Kënga që sapo ndoqët "Mos u largoni, mysafirë të ardhur nga larg" është një nga këngët e albumit të këngëtares Qubiawu me titull "Parajsë në botën njerëzore", në të cilin përfshihen 11 këngë popullore të interpretuara prej saj. Ndër to 10 këngë janë të kombësisë yi, vetëm kënga "Ka një vend të bukur" është e kombësisë taj. Këto këngë si piktura tërheqëse na çojnë në fshatrat e kombësisë yi me cicërimat e zogjve dhe me aromën e këndshme të luleve, ku do të shijojmë bukurinë e veçantë të atjeshme.

Kënga që sapo ndoqët është një këngë dashurie e kombësisë yi me titull "Kaq e bukur është hëna, kaq e bukur është vajza".

Në karrierën shumëvjeçare artistike këngëtarja Qubiawu ka krijuar stilin e veçantë të interpretimit, ajo ka zë të ëmbël dhe të bukur, shqipton qartë dhe interpreton në mënyrë të hollësishme dhe elegante. Ajo ka marrë pjesë shpesh në mbrëmjen artistike të Televizionit Qendror të Kinës të organizuar me rastin e Festës së Pranverës dhe në shfaqje të tjera të mëdha artistike, ka shkuar për vizitë e shfaqje me delegacionin kinez në shumë vende dhe rajone të Azisë, Evropës dhe të Amerikës. Këngët e interpretuara prej saj "I biem veglës muzikore yueqin", "Po kthehemi nga pazari" dhe shumë të tjera janë mirëpritur ngrohësisht nga spektatorët.

Në fund të programit të sotëm do të shijojmë së bashku këngën "Po kthehemi nga pazari", kënduar nga Qibiawu. Kjo këngë e gjallë dhe e gëzueshme pasqyron gëzimin dhe harenë e vajzave të kombësisë yi që po kthehen nga pazari.

Në këngë thuhet: "Kur perëndoi dielli, u mbyll edhe pazari, po kthehemi të gëzuar në shtëpi. Jeta është e ëmbël si mjaltë, vajzat e kombësisë yi janë të bukura si lule. Cicërimat e zogjve na shoqërojnë, rrezet e diellit që perëndon fluturojnë pas nesh." (Pina)