Ju flet Radio e Jashtme e Kinës! Të dashur dëgjues, unë jam Pina, ju përshëndes nga Pekini. Në programin e sotëm ju ftoj të dëgjoni këngët e kënduara nga këngëtarja Qibiawu e këmbësisë yi.

"Në tokat e Liangshanit, lulet dhe pemët lëshojnë aromë të këndshme, vlon dashuria e të rinjve, dhe fluturojnë zogjtë e lumtur. I biem veglës muzikore yueqin, duke ju pritur, ne, banorët e kombësisë yi."

Kënga që ndoqët është një këngë popullore e kombësisë yi me titull "I biem veglës muzikore yueqin", kënduar nga Qubiawu. Kombësia yi është një nga pakicat kombëtare që jetojnë në pjesën jugperëndimore të Kinës. Ajo ka një histori të gjatë dhe kulturë të lashtë. Yueqini është një vegël muzikore tradicionale me tela, e cila ka histori të gjatë dhe zë një vend të rëndësishëm në jetën e banorëve të kombësisë yi. Teksti i kësaj kënge është i gjallë e i figurshëm dhe pasqyron dashurinë e bijve dhe bijave të kombësisë yi për vendlindjen dhe shpresën e tyre për dashurinë e bukur.

Këngëtarja Qubiawu është nga një familje e kombësisë yi e provincës Sichuan të Kinës jugperëndimore. Kur ishte 5-6 vjeç, filloi ajo të mësonte nga i ati t'i binte yueqinit dhe të këndonte. Në moshën 13 vjeçe, ajo hyri në një ansambël artistik vendor, duke filluar jetën e saj artistike. Në vitin 1980, Qubiawu mori pjesë në "Festivalin e parë artistik të pakicave kombëtare të mbarë vendit" dhe fitoi çmimin e interpretimit të dalluar. Pastaj asaj iu dha rasti të studionte në Konservatorin e Tianjinit dhe në vitin 1982 pasi mbaroi konservatorin, ajo hyri në Ansamblin Qendror të këngëve dhe valleve të kombësive si këngëtare soliste.

Kënga që ndoqët titullohet "Parajsa në botën njerëzore", kënduar nga Qubiawu. Zëri i pastër si uji i këngëtares Qubiawu rrjedh si një burim i kulluar nga fshati i kombësisë yi, duke na sjellë forcën tërheqëse të muzikës malësore.

Në këngë thuhet: "Zogjtë këndojnë në male të blerta, uji i pastër i burimit rrjedh qetë-qetë. Tymi i lehtë i shtëpive ngrihet lart, rakia lëshon aromë të këndshme. Mos u largoni, mysafirë të nderuar, njerëzit e lumtur jetojnë në parajsë."

Të dashur dëgjues, ndoqët këngën "Parajsë në botën njerëzore". Tani le të shijojmë së bashku këngën "Ndjenjat e thella të miqësisë", kënduar nga Qubiawu. Kjo është një këngë e vjetër e përhapur gjërësisht në të gjithë vendin në vitet '50 të shekullit të kaluar. Kënga pasqyron miqësinë e thellë midis banorëve të kombësisë yi dhe kombësisë hane. Këtë këngë Qubiawu e ka interpretuar me ndjenja të thella dhe me forcë të madhe prekëse. Le ta dëgjojmë atë.(Pina)