Kina, si një vend shumëkombësh, ka 55 pakica kombëtare, përveç kombësisë han. Për shkaqe të shumta historike e shoqërore dhe të kushteve natyrore, arsimi në disa krahina të pakicave kombëtare ende ka disnivel në krahasim me kërkesat e zhvillimit ekonomik dhe shoqëror në to. Për këtë arsye, duke u nisur nga realiteti i tyre, qeveria kineze ka ngritur në to shkolla të llojeve të shumta, sidomods shkolla të larta të pakicave kombëtare, që kanë përgatitur një numër të madh kuadrosh të talentuar. Njëri prej tyre është edhe Universiteti i Kombësive të Jugperëndimit, me të cilin do t'ju njohim në rubrikën e sotme.

Ky universitet gjendet në Çengdu, kryeqendër e provincës Siçuan të Kinës Jugperëndimore. Zv-rektori i tij, zoti Zeng Ming thotë se kjo shkollë, që u hap në vitin 1951, është një nga shkollat e larta më të hershme të kombësive, të hapura pas shpalljes së Republikës Popullore të Kinës. Në të sot studiojnë studentë nga të gjitha kombësitë e Kinës.

"Këtu studiojnë edhe të rinj dhe të reja të kombësive me popullsi të paktë, madje të kombësive vetëm me disa mijëra banorë. Ka ndodhur që nga një kombësi doli vetëm një vetë që mori pjesë në konkurrimin me provime dhe u pranua për studime në universitetin tonë. Kemi edhe një studente nga kombësia taxhike, që quhet Mysafirja nga mali akullnajor. Asaj iu desh një muaj për të udhëtuar për në shkollën tonë."

Zoti Zeng thotë se gjatë 55 vjetëve ky universitet ka përgatitur mbi 90 mijë kuadro të profesioneve të ndryshme. Ndër ta, janë edhe doktori i parë i kombësisë tibetiane dhe doktori i parë i kombësisë qiang. Shumë prej tyre janë bërë specialistë dhe dijetarë të famshëm ose forca kurrizore të sektorëve dhe njësive të ndryshme. Ata kanë dhënë kontribut të dukshëm në ndërtimin dhe zhvillimin ekonomik dhe shoqëror të krahinave të pakicave kombëtare.

Në Kinë përdoren edhe disa gjuhë të pakicave kombëtare. Kombësitë kanë doke dhe zakone të ndryshme nga njëra-tjetra. Por si shkojnë me njëri-tjetrin këta studentë të 56 kombësive që kanë ardhur nga vise të ndryshme dhe që studiojnë në një shkollë? Lidhur me këtë, foli drejtori i Institutit të Yiologjisë pranë këtij universiteti, profesor Unidoqe. Ai tha se gjatë mësimdhënieve, ata vënë në jetë mendimin e "diferencimit paqësor". Sot ky institut është bërë një bazë e rëndësishme për përgatitjen e kuadrove të kombësive han dhe yi në të dyja gjuhë dhe për studime yiologjike.

"Çdo kombësi ka doket e zakonet e veta. Këtu në universitetin tonë, respektohen plotësisht traditat kulturore, doket e zakonet popullore dhe besimet fetare të kombësive të ndryshme. Në këto kushte, specialitetet e studimeve për studentët e pakicave kombëtare janë zhvilluar në mënyrë të kënaqshme. Sot përgatitja e kuadrove të pakicave kombëtare ka një epërsi të veçantë dhe kjo gjendje nuk do të ndryshojë."

Shumë prej studentëve të Universitetit të Kombësive të Jugperëndimit janë nga zonat e largëta dhe të pazhvilluara ekonomikisht. Prandaj, duke vënë në jetë direktivat politike të shtetit mbi ndihmën për studentët e ardhur nga familjet e varfra, seksioni përkatës i kësaj shkolle i ndihmon ata për të marrë kredi shtetërore të ndihmës arsimore dhe bën përpjekje për t'u krijuar atyre kushte të punës jashtë orarit mësimor, që të fitojnë disa para për të kryer me sukses studimet. Njëri prej studentëve që ka fituar leverdi nga kjo zgjidhje është edhe studenti Luo Ven i kombësisë Zhuang, që studion në Institutitin e Inxhinierisë së Kompjutereve pranë këtij universiteti.

"Mua më quajnë Luo Ven. Jam nga Rajoni Autonom Guangsi i kombësisë Zhuang i Kinës Jugperëndimore. Ngaqë familja ime nuk ka kushte të mira financiare, universiteti ynë më ofroi një punë jashtë orarit mësimor që të fitoj disa të holla. Pas provimeve me gojë, më caktuan në postin e ndihmës-punonjësit të kredisë shtetërore të ndihmës arsimore. Unë bëj kryesisht disa punë për të kryer formalitetet e lutjeve të studentëve të universitetit tonë për marrjen e kredive shtetërore. Me këtë punë, unë fitoj disa para për të vazhduar studimet, por më e rëndësishmja është se më është dhënë rasti të kalitem në praktikë."

I riu tibetian Hë Gjan nga provinca Gansu e Kinës Veriperëndimore ka 3 vjet që studion dhe jeton në Institutin e Gjuhëve të Huaja pranë këtij universiteti. Ai thotë se ushqen ndjenja të thella dashurie për shkollën e tij.

Zv-rektori Zeng Ming thotë se ky universitet tashmë ka përgatitur kuadro të shumtë të kombësive të ndryshme dhe se ata do të vazhdojnë t'i përmbahen parimit të administrimit të shkollës në mënyrë harmonike që ta shndërrojnë universitetin e tyre në një shkollë moderne të tipit të ri të pakicave kombëtare. (Zheng)