dëgjoni

Shi Guoliang është një murg budist, njëkohësisht ai është piktori i famshëm i portretit i Kinës dhe profesor i fakultetit të arteve të shumë universiteteve. Pikturat e tij përshkruajnë kryesisht jetesën e banorëve të zakonshëm dhe kanë atmosferë të pasur jetësore.

Shi Guoliangut i pëlqente vizatimi qysh në moshë të re. Në vitet '70 të shekullit të kaluar, ai mësoi vizatimin e pikturën kineze nga piktorja e famshme Zhou Sicong dhe piktori Huang Zhou. Stili i veçantë i vizatimit i këtyre dy mjeshtërve ka ushtruar ndikim të thellë mbi krijimet e Shi Guoliangut. Shi Guoliang u shpreh se ai është shumë fatmirë që mundi të bëhet studenti i Zhou Sicongut dhe i Huang Zhout:

"Jam shumë i lumtur që mund të mësoj vizatimin nga dy mjeshtërit me nivelin më të lartë në Kinë. Ata më ndihmuan t'u hedh bazë të fortë krijimeve të mia artistike."

Falë mësimdhënies së dy mjeshtërve, niveli i vizatimit i Shi Guoliangut u ngrit shumë shpejt. Në fillim të viteve '80 të shekullit të kaluar, Shi Guoliang shkoi edhe në fakultetin e pikturës kineze të Universitetit Qendror të Arteve të Kinës për studime. Gjatë studimeve, ai zhvilloi shumë herë ekspozita individuale duke fituar gradualisht famë në qarqet artistike kineze. Për të ngritur më tej nivelin e vizatimit, në fund të viteve '80 të shekullit të kaluar, Shi Guoliang jetoi për 10 vjet në Kanada për studimin e vizatimit të Perëndimit. Gjatë kësaj periudhe, Shi Guoliang ndiente shpesh vetmi dhe filloi të ketë kontakte me fenë budiste:

"Atë kohë në Kanada, nuk kisha miq dhe jetoja në vetmi. Prandaj fillova të studioj teorinë e fesë budiste. Në fakt më pëlqen shumë jeta e thjeshtë e murgut budist."

Në vitin 1995, Shi Guoliang u bë zyrtarisht murg budist. Qysh nga ajo kohë, ai ka pasur identitetin e dyfishtë të murgut dhe të piktorit.

Në historinë e arteve të Kinës ka shumë piktorë që besojnë fenë budiste. Ata vizatojnë zakonisht panoramat natyrore ose buda për të shfaqur pikëpamjet e tyre për botën. Por stili i pikturave të Shi Guoliangut ka dallime me ta. Ai i kushton më shumë vëmendje jetës së njerëzve dhe jetesës së zakonshme. Shi Guoliang tha se megjithëse është murg, ai dëshiron shumë të bëjë gjëra në favor të shoqërisë dhe të njerëzve:

"Dua t'i ndihmoj njerëzit të kalojnë vështirësitë e hidhërimet e tyre."

Shi Guoliang ka qenë shumë herë në Tibet për të krijuar. Tibeti është rajoni me atmosferën më të dukshme të budizmit tibetian në Kinë. Atje Shi Guoliang ka krijuar shumë vepra që përshkruajnë kulturën tibetiane dhe tibetianë të zakonshëm. Në shtëpinë e tij varet një pikturë e besimtarit të përshpirtshëm budist. Portreti i tij është shumë i qetë. Specialistët vunë në dukje se pikturat e Shi Guoliangut mund të pasqyrojnë thellë botën shpirtërore të portreteve. Shikuesve madje u lind dëshira për zhvillimin e shkëmbimeve shpirtërore me figurat e pikturave.

Kohët e fundit, Shi Guoliang është i zënë me luftën kundër pikturave të rreme. Pak kohë më parë në një ankand të veprave artistike, Shi Guoliang zbuloi se disa piktura me nënshkrimin e tij nuk janë vepra të tij. Prandaj ai hapi një blog në internet për të sqaruar dallimet midis veprave të tij dhe veprave të rreme:

"Gjërat e rreme u sjellin njerëzve dëme të mëdha. Si një murg budist, kam përgjegjësi t'i ndihmoj njerëzit të dallojnë të vërtetën nga rremja."

Njëkohësisht, Shi Guoliang publikon vepra të reja dhe shkëmben mendime me shikuesit në blogun e tij. Ai shpreson se ky blog do të bëhet një platformë e përhershme e shkëmbimeve. (Fani)