Më shumë se 30 mësuese të ardhura nga fshatra të Siçuanit po dëgjojnë leksionin e anglishtes që bën një specialiste e huaj. Ato lexojnë me vëmendje dhe në mënyrë të përsëritur fjalët e anglishtes, duke ndjekur pedagogen e tyre. Atmosfera në klasë është e gëzueshme dhe e ngrohtë.

Ky kurs i posaçëm për specializimin e mësueseve të fshatit u hap në vitin 2003. Çdo vit, rreth 30 mësuese të fshatit të zonave të varfra vijnë për specializim falas në këtë kurs, ku specialistët kinezë dhe të huaj mbajnë leksione për to. Ndër lëndët mësimore të kursit janë gjuha angleze, njohuritë për kompjuter, metodologjia mësimdhënëse, psikologjia arsimore, filozofia, stërvitja fizike etj. Deri tani, mbi 100 mësuese të fshatit janë kualifikuar këtu.

Pas specializimit për një vit në këtë kurs, ato tregojnë përparimin mahnitës në punën e mësimdhënies, edhe pse afati i kursit prej një viti është një kohë e shkurtër. Vajza Kemco e kombësisë tibetiane, që punon si mësuese në një shkollë fillore të pakicave kombëtare të qarkut autonom Ganzi të provincës Siçuan, më parë nuk fliste rrjedhshëm në gjuhën Han, që është gjuha zyrtare kineze, as që mund të dinte të 26 shkronjat e anglishtes. Ndërsa pas 6 muaj mësimi në kurs, ajo filloi të merret vesh me pedagogët e huaj, duke shfrytëzuar ato fjalë anglishte që ka mësuar.

"Unë e di se më parë kam qenë kursistja më e dobët në kursin tonë, ndërsa tani mund të merrem vesh me pedagogen tonë të anglishtes."

Kështu ka ndodhur jo vetëm tek vajza Kemco, por edhe tek të gjitha kursistet e tjera. Pedagogia Li Vei mban mend si tani se si u zhvillua mësimi i gjuhës angleze në ditën e parë të kursit të vitit 2003, që ishte kursi i parë. Atë ditë, në mësimin e parë të gjuhës angleze, askush në klasë nuk mori guxim të lexonte pas pedagoges, madje shumica e kursisteve nuk hapnin dot gojën. Si rrjedhim, shumë veta prej tyre nuk kuptuan asnjë fjalë. Ndërsa pas disa javësh, ato filluan të kuptonin fjalët dhe shprehjet e përdorshme në mësim. Pas gjysmë viti, ato filluan të merren vesh me pedagogen e huaj për gjërat e zakonshme dhe më vonë ato filluan të lexojnë në anglisht, madje disa prej tyre filluan të shkruajnë ditar dhe artikull të shkurtër në anglisht.

Shumë prej mësueseve të kualifikuara janë bërë sot forca kryesore e punës në shkollat e tyre dhe kanë fituar titullin e mësueses së dalluar. Disa thonë se në kursin e specializimit ato mësuan jo vetëm njohuri mbi mësimdhënien, por edhe teori të re dhe të përparuar të arsimit.

Pas specializimit në kurs, mësuesja Peng An-ying e një shkolle fillore të pakicave kombëtare u kthye në shkollën e vet dhe provoi të japë mësimin e gjuhës angleze dhe mësimi i saj u pëlqeu nxënësve.

"Shkolla jonë gjendet në një zonë të prapambetur ekonomikisht dhe asnjëherë nuk pati mësimin e gjuhës angleze. Unë fillova mësimdhënien e anglishtes. Nxënësit dëgjojnë me vëmendje, sepse kanë interes të madh për gjuhët e huaja."

Gjatë specializimit të mësueseve të fshatit, pedagogët i kushtojnë vëmendje edhe brumosjes së tyre me interes të gjithanshëm dhe me prirje artistike. Prandaj, në çdo fundjavë pedagogët dhe kursistet organizohen në aktivitete jashtë orëve të mësimit, shkojnë për të parë ndonjë koncert, për të vizituar ndonjë panair ose ndërmarrje të shkencës dhe teknikës së lartë. Nëpërmjet këtyre aktiviteteve, kursistet mësojnë shumë gjëra, marrin koncept të ri dhe zgjerojnë horizontin e vëzhgimit.

Zoti Qing Guang-ya, si një nga hartuesit dhe zbatuesit e programit të ndihmës për të varfërit në arsim, është i kënaqur dhe optimist për zbatimin e programit të tyre. Ai parashikon se një mësuese e kualifikuar në këtë kurs mund t'u sjelllë të mira 500 nxënësve. Po të dalë ashtu siç parashikon ai, niveli i mësimdhënies në zonat e varfra të provincës Siçuan me siguri do të ketë një ngritje esenciale. (Zheng)