dëgjoni

Ju flet Radio e Jashtme e Kinës! Të dashur dëgjues, jam Shy Guan. Ju përshëndes përsëri nga Pekini. Tani, po zhvillohen normalisht punët e ndryshme përgatitore të Lojërave Olimpike të Pekinit. Një ndër punët më të rëndësishme është edhe rekrutimi i vullnetarëve të lojërave olimpike. Qysh nga dhjetëditëshi i fundit i marsit, Komisioni Organizativ ka filluar punën e rekrutimit të vullnetarëve të huaj dhe pranoi zyrtarisht kërkesa regjistrimi nga të huaj të ndryshëm. Në Universitetin Normal të Pekinit, i specializuar në përgatitjen e mësuesve, shumë studentë të huaj kanë interes të madh për Lojërat Olimpike të Pekinit. Ata shpresojnë ta shikojnë me sytë e tyre këtë aktivitet sportiv botëror dhe të japin kontributin e vet. Në minirubrikën e sotme "Sporti i Kinës", do të ndiqni korrespondencën me titull " Studentët jugkoreanë dëshirojnë të shërbejnë si vullnetarë të Lojërave Olimpike të Pekinit"

Kim Dae Su është një djalë 27 vjeçar. Ai ka ardhur në Kinë për të studiuar para 6 muajve. Ai tha se çdo ditë në Pekin mund të ndiejë atmosferën e afrimit të lojërave olimpike. Shumë nga miqtë e tij kinezë kanë regjistruar kërkesën për t'u bërë vullnetarë të Lojërave Olimpike të Pekinit. Prandaj, edhe atij i lindi dëshira për t'u regjistruar. Ai tha:

"Tani po studioj pikërisht në Kinë. Nëse bëhem vullnetar, do të përdorë njohuritë që kam marrë dhe do të kem më shumë raste të reja. Është ndryshe nga shikimi në televizion. Mund të shoh në vend paraqitjen e sportistëve. Kjo do të jetë më shumë interesante."

Kim Dae Su e ka imagjinuar dhe e planifikuar shumë hollësisht punën e tij pasi të bëhet vullnetar. Ai tha:

"Nëse ka mundësi, dëshiroj të provoj të gjitha punët. Kur të bëhem vullnetar, do t'u tregoj sportdashësve rrugën për te stadiumet, cila ndeshje do të jetë atë ditë etj. Kjo punë duhet të jetë më interesante!"

Lee Sang Yoon, bashkatdhetar dhe shok klase i Kim Dae Susë, është edhe një "dashamirës i kulturës kineze". Duke folur për Lojërat Olimpike të vitit 2008, Lee Sang Yoon u emocionua shumë. Ai tha:

"U kushtoj shumë vëmendje Lojërave Olimpike të Pekinit, sepse edhe Koreja e Jugut ka organizuar lojëra olimpike në vitin 1988. Në atë kohë, unë isha vetëm në klasën e tretë të shkollës fillore. Pas organizimit të Lojërave Olimpike të Seulit, Koreja e Jugut u zhvillua shumë shpejt në fushën ekonomike dhe shoqërore dhe tërhoqi vëmendjen e botës. Jam i bindur se organizimi i Lojërave Olimpike të Pekinit do të tërheqë vëmendjen më të madhe të vendeve të tjera dhe do të nxitë më tej zhvillimin e ekonomisë kineze."

Lee Sang Yoon tha se ai po mëson me zell gjuhën kineze dhe po përpiqet t'u shërbejë lojërave olimpike të Pekinit. Ai dha sugjerime për zhvillimin e qytetit të Pekinit.

"Më duket se metroja e Pekinit nuk është shumë e zhvilluar. Ndërsa në Korenë e Jugut është ndryshe, mund të shkoni në çdo zonë të Seulit me metro. Por tani në Pekin, metroja nuk mund të arrijë në shumë vende. "

Shoku i Lee Sang Yoon-it, koreani tjetër Oh Se Wone ka studiuar gjuhën kineze për më shumë se dy vjet. Ai mund të flasë shumë lirisht gjuhën kineze. Ai mendon se, nëse studentët e huaj do të merren me punën e shërbimit si vullnetarë të lojërave olimpike, kjo përvojë do t'i ndihmojë për të gjetur punë në të ardhmen. Sepse lojërat olimpike janë një rast që mund të provojë aftësinë për punë të të rinjve:

"Kam dëshirë të madhe të bëhem vullnetar i lojërave olimpike. Kjo do të më japë përvojën e aktiviteteve shoqërore, e cila mund të më ndihmojë shumë, veçanërisht për të gjetur punë në Korenë e Jugut. U kushtohet rëndësi e madhe talenteve me përvojë pune "

Të dashur dëgjues! Në minirubrikën e sotme "Sporti i Kinës", dëgjuat korrespondencën me titull "studentët jugkoreanë dëshirojnë të shërbejnë si vullnetarë të Lojërave Olimpike të Pekinit."