Ju flet Radio e Jashtme e Kinës. Të dashur dëgjues, në minirubrikën "Drejt Olimpiadës 2008" do të japim reportazhin "Njerëzit që u shërbejnë Lojërave Olimpike të Pekinit".

Përgatitja dhe organizimi i Lojërave Olimpike të Pekinit nuk mund të realizohen pa pjesëmarrjen aktive të qytetarëve të Pekinit dhe të popullit të mbarë Kinës. Para disa kohësh, hoteli Beijing dhe hoteli Guibinlou i Pekinit u bënë zyrtarisht "Hotele të Selisë së Familjes Olimpike". Këto dy hotele morën përsipër një mision të rëndësishëm që të shërbejnë njëkohësisht si vendndodhja, selia e përgjithshme dhe qendra komanduese e Komitetit Olimpik Ndërkombëtar gjatë periudhës së garave të Lojërave Olimpike të Pekinit të vitit 2008.

"Tungjatjeta! Jam Zhong Xin, një kuzhinier i kuzhinës evropiane në hotelin Guibinlou të Pekinit. Unë punoj për të gatuar ëmbëlsira."

Zhong Xin 38 vjeçar u bë një mjeshtër ëmbëlsirash në hotelin Guibinjlou qysh në vitin 1986, pasi mbaroi mësimet në shkollën e mesme Qianmen të Pekinit. Meriton të përmendet fakti se në vitin 2006, vit që hoteli Guibinlou e përcaktoi si "viti i mjeshtrisë teknike në kuadrin e pritjes së Lojërave Olimpike", me ëmbëlsirën e tij "Çelja e luleve të pranverës" ai fitoi çmimin e parë në konkursin teknik të punonjësve të hotelit të tij. Zhong Xin thotë se, si një qytetar pekinas, ai e ndien veten shumë krenar që Pekini do të organizojë Lojërat Olimpike të vitit 2008.

"Jam i sigurt se në vitin 2001, në çastin e shpalljes së fitores së Pekinit për organizimin e Lojërave Olimpike, çdo kinez ndieu emocion dhe krenari të pakrahasueshme. Të njëjtin emocion e ndieva edhe një herë pas 6 vjetëve, kur hoteli ynë u caktua si hotel i selisë së Komitetit Olimpik Ndërkombëtar gjatë Lojërave Olimpike të vitit 2008. Njëkohësisht, ndieva edhe një detyrë të rëndësishme të hotelit tonë. Meqenëse puna e kuzhinës është një nga hallkat e rëndësishme të punës pritëse gjatë Lojërave Olimpike, jam i vendosur të ngrej më tej nivelin tim teknik dhe të gatuaj ushqime edhe më të shijshme për të pritur mysafirët që do të vijnë në vitin 2008."

Të dashur dëgjues, më poshtë do t'ju njohim me zonjën Li Vei, shefja e shërbimit në banakun kryesor të hotelit Guibinlou.

"Unë shpesh herë bëj muhabet me mysafirët dhe u them me krenari se hoteli ynë tashmë është bërë një pjesëtar i Familjes Olimpike. Edhe mysafirët ndajnë krenarinë me ne, sepse janë bërë mysafirë të Familjes Olimpike dhe kanë marrë një përvojë të jashtëzakonshme."

Zonja Li Vei thotë se hoteli Guibinlou, si një hotel i klasit të parë në botë, administrohet gjithmonë shumë rreptë. Drejtoria e hotelit kërkon që të gjithë punonjësit të kualifikohen më tej dhe të ngrejnë vazhdimisht nivelin teknik për të pritur Lojërat Olimpike të vitit 2008. Ajo është e mendimit se gjuha është një urë e komunikimit me mysafirët nga vende të tjera, ndërsa gjatë Lojërave Olimike një detyrë e padiskutueshme e seksionit të shërbimit në banakun kryesor është që t'u japë mysafirëve të dhënat e duhura për vizitë nëpër Pekin.

"Meqenëse shumë funksionarë të Komitetit Olimpik Ndërkombëtar janë nga vendet frëngjishtfolëse, sivjet filluam të mësojmë frëngjshten si gjuhë të dytë të huaj dhe si një nga detyrat tona të rëndësishme. Përpiqemi që, në komunikimin me këta funksionarë të Komitetit Olimpik Ndërkombëtar në vitin 2008, të mos kemi asnjë pengesë gjuhe. Për t'u shërbyer si duhet mysafirëve, ne i kushtojmë vëmendje edhe grumbullimit të të dhënave për turizmin, trafikun, lokalet e argëtimit dhe kulturën tradicionale të Pekinit."

Zonja Li Vei shprehu dëshirën e vet që, me sinqeritetin e vet të shërbimit, të presë çdo mysafir që do të vijë për të marrë pjesë në Lojërat Olimpike të vitit 2008.

Ju flet Radio e Jashtme e Kinës. Të dashur dëgjues, dhamë reportazhin "Njerëzit që u shërbejnë Lojërave Olimpike të Pekinit" (Zheng)