkohshme dhe pas Lojërave Olimpike të Pekinit do të shndërrohen në lëndinë artificiale pranë parkut. Kurse fusha e tenisit do të mbetet përgjithmonë një fushë sportive që do të shërbejë si qendra kombëtare e stërvitjeve të tenisit dhe si një terren aktivitetesh sportive të qytetarëve.

Tema e projektuar e këtij parku pyjor është "vija boshtore drejt natyrës". Kuptimi i kësaj teme është që paizazhi artificial i qytetit dhe mjedisi natyror të shkrihen në mënyrë të përsosur në një të tërë dhe që të paraqiten para qytetarëve si një "pyll ekologjik" që "buroi nga natyra dhe mbeti mbi natyrën". Ndërsa "vija boshtore drejt natyrës" shpjegohet më mirë me një "sallon" të veçantë të këtij parku pyjor.

Rruga veriore e unazës së 5-të të Pekinit, që është një autostratë, e ndan natyrshëm parkun pyjor në dy zona, zona jugore dhe zona veriore. Këto dy zona lidhen me një "sallon" të gjelbërimeve, që gjendet në vijën boshtore të Pekinit dhe që kalon rrugën e unazës së 5-të. Ky "sallon", që projektuesit e quajtën "sallonin ekologjik", duket si një urë udhëkalimi dhe sipërfaqja e tij është mbuluar me bimë të ndryshme, si drurë, shkurre dhe barëra, në të cilat dëgjohen cicërima zogjsh dhe kandrrash, madje disa lloje qeniesh të gjalla, si krimbat e dheut, milingonat e tjera, shkojnë dhe kthehen lirisht midis zonave jugore dhe veriore nëpërmjet kësaj ure udhëkalimi. Në këtë mënyrë, mbrohen qeniet e gjalla të vogla dhe vendstrehimi i tyre dhe mëtej garantohet siguria ekologjike e qytetit.

Projektuesit kanë marrë masa të shumta që të pakësohet ndikimi negativ i aktiviteteve të njeriut mbi mjedisin natyror të parkut dhe që ky pyll artificial të bëhet sa më "natyror". Në projektimin e pajisjeve të ndriçimit, ata kanë marrë parasysh mbrojtjen e hapësirës natën, që të mbrohet liria e kafshëve për të vepruar natën dhe që qytetarët mund të shohin yjet. Ata kanë marrë parasysh edhe izolimin e zhurmave të qytetit dhe krijimin e zhurmave natyrore, duke shfrytëzuar relievin e parkut. Pjesa në skajin fundor të tokës kënetore të parkut është mbjellën me bambu dhe pisha dhe atje është hapur një "kanal për kalimin e erës", në mënyrë që të krijohen shushurima të këndshme të bambusë dhe të pishave.

Tashmë kanë përfunduar në përgjithësi punimet për pyllzimin e zonës veriore të parkut pyjor të Olimpiadës dhe 80% të punimeve për pyllzimin e zonës jugore të tij. Si rezultat, gjelbërimet e këtushme tregojnë bukurinë e tyre fillestare. Por ende duhet një kohë e gjatë për formimin e një sistemi të qëndrueshëm ekologjik të këtij parku të pyllit artificial, që do të luajë gradualisht rolin e tij ekologjik pas Lojërave Olimpike. Ai do të luajë rolin për përmirësimin e cilësisë së ajrit të Pekinit dhe, si një brez zbutës midis qytetit dhe periferisë, do të luajë edhe rolin e pakësimit të ndotjes së ajrit të qytetit që quhet si efekti i "ishullit të nxehtësisë", duke u bërë me të vërtetë "mushkëritë e gjelbra" të Pekinit. (Zheng)