dëgjoni

Ju flet Radio e Jashtme e Kinës. Të dashur dëgjues, koha e Lojërave Olimpike të Pekinit të vitit 2008 po afrohet gjithnjë e më shumë, prandaj të 37 fushat dhe pallatet e garave dhe ndeshjeve për to do të përurohen deri në fund të këtij viti. Secila prej këtyre fushave dhe pallateve ka karakteristikat e veta të theksuara dhe përmban në vetvete një tregim interesant që pak njerëz e njohin. Në minirubrikën e sotme "Drejt Olimpiadës 2008", do t'ju flasim për Fushën e Softbollit Fengtai, që është e përuruar dhe e venë në përdorim më herët ndër të gjitha fushat dhe pallatet e garave dhe ndeshjeve të Lojërave Olimpike të Pekinit.

Fusha e ndeshjeve të softbollit të Lojërave Olimpike të Pekinit ka marrë emrin "Fusha e Softbollit Fengtai" për arsye se ajo gjendet në rajonin Fengtai në pjesën jugore të Pekinit. Punimet e ndërtimit të kësaj fushe sportive me një sipërfaqe prej 15 mijë metrash katrore filluan më 28 korrik të vitit 2005. Ajo mund të mbajë 13 mijë spektatorë sportdashës. Në të përfshihen një fushë kryesore e ndeshjeve, një fushë rezervë, dy fusha të stërvitjeve, një pallat i punës dhe infrastruktura përkatëse, siç janë rrugët, parku automobilistik, lëndina artificiale dhe disa instalime të përkohshme komunale. Fusha kryesore e ndeshjeve dhe ajo rezervë, si dhe pallati i punës u përuruan dhe kaluan kontrollin në korrik të vitit 2006.

Me t'u përuruar, Fusha e Softbollit Fengtai priti kampionatin e 11-të botëror të softbollit për femra, që shërbeu si takimi i parë sportiv i provës për Lojërat Olimpike të Pekinit. Cilësia e ndërtimit të saj u vlerësua lart nga Federata Ndërkombëtare e Softbollit dhe nga lojtaret, trajnierët dhe gjyqtarët e këtij kampionati. Në konferencën e Komitetit Ekzekutiv të Federatës Ndërkombëtare të Softbollit, zoti Don Porter tha: "Ndosha Fusha e Softbollit Fengtai është fusha më e mirë në historinë e lojës së softbollit." Ai shfaqi shpresën se Fusha e Softbollit Fengtai do të bëhet qendra aziatike e stërvitjeve të softbollit.

Ndërtuesit e Fushës së Softbollit Fengtai bënë të gjitha përpjekjet për të ndërtuar një objekt modern të nivelit ndërkombëtar të lojërave olimpike. Kjo pasqyrohet në radhë të parë në dheun e kuqërremë të zonës se vrapimit midis bazave të softbollit. Kjo fushë sportive është në trajtën e një freskoreje të këndit prej 90 gradësh. Një zonë e vogël brenda trajtës së freskores është tokë me dheun e kuqërremë që përdoret për vrapimin e lojtareve nga një bazë në bazë tjetër. Kurse pjesa tjetër e trajtës së freskores përdoret si fusha periferike e mbuluar me lëndinë artificiale. Meqenëse gjatë ndeshjeve lojtaret mund të bëjnë lëvizje rrëshqitjeje duke arritur në një bazë, sipërfaqja e tokës duhet të ketë një koeficient të caktuar të forcës fërkuese dhe dheu i kuqërremë të jetë afërsisht si rërë dhe të mos jetë as ngjitës, as i fortë. U deshën 2 milionë juanë për të transportuar dheun e kuqërremë nga jugu i Kinës. Ndërsa gjithë dheu i kuqërremë që u përdor për të shtruar fushën e ndeshjeve zyrtare u importua nga jashtë. Duket qartë se ndërtimi i një fushe sportive profesioniste të nivelit ndërkombëtar kërkon një shpenzim të madh.

Duke shpenzuar bujarisht për ndërtimin e kësaj fushe të softbollit, projektuesit morën parasysh kursimin e energjisë në projektimin e pajisjeve të ndriçimit dhe të higjienës. Për shembull, ata projektuan furnizimin me ujë të ngrohtë duke përdorur bateri akumulatorësh të energjisë diellore, gjë që ka ulur shumë konsumin e energjisë.

Duke treguar frymën krijuese, ata projektuan edhe një "impiant ujëthithës të shpejtë" nën lëndinën artificiale të fushës se softbollit, e cila është 8 centimetra e trashë mbi sipërfaqen e tokës dhe kjo strukturë 8 centimetrash përbëhet nga 3 shtresa: në fillim, fusha e sheshuar u shtrua me gur, mbi të u hodh zhavorr, më në fund u shtrua me rërë të imtë dhe mbi rërë u mboll bar. Një fushë e tillë sportive me këtë strukturë, në rastet e shiut, uji depërton shpejt nën tokën dhe nëpërmjet tubave derdhet në hauzin e grumbullimit të ujit që gjendet afer, ndërsa fusha e softbollit thahet shpejt me anë të "ujëthithësit".

Edhe gjelbërimet dhe kushtet e trafikut përreth Fushës së Softbollit Fengtai gjithashtu kanë arritur standardet botërore. Siç parashikohet, gjatë Lojërave Olimpike të Pekinit të vitit 2008, edhe shkallët e kësaj fushe sportive do të jenë të mbushura plotësisht. (Zheng)