Para disa kohësh, në kuadrin e Ditës Botërore për të Drejtat e Pronësisë Intelektuale, Kina organizoi një sërë aktivitetesh propaganduese. Edhe sektorët e muzikës që kanë lidhje të ngushtë me të drejtat e pronësisë intelektuale morën pjesë në këto aktivitete, duke organizuar në Pekin "Takimin e javës propaganduese për mbrojtjen e të drejtave intelektuale të vitit 2007", ku me "Nxitjen e mbrojtjes së të drejtave të pronësisë intelektuale dhe lulëzimin e krijimeve të reja muzikore" si temë kryesore, u diskutua për krijimin si duhet të mjedisit për mbrojtjen e të drejtave të pronësisë intelektuale dhe të inkurajimit të krijimtarisë muzikore.

Në këtë samit, kryetari i shoqatës audiovizuale të Kinës, z. Yu Yongzhan, tha se vitet e fundit Kina ka forcuar vazhdimisht punën për mbrojtjen e të drejtave të pronësisë intelektuale, duke ushtruar një ndikim të madh mbi industrinë muzikore. Ai tha :"Qysh nga fillimi i këtij viti, grupi shtetëror i punës për mbrojtjen e të drejtave të pronësisë intelektuale ka publikuar planin e mbrojtjes së të drejtave të pronësisë intelektuale dhe numri i masave konkrete është shtuar nga l60 në 276, duke rritur forcën e gjykimeve dhe të mbrojtjes ligjore. Publikimi dhe zbatimi i këtyre masave kanë ushtruar një ndikim të madh për zhvillimin e industrisë audiovizuale dhe për mbrojtjen e të drejtave të pronësisë muzikore, gjë që është një nxitje e madhe për muzikantët".

Në fillim të viteve '90 të shekullit të kaluar u publikua "Ligji i parë mbi të drejtat e autorit" në Kinë, dhe pikërisht që nga ajo kohë interpretimi i këngëve duke u shoqëruar nga muzikë në video, karaoke, është kthyer në një nga mënyrat kryesore zbavitëse të banorëve. Por gjatë më se dhjetë vjetëve, në konceptin e banorëve të thjeshtë kineze nuk kishte lidhje të të drejtave të autorit me karaoken. Vitet e fundit, krahas popullarizimit të njohurive për mbrojtjen e të drejtave të pronësisë intelektuale, shoqata audiovizuale kineze dhe shoqata e të drejtave të pronësisë muzikore e Kinës filluan zbatimin e pagesës për përdorimin e muzikës nga menaxherët e karaokes.

Në fillim, menaxherët, që ishin mësuar me përdorimin falas të muzikës, refuzonin pagimin për përdorimin e muzikës. Pas analizave të hollësishme të masave përkatëse nga Drejtoria Shtetërore për të Drejtat e Autorit e Kinës dhe Ministria e Kulturës e Kinës, si dhe pas analizave mbi ligjet përkatëse mbi të drejtat e autorit nga specialistët, u arrit më në fund unanimitet mendimesh midis konsumatorëve e menaxherëve të karaokeve lidhur me pagimin e të drejtave të autorit për përdorimin e melodive dhe këngëve.

Sekretari i përgjithshëm i shoqatës së të drejtave të autorit të muzikës të Kinës, z. Qy Jingming, tha se pagesa për të drejtat e autorit nga karaoket është një dëshmi e rezultateve të mbrojtjes së të drejtave të autorit. Ai tha : "Shteti forcoi sivjet mbrojtjen e të drejtave të pronësisë intelektuale duke marrë një sërë masash konkrete. Ne kemi arritur rezultatet e para në këtë drejtim."

Sipas njoftimeve, qysh nga shkurti i këtij viti, menaxherët e karaokes të provincave Yunan, Shensi, Guandong, të Rajonit Autonom të Sinkiang-Ujgurit dhe të Pekinit filluan t'i paguajnë për të drejtat e autorit organizatat administrative të të drejtave të autorit të muzikës.

Kryemenaxherja e sektorit të muzikës dixhitale të kompanisë muzikore "Sony BMG", znj. Yang Huiyin, tha :  " Ne jemi shumë të kënaqur që pamë këtë vit zbatimin e politikës në këtë drejtim. Sipas mendimit tim, kjo është një gjë shumë e mirë. Ne kemi dëshirë të madhe për përhapjen e konceptit të pagimit për përdorimin e muzikës, sepse kjo do të nxitë krijimtarinë, dhe do të inkurajojmë kompaninë tonë të investojë sa më shumë për krijimet e reja, në mënyrë që të kompozohen më shumë melodi dhe këngë të bukura. "

Të pranishmit në takim ishin të mendimit se pas vitit l997, sektorët autovizualë të Kinës kanë hasur vështirësi të papara. Këto vështirësi kanë ardhur nga sfida e teknologjisë së re ndaj mbrojtjes së të drejtave të pronësisë intelektuale. Drejtori i përgjithshëm i kompanisë diskografike të Kinës, z. Zhai Daxin, tha se:"Problemet e reja përpara të cilave ndodhet kompania janë kanalet transmetuese dixhitale. Veçanërisht vitet e fundit, tregu i muzikës dixhitale ka pasur rritje te madhe, interneti dhe celulari kanë krijuar modele të reja tregtare. Shkarkimi i paligjshëm në internet është një dukuri e përgjithshme. Shkeljet e të drejtave të autorit në internet kanë sjellë humbje të mëdha ekonomike".

Funksionarja e Drejtorisë Shtetërore të të drejtave të autorit, znj. Duan Liping, tha se përveç garantimit sistematik të mbrojtjes së të drejtave të pronësisë intelektuale, nevojiten edhe përpjekjet e publikut. Ajo tha: "Qysh nga reforma dhe hapja e Kinës, veçanërisht pas hyrjes së saj në OBT, Kina ka bërë një punë të madhe në legjislacionin e mbrojtjes së të drejtave të pronës intelektuale dhe në zbatimin, propagandimin dhe kontrollin në këtë drejtim, dhe ka arritur sukses të madh. Tani në Kinë industria e tretë ka marrë një zhvillim të shpejtë, edhe zhvillimi i kulturës dhe i çështjeve zbavitëse janë bërë pika të rëndësishme të zhvillimit ekonomik të krahinave. Për zhvillimin e kulturës, mbrojtja e të drejtave të autorit është shumë e rëndësishme." ( Zhai)