Dëgjoni

Çdo vit, në kuadrin e 1 Majit, ditës ndërkombëtare të Punonjësve, kinezët kanë 7 ditë pushimi dhe, sa herë që vjen kjo festë, është shumë i zënë Yang Kai, menaxheri tregtar i materialeve sportive i Mapos "Hua Tang" të Pekinit. Kështu ka qenë edhe sivjet. Zoti Yang Kai thotë se gjatë ditëve të festës Mapoja e tyre ishte mbushur plot me klientë.

Zoti Yang Kai u shpreh se në festën e Një Majit të vitit të kaluar, vlera e përgjithshme e materialeve sportive të shitura brenda asaj jave ishte mbi 10 mijë juanë më shumë se në javët e tjera. Sivjet, përqindja e rritjes gjatë kësaj feste ishte edhe më e madhe.

"Edhe në të kaluarën, gjatë ditëve të festave shiteshin në sasi të madhe mallrat e sportit. Të rinjtë blejnë rroba ose këpucë sportive, me çmime të ulëta. Punonjësit me rrogë të lartë blejnë mjetë sportive, si raketa tenisi, pajisje për alpinizëm etj. Klientët blejnë shpejt dhe ne shesim shpejt."

Zoti Xiong Gang, që punon në një ndërmarrje me investime të huaja në Pekin, është një adhurues i ushtrimeve gjimnastikore. Para disa vjetëve, ai bleu një kartë anëtarësie të klubit të gjimnastikës "Zhongti Beili", duke u bërë një gjimnast zyrtar. Ai tha se duke e blerë këtë kartë, ai pati qëllim për forcimin e shëndetit. Sa herë që vijnë 7 ditët e pushimit në kuadrin e Një Majit, ai shqetësohet se klubet e gjimnastikës mbushen plot me njerëz. Ai vazhdon ushtrimet edhe në ditët e zakonshme, por nuk e pëlqen këtë situatë.

"Kam rreth 3 vjet që e kam blerë këtë kartë. Meqë m'u shtuan të ardhurat, unë duhet të konsumoj jo vetëm për ushqime dhe për turizëm, por edhe për forcimin e shëndetit. Kur u afrua Festa e Një Majit, gjimnastët që vijnë shpesh në palestër shqetësohen më shumë për ditët e pushimit të gjatë. Vitin e kaluar, të gjitha klubet u mbushën me njerëz."

Zënia me punë e zotit Yang Kai dhe meraku i zotit Xiong Gang tregojnë se vitet e fundit shpenzimet për forcimin e shëndetit po bëhen një pjesë e rëndësishme e shpenzimeve të qytetarëve kinezë gjatë ditëve të pushimit dhe të festave. Specialistët përkatës mendojnë se kjo dukuri ka rëndësi pozitive. Ajo tregon që njerëzit e pasur në Kinë kanë filluar të synojnë një mënyrë jetese më me cilësi.

Por, vrulli i forcimit të shëndetit gjatë ditëve të festave tregon nga ana tjetër se një pjesë e madhe e qytetarëve kinezë nuk kanë zakon për kalitje fizike në ditët e zakonshme. Sipas një ankete të bërë nga Drejtoria e Përgjithshme Shtetërore Kinze e Fizkulturës dhe Sporteve, kinezët që ngulin këmbë në kalitjen e përditshme përbëjnë më pak se 40% të popullisë së Kinës. Kjo nuk është një përqindje e kënaqshme. Dhe shumica e njerëzve që vazhdojnë kalitjen fizike janë njerëz të moshuar, nxënës dhe studentë. Të rinjtë në moshën e punës përbëjnë një përqindje më të vogël. Por, ishte një gjë shumë interesante që këta të rinjtë janë pjesa kryesore që shpenzojnë për forcimin e shëndetit në ditët e festave. Specialistët kanë vënë në dukje se nuk mund të realizohet efekti i forcimit të shëndetit nëpërmjet ushtrimeve vetëm për një periudhë të shkurtër 7-ditore.

Drejtorja e Institutit të Fizkulturës Shoudu të Pekinit, zonja Wang Kaizeng, u shpreh se shumë punonjës nuk kanë kohë për kalitje fizike. Kur vijnë ditët e pushimit, ata bëjnë shumë ushtrime. Kjo nuk është një metodë shkencore, sepse trupi i njeriut nuk mund t'i përballojë aq shumë ushtrime. Pas ushtrimeve, ata mbeten të rraskapitur. Wang Kaizeng u propozon këtyre njerëzve që të kaliten pak nga pak disa ditë para festës, duke bërë ecje të shpejtë, vrap të ngadalshëm dhe alpinizëm në park.

"Shumë njerëz nuk kanë zakon të kalitjes dhe kjo tregon se shumë kinezëve u mungon koncepti për forcimin e shëndetit. Veçanërisht në një periudhë kalimtare shoqërore, shumë punonjës janë të lodhur me punë dhe ndiejnë presion shumë të madh. Nëse nuk bëjnë kalitje për një kohë të gjatë dhe nuk ndjekin një mënyrë të shëndoshë jetese, ata do të ndodhen në një gjendje të dobët fizike. Sugjeroj se ky grup njerëzish duhet të zgjedhin ushtrimet e përshtatshme. Ka shumë lloje ushtrimesh dhe ata duhet të zgjedhin ato të përshtatshme për ta. Shpenzimi i shumë parave në palestër nuk është mënyra e vetme e kalitjes fizike"

Zonja Wang Kaizeng është e mendimit se në përgjithësi rritja e shpenzimeve për forcimin e shëndetit në ditët e pushimit është një gjë e mirë. Ajo shpreson që punonjësit të vazhdojnë kalitjen edhe në ditët e zakonshme, jo vetëm në ditët e pushimit dhe të festave. (Shy Guan)