Para disa kohësh, me ftesën e prezantuesit të njohur të Televizionit Qendror të Kinës (CCTV) dhe producentit të rubrikës "Magjia e filmave artistikë", zotit Cui Yongyuan, erdhën në Kinë për vizitë dhe për të dhënë intervista në kuadër të kësaj rubrike znj. Eglantina Kume dhe znj. Elida Cangonji, që kanë luajtur rolet kryesore, përkatësisht të Mirës dhe të Zanës, në filmat artistikë shqiptarë "Ngadhënjim mbi vdekjen" dhe "Rrugë të bardha". Këta dy filma kanë qenë shumë të mirëpritur nga shikuesit kinezë në vitet '70 të shekullit të kaluar.

Z. Cui Yongyuan pati një takim me dy aktoret dhe shtroi një darkë karakteristike kineze për nder të tyre. Ai u dhuroi si kujtim zonjave Eglantina Kume dhe Elida Cangonji edhe nga një pjesë me bukurshkrim të kaligrafistëve të njohur kinezë.

Ai pati edhe një bisedë të përzemrët me këto dy aktore duke folur gjerë e gjatë me to për miqësinë midis popujve të dy vendeve dhe për filmat e mirëpritur shqiptarë në Kinë dhe për filmat kinezë që janë shfaqur në shqipëri.

Duke folur për lidhjet e miqësisë së familjes së saj me Kinën, znj. Eglatina Kume tha : "Ne në shtëpinë tonë gjithmonë bisedojmë për Kinën, sepse ajo ka qenë shumë e njohur për ne nga Fatmiri, bashkëshorti im, që ka qenë në Kinë, dhe nga unë, që e dija që filmi 'Ngadhënjim mbi vdekjen' kishte sukses të madh në Kinë. Unë gjithmonë kam pasur dëshirë që të vija këtu, sepse Kina ka pasur një lloj lidhjeje me familjen tonë në këto dy gjëra."

Ajo u tregoi të pranishmeve edhe disa nga kujtimet e paharrueshme të të shoqit gjatë vizitës që ai bëri përpara 40 vjetësh në Kinë dhe duke u shtruar i sëmur në spitalin e Guanzhout. "Kur burri im erdhi në Kinë u sëmur dhe donin ta operonin, por ai nuk pranoi se donte të operohej në Shqipëri për arsye se po të qëndrontë të operoj në Kinë do ti duhej një kohë shumë e gjatë dhe do ngelej atje vetëm. Por ai qëndroi për trajtim për disa kohë në spital. Aty ngjitur me dhomën e burrit ishte shtruar një aviator i cili kishte shpëtuar pas rënies së avionit, ai kishte dy muaj që rrinte në spital. Burrin tim nuk e linin të dilte sepse rruhej nga disa ushtarë sepse Aasambli ishte ushtarak, në një moment ai i thotë ushtarit të lutem të dal pak përjashta se nuk mund të rri dot më brenda dhe ushtari e lejoi. Në korridor burri pa këtë aviatorin i cili po shëtiste aty pranë tij dhe pasi morri vesh që ai është shqiptar e ftoi burrin tim në dhomën e tij. Sa futet në dhomë, burri im shikon fotografinë time të ngjitur në murë dhe nuk foli asnjë fjalë, kurse aviatori i tha e di pse të solla këtu? dua të të pyes a di hollësira për këtë aktoren se unë e simpatizoj shumë, dhe burri iu përgjigj 'po di hollësira, ajo është gruaja ime'.

Edhe znj.Elida Cagonj foli për miqësinë midis dy popujve të Kinës dhe Shqipërisë dhe për kulturën tradicionale kineze që i intereson shumë burrit të saj. Ndër të tjera ajo tha: "Ai në fakt pëlqen shumë kulturën kineze, traditën kineze, pëlqen shumë poetët e lashtë të Kinës bile ka pikturuar dy poetë të lashtë kinezë që mua emrat nuk më kujtohen. Ai pëlqen shumë thjeshtësinë e pikturave kineze që me shumë pak vizatim apo lëvitzje mund të shprehin shumë gjëra. Ai është shumë i apasionuar pas pikturës kineze dhe përdorë bojë kineze në mënyrë që të arrij në të njëjtin nivel me piktorët kinez. Dhe unë e ndikuar prej tij i kam kushtuar më shumë vëmendje artit kinez, kulturës dhe traditës kineze. Kina tani është vendi më interesant për Evropën parë nga shumë këndvështrime. Unë mund tju them jo vetëm si shqiptare por edhe nga fakti se një pjesë të madhe të jetës e kam kaluar në Francë se edhe Franca është shumë e dashuruar me Kinën dhe traditën e saj të lashtë. Këtë mund ta shohësh edhe në veshjet e grave Evropiane dhe franceze që janë veshje aziatike dhe preferencat që ato kanë për të blerë sende shtëpiake me motive kineze apo edhe preferencat për restorantet kineze. Kina ka qënë gjthnjë por tani është akoma më interesantë në sytë e Europës. Kina po e habit të gjithë botën ."

Pasi mori vesh se bashkëshorti i znj. Elida Cangonji është piktor dhe i pëlqejnë shumë pikturat dhe bukurshkrimet kineze, z. Cui Yongyuan i dhuroi asaj edhe një gur të çmuar për të bërë vula dhe i propozojë të gdhendte në këtë gur fjalët "Jeta është e bukur si pikturë".

Gjatë intervistave për rubrikën e CCTV-së "Magjia e filmave artistikë", znj. Eglantina Kume dhe znj. Elida Cangonji treguan për shikuesit kinezë episode dhe kujtime të bukura nga xhirimi i filmave, episode e kujtime që edhe pas kaq shumë vjetësh mbeten të gjalla e të paharrueshme për to.

Gjatë qëndrimit në Kinë, znj. Eglantina Kume shoqërohej edhe nga i biri Helio Selmani. Ai është një student shqiptar që studion në vitin e fundit të Konservatorit të Muzikës në Greqi.

Përveç dhënies së intervistave mbi ndodhitë interesante gjatë xhirimit të filmave të vjetër shqiptarë, dy aktoret shqiptare dhe Helioja bënë vizita në Murin e Madh Kinez, Pallatin e Dimrit, Tempullin e Qiellit dhe pika të tjera turistike të Pekinit. Gjithashtu, ata vizituan edhe Radion e Jashtme të Kinës. (Zhai)